Ölkə futbolu
Qomesin “intihar planı”
“Sabah”ın ehtiyatda qalan futbolçularından bir heyət düzəlt, normal məşqçiyə tapşır və azı avrokuboklara vəsiqə istə! Amma komandanın ispan baş məşqçisi Visente Qomes yüksək ödənişli, ölkə miqyasında ən bacarıqlılardan olan futbolçulardansa, aylardı tətbiq edə bilmədiyi utopik oyun sisteminə uyğun bildiklərini seçir və autsayderlər qrupunda lövbər salıb.
“Sabah”ın ümumi heyəti çox keyfiyyətlidi və sonuncu yerlərə layiq deyil. Klub rəhbərliyi hansı səbəblərdənsə məşqçiyə inanılmaz dəstək verir, o isə nağıllar danışaraq hamını aldadır. Ümid, vəd, proqnoz – Qomes bu məfhumların hamısını hörmətsiz edib. Son vaxtlar isə eyni sözləri işlədir: “Hər oyundan sonra rəhbərliklə görüşür, məsləhətləşirik”. Sanki klubu yükləyir, rəhbərliyi uğursuzluğa şərik edir və demək istəyir ki, bəyənmirlərsə, pulumu verib qovsunlar.
Ötən turun “Zirə”ylə oyunu kiçik ümid vermişdi. “Sabah” yaxşı təsir bağışlamış, qələbəni son anda əldən qaçırmışdı. Qomesin üçhəftəlik fasilə zamanı komandanı toparladığını, zamanla nəticənin də gələcəyini düşünmüşdük. Amma sən demə, bu, yalançı qığılcım imiş. Dünən “Səbail” alayarımçıq heyəti ilə rəqibinə dərs verdi, Aftandil Hacıyev Qomesi cibində gəzdirə biləcəyini göstərdi.
Bəli, hər iki qol fərdi səhvdən vuruldu, amma rəqibi buna məcbur etmək üçün də bacarıq lazımdı. Əvəzində “Sabah” 90 dəqiqə ərzində qapıya yaxın düşə bilmirsə, deməli, nəticə təsadüfi deyil, “Səbail” bu komandadan üstdə olmağa layiqdi.
Ola bilsin, klub rəhbərliyi Qomesdən razıdı, bu üzdən hətta ən ödənişli oyunçuları ehtiyatda saxlamasını ona bağışlayır, nəticəsizliyə dözür. Amma əmin olsunlar ki, milli komandanın 5-6 futbolçusunu, bacarıqlı əcnəbiləri incidən, onları ansambla çevirməyi bacarmayan məşqçinin heç bir perspektivi yoxdu. Daxili ab-havanı düzəltməyən “Sabah”ın bu tutumu intihardı.
“Qarabağ”da da nəticəylə bağlı sıxıntı var. Ağdamlılar 2 turdu qələbəyə həsrət qalıb, lakin komandanın oyunu qaydasındadı. Dünən Sumqayıtda hesab açılmadısa, meydan sahibləri buna görə qələbəyə sevinirmiş kimi sevinməlidi. Qonaqlar “kimyaçılar”ı topla döydü, sadəcə, lazım olan qolu vura bilmədi. Bu oyun tərzinin ardıcıl qələbələri gətirəcəyi şübhəsizdi.
Düzdü, bu, “Qarabağ” üçün bəhanə ola bilməz. Hər xal itkisi “Neftçi”nin çempionluğa inamını daha da artırır. Üstəlik, ağdamlıların heyət sıxıntısı çəkdiyi aşkardı. Dünən start heyətində cəmi 3 legioner olan “Qarabağ” zədəlilərinin bolluğu üzündən vacib xallar itirir. Bununla belə, komandanın göstərdiyi oyun elə növbəti turdan qələbə seriyasının başlayacağını deməyə əsas verir.
“Sumqayıt”a gəlincə, komanda məhdud imkanlarla lk “dördlük”də qalmaqda davam edir. Bəlkə də dünən bəxti gətirdi, amma “kimyaçılar”ın oynadığı futbolda üslub, məşqçi işi, ən əsası, futbolçularda istək aşkar görünür. “Sabah”da məhz bu amillər çatışmır.
CAVAD
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-29 08:00
Avrokuboka vəsiqə üçün vacib qələbələr: Sumqayıtda hakimlər də iş başında idi
- Ölkə futbolu2024-04-29 09:25
“Nitsa” Benzianı istəyir
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib