“Qurban Qurbanovun buna görə narahat olması başadüşüləndir”

“Qarabağ”ın müdafiəçisi Kevin Medinanın futbolinfo.az-a müsahibəsi

• “Kayrat”la matç barədə fikirləriniz necədir?
• Bizi ağır və çətin rəqibə qarşı oyun gözlədiyini bilirdik. Əvvəlcədən də məlum idi ki, rəqib belə qapalı futbol göstərəcək. Qeyri-adi bir şey baş vermədi və hətta gözlədiyimiz kimi oldu. Fiziki cəhətdən güclü rəqib idi, yaxşı baş məşqçiyə sahibdirlər. Biz də bu günlər ərzində rəqibin zəif cəhətlərindən necə istifadə etmək, müdafiə xəttini necə yarmaq barədə analizlər edib işləmişdik. Yekunda çətinliyə baxmayaraq, istəyimizə çatdıq.
• Penalti epizodunda özünü günahkar sayırsan? Çünki rəqibin hücumçusu səni keçdi və nəticədə Şahruddin Məhəmmədəliyev penaltiyə səbəb oldu…
• Burada ya heç kimdə günah yoxdur, ya da hamıda var. Gəlin konkret günahkar axtarmayaq, biz bir komandayıq və hər şeyə birlikdə nail oluruq. Top bir dənədir və hər iki komanda buna sahib olmaq, qol vurmaq uğrunda mübarizə aparır. Hər hansı səhv olursa, bu komandanın səhvidir. Futbol kollektiv oyundur, kompakt oynayan bir komandayıq. Günahkar axtarmaq doğru deyil. Başqa cavab da yoxdur, hər şey bir komandaya aiddir.
• Sizcə, bu rəqiblə səfər matçı daha ağır olacaq?
• Bakıdakı matç da çox ağır oldu, səfərdə daha çətin olacaq. Düşünürəm ki, rəqib eyni tərzdə oynayacaq. Üstəlik, doğma meydan amilinə görə onlar daha istəkli olacaq, motivasiya yüksək olacaq. Öz meydanlarında qapanıb əks-hücumda uğur axtaracaqlar. Fikrimcə, bu, onlarda heç də pis alınmır. Bizə qarşı oyunda ilk hissədə əks-hücumları yaxşı yerinə yetirirdilər. İkinci hissədə isə biz vəziyyəti dəyişdik. Bu, artıq başqa söhbətin mövzusudur. Bizi Qazaxıstanda çətin oyun gözləyir. Səfərdə komandaya daha çox motivasiya lazım olacaq.
• Hər kəs düşünür ki, “Qarabağ” mərhələnin taleyini 70 faiz həll edib. Sən necə fikirləşirsən?
• Mən elə düşünmürəm və fikrimcə, qarşıdakı matçlar da vacibdir. Hələ heç nə demək olmaz. Növbəti matçlara ciddi yanaşmaq lazımdır.
• Ümumiyyətlə, qrupdakı bütün oyunları komanda yüksək səviyyədə və tempdə keçirib. Bu cür davam etməyə güc çatacaq?
• Baş məşqçimiz bizə meydanda bir döyüşçü kimi mübarizə aparmağı öyrədir. Bunun üçün təbii ki, komandaya güc lazımdır. Qurban Qurbanovun dediklərini yerinə yetirmək üçün məşqlərdə səylə çalışırıq. Təkcə, fiziki güc yetərli deyil, həm də mental cəhətdən hazır olmalıyıq. Baş məşqçi və məşqçi heyəti bizi mental olaraq qidalandırır. Hər iki cəhətdən hazır olmaq çox önəmli elementlərdir. Onlardan biri çatışmayanda işlər istədiyin kimi getmir. Dünya futbolunda az komanda var ki, yüksək tempdə uğurlu çıxışı saxlasın. İstənilən halda mövsüm ərzində eniş olur. Amma biz əzmlə çalışırıq ki, bu uğurlu tempi mümkün qədər uzun müddət saxlayaq.
• Qurban Qurbanov məğlubiyyətsizlik seriyasından narahat olduğunu bildirmişdi. Sənin fikrincə, belə seriya komandada özüninam yaradır, yoxsa arxayınlıq?
• Belə seriya özünəinamı artırır, gücümüzə güc qatır. Bu müsbət haldır və komandanın doğru yolda olmasının göstəricisidir. Yəni görünür ki, məşqçi heyətinin tapşırıqlarını yerinə yetirə bilirik. Mənfi tərəfi də odur ki, bir az arxayınlıq yarada bilər. Elə bir şey mümkündür. Amma baş məşqçimiz bu baxımdan o qədər bu işin öhdəsindən ustalıqla gəlir ki, komandanı “boşalmağa” qoymur. Onun bu baxımdan narahat olması başadüşüləndir. Məhz Qurban Qurbanovun döyüşçü ruhu yaratması imkan vermir ki, arxayınlıq yaransın.
• Sıx təqvimdə oynayırsınız. Üstəlik, “Kayrat”la matçdan öncə “Neftçi” ilə ağır qarşılaşma olacaq…
• İlk baxışdan təqvim çətin görünür, hardasa hər 4 gündən bir oynayırıq. Yorğunluq olur, bərpa prosesi keçirik, asan deyil. Komandamız mənəvi olaraq belə təqvimə öyrəşib. Bizi iki çətin qarşılaşma gözləyir, amma mən qarşıdakı “Səbail”lə matçı ağır adlandırardım. Çünki süni meydançada oynayacağıq və ağır olacaq. Rəqib futbolçular buna alışıblar. Belə vəziyyətdə bizim üçün daha çətin olacaq. İstənilən halda hər hansı bir futbolçu həyəcanlı oyunlarda iştirakçı olmaq istəyir. Şəxsən mənim üçün 4 gündən bir oynamaq xoşdur. Ümdi edirəm ki, qarşıdakı sıx təqvimə baxmayaraq, komanda lazımi nəticəni qazanacaq.

CAVAD