“Qarabağ”ın itirdikləri: Vadji daha yaxşıdır

“Qarabağ” bu mövsüm avrokuboklara bəlkə də tarixinin ən komplektləşmiş heyəti ilə başladı. Təbii ki, buna ən güclü heyət deməyə haqqımız yoxdur.  Çünki bu komanda Çempionlar Liqasının qrup mərhələsində mübarizə apararkən daha sanballı heyətlə döyüşürdü. O zaman qapıçısından tutmuş mərkəz hücumçuna qədər hər şey daha yaxşı idi. Qurban Qurbanovun əlinin altında fərdi keyfiyyətlərə malik yüksək səviyyəli oyunçular toplaşmışdı.

Amma həmin heyətin komanda oyunu bumövsümkü qədər taxşı deyildi. O, “Qarabağ” rəqibinə boğucu pressinq tətbiq edə bilmirdi və s. “Lex”ə 5 qol vuran, “Ferentsvaroş” kimi komandanı Budapeştdə əzib keçən “Qarabağ” heç də bunu tam komplektləşmiş heyətin hesabına etmədi. Qurbanov əlinin altında yaxşı oyunçuları olmadan bunu reallaşdıra bilməzdi. Bu dəfə daha yaxşı ifaçılar var idi.

Daha güclü heyəti olan “Qarabağ”ın oyuynçularına ciddi yerlərdən təklif gəlmirdi. “Qarabağ”a bri oyunçuya görə 1,6 milyon və 5 milyon avro təklif etmirdilər. İndi isə onlara görə “elçi daşının üstündə oturanlar”ın sayı çoxalıb. Deməli, fərdiyətçi yox, sistem oyunçularına tələbat daha çoxdur. Bəli, mövsümün əvvəlində “Qarabağ”la birgə yola çıxan, sonra da “Qarabağ”dan yola çıxan İbrahima Vadji, Ovusu Kvabena və Kadi Borges həm kluba pul qazandırdı, həm də daha nüfuzlu klublarda oynamağa yollandı. Bəs, görəsən, ümidləri doğrultdularmı? Qısaca, nəzər salacağıq.

İbrahima Vadji 2022-ci il avqustun 30-da “Qarabağ”dan 1,6 milyon avro müqabilində “Sent Etyen”ə transfer olundu. Seneqallı hücumçu bu mövsüm Liqa 2-də 25 oyunda meydana çıxıb, 9 qol vurub və 1 məhsuldar ötürmə edib. 27 yaşlı futbolçu matçların 18-də start heyətində başlayıb.

Vadjinin Fransa klubu üçün necə vacib oyunçu olduğunu görmək üçün iki amilə nəzər yetirmək kifayətdir. Forvard cari mövsümdə komandanın ikinci bombardiridir və yalnız Jan-Filipp Krassodan geri qalır. Hansı ki, hələ 2020-ci ilin yayında “Sent-Etyen”ə keçib, icarələrdən sonra xeyli inkişaf edib və artıq komandanın vitse-kapitanıdır.

İbrahimanın “yaşıllar” üçün əhəmiyyətini göstərən ikinci məqam isə meydanda olduğu vaxt ilə bağlıdır. Hücumçu 2022/23 mövsümündə hələlik 1696 dəqiqə oynayıb. Bu, “Sent Etyen”də 6-cı göstəricidir. Eyni zamanda, seneqallı intizamı ilə də diqqət çəkir. Vadji cəmi 3 sarı vərəqə görüb ki, bu, “yaşıllar”ın ən çox dəqiqə meydanda olan 8 futbolçusu arasında 1-2-ci göstəricidir.

Vadjinin “Sent Etyen”də çox qısa müddətdə uyğunlaşmasını qeyd etmək lazımdır. Seneqallı Fransa klubuna keçidindən sonra artıq 2-ci oyunundan etibarən daim meydana çıxmağa başlayıb və sonrakı 8 matçda ilk “11-lik”də yer alıb. Hücumçu ümumən 25 görüşün 1-də əla, 4-də çox yaxşı qiymətlər alıb, “Soşo” və “Nyor” ilə oyunlarda statistik portallar tərəfindən ən yaxşı futbolçu seçilib.

Kadi Borgesin “Krasnodar”a mümkün keçidi ilə bağlı ilkin xəbərlər hələ ötən ilin dekabrın 25-də yayılsa da, transfer 2023-cü il yanvarın 13-də tamamlanıb.

Braziliyalı vinger məhsuldarlıq planında Vadji qədər yaxşı olmasa da, bunun obyektiv səbəbləri var. Birincisi, “Qarabağ”ın sabiq futbolçusu yeni komandasına mövsümün ortasında qoşulub, bu isə istər-istəməz uyğunlaşma prosesini bir qədər çətinləşdirib. İkincisi, Kadinin vinger, Vadjinin isə mərkəz hücumçusu olduğunu unutmayaq. Üçüncüsü, seneqallı bu mövsüm ümumiyyətlə zədələnməyibsə, braziliyalı Rusiya Premyer Liqasının iki oyununda ciddi xəsarətlər alıb. “Spartak”la matçda beyin silkələnməsi və çoxsaylı kəllə sınığı aşkarlanan Kadi mövsümü erkən başa vurub.

Bütün bunlara baxmayaraq, 27 yaşlı vinger Rusiya Kuboku da nəzərə alınmaqla, oynadığı 11 görüşdə 3 qol və 1 məhsuldar ötürməylə yadda qalıb. Maraqlıdır ki, Kadi hər 3 halda çempionatda toru silkələyib. O, özü üçün yeni liqanın artıq 2-ci matçında Moskva “Dinamo”su kimi çətin rəqiblə oyunda dubl edib. Braziliyalı futbolçu ekspertlərin rəyinə əsasən, həmin görüşün ən yaxşısı seçilib.

Düzdür, vinger sonradan bu yüksək tempini qoruya bilməyib, amma istənilən halda, layiqli təsir bağışlayıb. Bunu statistik portalların da göstərir: Kadi “Torpedo”, “Lokomotiv”, “Ximki” və “Nijni Novqorod” ilə matçlarda yaxşı qiymətlər alıb. Ancaq həmin görüşlərdə “Krasnodar”ın ümumən hücum xəttinin yüksək səviyyədə çıxışı qeyd olunmalıdır.

Ovusu Kvabena “Qarabağ”dan ayrılan “üçlük” arasında komandanı ən gec tərk edən olub. Qanalı hücumçu yalnız yanvarın 31-də “Ferentsvaroş”a keçib. Başqa sözlə, “transfer pəncərəsi”nin son günündə.

25 yaşlı futbolçu Vadji və Kadi ilə müqayisədə daha az fərqlənib. Amma bu da təsadüfi deyil. Axı, Ovusu yuxarıda qeyd etdiyimiz kimi, “Qarabağ”dan daha gec ayrılıb. Lakin bundan da böyük səbəb onun 2 ay – fevralın 5-dən aprelin 8-nə qədər zədələnərək yaşıl meydanlardan kənarda qalması olub. Kvabena bu müddət ərzində “Ferentsvaroş”da 7-si çempionat, 2-si isə Avropa Liqasının 1/8 finalı çərçivəsində Leverkuzen “Bayer”inə qarşı olmaqla ümumilikdə 9 matçı buraxıb. Bu da forvardın statistikasına təsir etməyə bilməzdi. Üstəlik, Macarıstan nəhənginin liqada böyük xal fərqi yaratdığına görə mövsümün sonlarına yaxın rahat oynaması da sözünü deyir.

Ovusu hələlik heç cür “Ferentsvaroş”un start heyət üzvünə çevrilə bilmir. Qanalı cəmi bir dəfə ilk “11-lik”də şans qazanıb ki, bu da son tura təsadüf edib. Budapeşt klubunun hələ də çempionatda ən yaxın izləyicisini 9 xal qabaqladığını nəzərə alsaq, Stanislav Çerçesovun eksperimentlərə əl atması gözləniləndir. Bu səbəbdən Kvabena son 4 turda daha çox əsas heyətə düşə bilər.

Hazırda Ovusunun “Ferentsvaroş”da meydana çıxdığı cəmi 6 oyunda 2 qolu var. Təəssüf ki, əsas statistik portallarının Macarıstan çempionatı ilə bağlı dərin statistika aparmadığına görə, qanalı hücumçunun qiymətləndirməsini izləmək qeyri-mümkündür. Ancaq komandanın baş məşqçisi hələ də ona çox güvənir.

FƏRİD