PFL-in top biznesi: “Adidas”ı seçmək məcburiyyətinin səbəbi nədir?

Peşəkar Futbol Liqası top biznesinə başlayıb. Qurum bütün Premyer Liqa klublarına 100 yeni top almaq tələbi qoyub.

Futbolinfo.az xəbər verir ki, hər mövsümün oyunlarının keçirilməsi üçün xüsusi toplar sifariş edilir. PFL bu dəfə çempionat oyunlarında, məşqlərdə istifadə üçün “Adidas”ın məhsuluna üstünlük verib. Seçim edildikdən sonra isə klublara 100 top almaq və pulunu birdəfəlik ödəmək tələbi qoyulub.

Müzakirələr etmədən məhz “Adidas”ın seçilməsi qəribəliyi bir yana, qiymət də çox bahadır. Bir top üçün 230 manat tələb edən PFL klubların hərəsinin ümumilikdə 23 min manat ödəməsini istəyir.

Əslində, bu prosedur normaldır. Narahatedici məqam qiymətin həddindən artıq yüksək olması və güzəştlərin edilməməsidir. Faktiki mövsüm ərzində yalnız “Adidas”ın məhsullarından istifadə edilməsi həm də bu brendin reklam olunması deməkdir. Deməli, sözügedən şirkətlə danışıqlar aparılmalı, qarşılığında topların müəyyən faizinin pulsuz verilməsinə nail olunmalı idi.

Brendlər arasında seçm edilməməsi, rəqabət yaradılmaması, daha yaxşı şərtlər təklif edənə üstünlük verilməməsi qəribədir. Sanki kimsə “mütləq bu şirkətlə işləməlisiz” tələbi qoyub və ya hansısa maraqlar var. Bəlkə də güzəştlər edilib, lakin bunu yalnız PFL bilir. Əks halda, tender keçirmədən, seçim imkanı yaradılmadan ən bahalı toplara niyə üstünlük verilsin ki?

Əvvəlki illərdə şərtlər daha yaxşı idi. PFL-in yaradıldığı ilk illərdə də seçim imkanı verilmirdi, lakin klublara daha ucuz qiymətə 50 top almaq məcburiyyəti tətbiq edilirdi, əlavə istəyənlərə şərait yaradılırdı. Daha sonrakı illərdə isə AFFA klublara topu pulsuz verirdi. Düzdü, o zaman da fərqli məqsədlər var idi, əvəzində UEFA-nın, FIFA-nın müxtəlif layihələrindən gələn pullar top biznesinə yönəldilirdi, sağ cibdən sol cibə ötürülürdü.

Amma PFL-in indiki qərarı da ədalətli deyil. Belə məcburiyyətlər bir qrup şəxsin biznes maraqların oxşayır. Seçimi özləri edib, qoyməti özləri müəyyənləşdirib və heç bir güzəşt tətbiq olunmadan “almalısız” tələbi qoyulur. Bəs, “Adidas” məhz bu brendi seçmək üçün hansı güzəştlər edib; hansı tenderdə qalib olub; niyə məhz 100 top tələbi?

Bu suallara PFL prezidenti Elxan Səmədovun cavab verməsi yaxşı olar. İndiyəqədərki fəalyyəti ilə yalnız tərif eşidən qurum rəhbərinin bu kimi məsələlərdə imicini darmadağın etməyəcəyinə ümid edirik. Yoxsa vəzifədə möhkəmlənəndən sonra biznes maraqları üzə çıxmağa başlayır?

FƏRİD

—————————————-XATIRLATMA

Qarşıdakı mövsümdə Premyer Liqa və əvəzedicilərin çempionatında çıxış edəcək komandaların üzvləri “Adidas” şirkətinin təsis etdiyi DÇ-2022-nin rəsmi topu olan “Al Rihla”dan yararlanacaqlar.

1-ci və 2-ci liqalarda çıxış edəcək klubların istifadəsinə isə başqa toplar veriləcək. Bu komandaların üzvləri “Adidas Tiro Pro”nu “qovacaqlar”.