Ölkə futbolu
Qonaqların uğursuz günü
“Turan Tovuz”un məğlubiyyətsiz oyunlar seriyası 6-ya çatdı. Düzdür, evdə qələbələr seriyası dayandı, amma “Neftçi” ilə oyunda qazanılan xal indiki durumda çox önəmlidir.
Bir ara hətta autsayder olması real görünən tovuzlular, ardıcıl xallar qazanmaqla möhkəm ortababa çevrilə bilib. Klub rəhbərliyi hər nə qədər hədəfin avrokuboklara vəsiqə qazanmaq olmadığını desə də, artıq bunun üçün real imkanlar var. Bir-iki uğurlu oyun ilk “dördlüy”ə yüksəlmək üçün yetərlidir. Düzdür, əksər komandalarla qüvvələr nisbəti bərabərdir, hər an hər şey dəyişə bilər. Lakin sabitlik davam edərsə, boyundan hündürə tullanmaq realdır.
“Neftçi”nin qeyri-sabit çıxışı da davam edir. Miodraq Bojoviç komandanın oyununa müəyyən nizam gətirsə də, heyətin həddindən artıq yaşlı olması, düzgün komplektləşdirilməməsi problem yaradır. Rəqiblər təzyiq göstərdikdə, sürəti artırdıqda “Neftçi”nin problemləri üzə çıxır. Necə ki, tovuzlular dünən bunu göstərdi. Qonaqlar son dəqiqələrdə uduza da bilərdi. Şəhriyar Əliyev bir metrdən qapını dəqiq nişan alsaydı, turnir cədvəlində daha qarışıq vəziyyət yaranardı.
Tovuzdakı heç-heçədən sonra günün ikinci matçında qalib gələn 4-cü pilləyə yüksələcəkdi. “Səbail”lə “Sabah”ın dueli isə hesabı açanın qalib olacağı matçlardan idi. Meydan sahibləri ikinci hissədə bunu bacardı, davamını gətirərək İqor Ponomaryovun gəlişi ilə yüksəlişə keçən “bayquşlar”ın işini bitirdi.
Misli Premyer Liqasında qeyri-müəyyənlik davam edir. Heç bir komanda qələbələri sıralaya bilmir, ona görə də orta sıralardakı yerdəyişmələr sıralanır. Bu baxımdan “Araz-Naxçıvan” – “Zirə” matçı da istisna təşkil etməyəcək. Qonaqlar uduzsa, hətta cari çempionatda ilk dəfə turnir cədvəlinin ikinci yarısına enəcək. 9 turdur qələbə qazanmayan qəsəbə təmsilçisi seriyanı qıracağı halda isə özünə gələcək.
FƏRİD