Qazaxıstanda növbəti sülh – rusiyalı şahmatçı öndədir

Qazaxıstanda şahmat tacı uğrunda matç davam edir. Bu gün Yan Nepomnyaşı və Din Lijen arasında 8-ci partiya oynanılıb. Bu dəfə ağ fiqurlarla çinli qrossmeyster mübarizə aparıb.

Xatırladaq ki, bu görüşə qədər Astanada hesabda öndə Nepomnyaşi idi.

Partiya başlamazdan əvvəl maraqlı xəbər hamını şoka salıb. İnternet şəbəkələrində Din Lijenin Nepomnyaşi ilə matça hazırlıq planı sızdırılıb. 2 ay bundan əvvəl qeydiyyatdan keçən “Fvitelli” və “Opqrstuv” akkauntları ilə hazırlıqlar aparılırmış. Xüsusilə də bu hazırlıq partiyaların debütü ilə əlaqədar olub.

Qeyd edək ki, 8-ci partiyada Din Lijenin debütü də həmin akkauntlardakı kimi olub. Sözsüz ki, bu xəbəri Nepomnyaşinin cəbhəsi də görüb. Belə olan halda Din üçün matçda uğur qazanmaq çətin olacaq. Çünki qısa müddət ərzində yeni debütlər planlamaq mümkünsüzdür. Planlaşdırılmışları isə Yanın komandası artıq təhlil etməklə məşğuldur.

Partiyanın özünə gəldikdə isə Dinin yenə də ilk gedişlərdə çox fikirləşdiyini görmək mümkündür. Xüsusilə də 17-ci gediş üçün o, 33 dəqiqə fikirləşib.

Lakin qarşıdakı vəziyyət onun maraqlı bir hücum planladığını göstərib. 23-cü gediş üçün isə Yan kifayət qədər düşünmək məcburiyyətində qalıb. Çox fikirləşməsinə baxmayaraq, rusiyalı şahmatçı səhvə yol verib. Bu səhvdən sonra şahmat taxtasında vəziyyət +5.3 Din Lijenin üstünlüyündən xəbər verib.

Bu vəziyyətdən sonra partiyanın taleyinin həll edildiyi gözlənilsə də, yenə hər şey səhvlər nəticəsində dəyişib. 25-ci gedişdə Din bütün üstünlüyünü əldən verib. Reqlamentə əsasən, 40-cı gedişdən sonra qrossmeysterlərə əlavə vaxt verilir. Din Lijen həmin gedişi vaxtının bitməsinə bir neçə saniyə qalmış edib. Ardınca bir qədər rahatlaşdıqdan sonra isə hücumunu davam etdirməyə çalışıb.

41-ci gedişdə tərəflər vəzirlərini dəyişdiriblər. Bu da partiyanın taleyini həll edib. Bundan sonra şahmat lövhəsində tam bərabərlik əmələ gəlib. Ağların bir piyadası çox olsa da, bunun elə də böyük əhəmiyyəti qalmayıb. Belə olan halda tərəflər sülhlə razılaşıblar.

Beləliklə, Nepomnyaşinin ümumi hesabda üstünlüyü davam edir – 4,5:3,5. Növbəti partiya sabah oynanılacaq.