PFL yeni sponsorluq müqaviləsi imzaladı

Peşəkar Futbol Liqası (PFL) yeni sponsorluq müqaviləsi imzalayıb.

Futbolinfo.az xəbər verir ki, qurum “Badamlı” ilə əməkdaşlığa başlayıb.

İmzalama mərasimində PFL-in vitse-prezidenti Aslan Şahgəldiyev, media və marketinq direktoru Sənan Abdullayev, “Badamlı”nın Bakı satış mərkəzinin müdiri Ramal Salmanov, şirkətin PR və Marketinq meneceri Elvin Babayev iştirak edib.

Aslan Şahgəldiyev yeni anlaşma barədə bunları deyib: “Artıq 3-cü sponsorluq müqaviləmizdir. Daha əvvəl “Misli” və “Buta” ilə anlaşmışıq. Hər üç şirkətə təşəkkürümüzü bildiririk. İstənilən sahədə uğurlu olmaq üçün maliyyə önəmlidir. Yeni anlaşmalar buna hesablanıb. Büdcənin doğru idarə edilməsi üçün də əlimizdən gələni edəcəyik. “Badamlı” ölkəmizdən kənarda da satış həyata keçirir, tanınır. Şirkətlə danışıqlarımız oldu və ortaq məxrəcə gəldik. Buna görə onlara təşəkkürümüzü bildiririk. Sponsorların çox olması azarkeşlərin də futbola marağını artıracaq. Ümid edirəm ki, bütövlükdə futbolumuz üçün düşərli olacaq. Ümid edirəm ki, təkcə bu mövsümlük deyil, davamlı olacaq”.

Şahgəldiyev “Badamlı” ilə müqavilənin detallarını da açıqladı: “Müqavilə 1 illikdir. Maliyyə şərtləri yəqin ki, hamını maraqlandırır. Konkret məbləğ deyə bilmərik, kommersiya sirridir. Bizə maliyyə köməklikləri olacaq. Düşünürük ki, hər iki tərəfi razı salacaq”.

PFL-in vitse-prezidenti şirkətin I Divizionda çıxış edən “Araz Naxçıvan”ın da sponsorlarından olması məsələsinə münasibət bildirdi: “Bizdə söz var ki, bir güllə bahar olmaz. İndi də deyə bilərik ki, bir su ilə bahar olmaz. Məncə narahat olmaq lazım deyil. İnsanlar bir-birinə insansa, daha yaxşı olar. Belə məsələlər əvvəllər də olub”.

Ramal Salmanov çıxış edərək, fikirlərini bildirdi: “Badamlı” olaraq idmanın bütün sahələrinin inkişafında maraqlıyıq. Hər zaman buna diqqət ayırırıq. İnşallah, hamımız üçün xeyirli-uğurlu olar. Əməkdaşlıq şirkətimizin 75 illiyinə təadüf edir. O gün olsun, PFL də bu yaşa çatsın”.