Premyer Liqanın gələcəyi ilə bağlı qərar nə vaxt veriləcək?

Belçika Peşəkar Futbol Liqasının ardından, Şotlandiya Peşəkar Futbol Liqası da çempionatların vaxtından öncə, başa vurulmadan tamamlanmasını və hazırkı turnir cədvəlinə əsasən çempionları müəyyən etməklə bağlı açıqlama verib.

Ancaq bu açıqlama eynən Belçikada olduğu kimi təklif xarakteri daşıyır.

Qüvvəyə minməsi üçün sorğu göndərilən 4 liqada yarışan ümumi 42 klubun 70%-nin təsdiqləməsi lazımdır. Şotlandiya PFL-i hazırda yarışların dayandırılmasını 10 iyunadək uzadıb və klublara müvafiq sorğuya cavab vermələri üçün 23 aprelədək şərti vaxt tanınıb.

Çünki Avropanın öndə gələn nəşrlərində çıxan məlumata görə, 23 apreldə UEFA İcraiyyə Komitəsinin iclası gözlənilir və bu iclasda əsas müakirə mövzusu yerli çempionatların taleyi olacaq.

Məhz bu iclasa görə Belçika PFL Direktorlar Şurasının təklifinin yerli Ali Assambleya çərçivəsində yekun qərara bağlanacağı 15 aprel görüşü də 24 aprelə təxirə salınıb. Onlar da UEFA İH-nin 23 apreldə keçiriləcək iclasından çıxacaq qərar və tövsiyələri gözləyirlər.

Məsələ ilə bağlı üzvü olduğumuz və UEFA-nın işçi qruplarında təmsil olunan EPFL(Avropa Peşəkar Futbol Liqaları) ilə əlaqə saxladıq. Onlar da 24 apreldə bütün üzv liqalarla videokonfrans vasitəsi ilə görüş keçirəcəklərini və UEFA İK-nin iclasında müzakirə olunacaq məsələləri, veriləcək qərarları bizə bildirəcəklərini söylədilər.

Yəni ümumi olaraq deyə bilərik ki, 23 aprel tarixi bu məsələdə həlledici rol oynaya bilər (Xatırladaq ki, UEFA bundan öncə 15 maya qədər gözləməyi məsləhət bilmişdi) Hələlik isə UEFA-nın son tövsiyələrinə əsasən çempionatın yarımçıq başa çatdırılmamasını bildirdilər.

Elgiz Abbasov (Peşəkar Futbol Liqasının Yarışların Təşkili Departamentinin rəisi)