Qomesli Sabah

“Sabah”ın liderliyi təsadüf deyil. Hətta zirvəyə daha 2 şərikin olması da bakılıların nəticələrinə kölgə sala bilməz. İlk turda rəqib evində oynayan “Qarabağ” yox, başqa biri olsaydı, bəlkə də indi Visente Qomesin yetirmələrinin itkisiz irəliləməsidən yazırdıq.

İspan məşqçi “Sabah” üçün yaxşı seçilmiş baş məşqçidi. Klub bu posta doğru adamı təyin etmək üçün xeyli eksperiment apardı. Elşad Əhmədovdan İqor Ponomaryova kimi bir çox məşqçinin hətta ən bərbad qərarlarına da dözüldü, Jelko Sopiç kimi təsadüfi biri “sükan arxasına” əyləşdirildi. Yaxşı ki, xorvatın heç nəyi bacarmağını vaxtında anlayıb, müqaviləsinə xitam verdilər.

Qomes indiyəqədərki məşqçilərdən ən yaxşısıdı. Karyerasına diqqət yetirmədən də ispanın işgüzarlığını görə bilirik. Bunun üçün hazırlıq dövrünə, son 3 tura baxmaq bəs edir. Söhbət sınaq matçlarındakı və çempionatdakı uğurlu nəticələrdən getmir, “Sabah”ın oyununda sistem, taktiki düşüncə, kəsəsi, məşqçi işi görünür. Xüsisilə “Zirə” kimi dəlisov, emosional oyun tərzi tətbiq edən komandanı ağılla ram etmək nümunəsi Qomes haqda müsbət fikir söyləmək üçün kifayətdi.

“Sabah” balanslaşdırılmış komanda futbolu sərgiləyir. Topa daha çox sahib olmağa çalışırlar, lakin bunu “Qarabağ”dan fərqli olaraq, daha sürətlə reallaşdırırlar. Qomesin yetirmələri demək olar, bir yerdə dayanmır, topla və ya topsuz daim hərəkətdədilər. Ən böyük amil futbolçuların bir-birini yüksək bacarıqla sığortalamasıdı. Belədə rəqib üçün boşluq qalmır, hücumda və müdafiədə daha böyük qüvvə ilə mübarizə aparırlar.

Qomesin bəxti onda gətirib ki, rəhbərlik normal heyət təmin edib. Azərbaycan çempionatı üçün yaxşı səviyyədə legionerlər, milli komanda üzvləri, potensiallı gənclər – ispanın heyətdə rotasiya etmək, rəqibə görə oyun qurmaq üçün hər imkanı var. Təkcə “Zirə” ilə matçda Təmkin Xəlilzadənin ehtiyatda saxlanması faktı çox şeydən xəbər verir. Belə istedadlı milli üzvünü start heyətinə salmamaq bəlkə də dəlilik sayılar, lakin Qomes meydan sahiblərini ciddi analiz etmişdi.

“Zirə”nin cinah hücumlarının necə təhlükəli olduğunu bildiyindən hücuma aludə olan Təmkin yox, müdafiəyə daha çox diqqət yetirən Məhəmməd  Mirzəbəyov ilk dəqiqələrdən meydanda oldu. Və o, “qartallar”ın qanadlarını iflic etməyə yaradı. Hesab açıldıqdan sonra isə Təmkin əks-hücumlarda fayda verməsi üçün döyüşə atıldı. Eyni taktika sağ cinah hücumçusu Ramil Şeydayevlə bağlı da tətbiq edildi. Milli üzvü rəqibi haldan saldıqdan sonra oyuna buraxılan Kevin Kubemba məhz həmin cinahda şütüyüb ikinci qolu vurdu.

Qomes digər məşqçilərdən fərqli olaraq, transfer tələbini də qabartmır, əldə olan futbolçulardan maksimum faydalanır. Sopiçin israrla gətirtdiyi Mario Marinadan imtina ediləcəyi gözlənilirdi. Lakin ispan çalışdırıcı bu futbolçudan maksimum yararlanır, onun keyfiyyətlərini üzə çıxarır. Eyni sözləri arxaya ötürmə verməyi qadağan etdiyi Coşqun Diniyev haqda da demək olar. Məşqçi istedadlı yarımmüdafiəçinin hücuma daha çox diqqət göstərməsini istəyir. Nəticədə bu futbolçu “Qəbələ” ilə oyunda uzaqdan zərbə ilə hesabı açdı, “Zirə” ilə matçda isə buna yaxın oldu.

Ozan Can Kökcü üçün uyğun yer tapan Qomesin hücumla bağlı seçimləri də maraqlıdı. Xulio Sezar Rodriqesə mərkəz hücimçusu kimi “stavka” edən çalışdırıcı həm də Ramil Şeydayevi qazanmaqla məşğuldu. Milli üzvünə vinger kimi güvənən Qomes onun sürətindən, əzmkarlığından faydalanır. Hücumun sivri ucunda bir o qədər effektli olmayan Ramil də rolundan məmnundu – həm qol vurur, həm də çox faydalı işləyir. “Zirə” ilə matçda, epizodların birində onun Amin Seydiyevin səhvini sığortalamaq üçün cinah boyu necə geri qaçdığını görmək möhtəşəm idi. Adətən hücumçular bunu etmir, amma görünür, məşqçi Şeydayevi psixoloji baxımdan bu rola hazırlayıb.

“Sabah” bu gün lider olmasaydı da, bu yazı qələmə alınmalıydı. Qomesin məğlubiyyətləri, uğursuzluğu da olacaq. Əsas odur ki, seçim doğrudu və ispan məşqçi papağını günə verməyə gəlməyib, iş görməklə məşğuldu. Və işə doğru münasibət gec-tez nəticəsini göstərəcək. Qeyri-adi nəsə baş verməsə, “Sabah” növbəti mövsüm avrokuboklarda olacaq. Hətta bu komandanın çempionluq yarışında “Qarabağ”a bir nömrəli rəqib olacağını da iddia edə bilərik.

FƏRİD