Riskli təyinat: Regekampf uğursuz seçim deyil

“Neftçi”nin yeni baş məşqçisi ilə bağlı birmənalı fikir bildirmək çətindi. Laurentsiu Regekampf daha çox sirli qutudu – onun məşqçi vizitkasında xoş olmayan məqamlar da var, uğurlu olacağına ümid verən nüanslar da.

Önyarğılı olmaq, bəri başdan tənqid etmək ən asan işdi. Bəli, rumınlarla bağlı xoş xatirələrimiz azdı. İstər futbolçu, istər məşqçilərin timsalında maliyyə dağıntısıyla bağlı kifayət qədər misal çəkə bilərik. Belələri “Neftçi”də də olub, digər klublarımızda da. Əksəriyyəti daha çox pul qazanaraq böyük fayda verməməsiylə ad çıxarıb. İstisnalar da var – işiylə, oyunuyla xoş xatırlananları da tapmaq olar. Rumınlarla bağlı ümumi mənzərə isə xoş deyil.

Lakin dövr dəyişib, rumınlar vaxtilə Azərbaycanda ancaq pul qazanmağı düşünərkən onlara bu şəraiti yaradanlar da qınanmalıdı. Çünki Mirça Rednik kimi işiylə ad qoyan, Adrian Pit, Adrian Skarlatake kimi oyunuyla yaddaşlarda qalanlar da var. Marian Aliuta, Adrian Nyaqa, Dorinel Muntyanu kimi uğursuz nümunələrə rəğmən…

Bəli, “Neftçi”də daha adlı-sanlı, tanınan məşqçi gözləyirdik. Amma indi işi ad-san, keçmişdəki xidmətlər görmür. Canni de Byazi, Berti Foqts və başqalarıyla bağlı yaşananlar dərs olmalıdı.

Ərtuğrul Sağlamla Viktor Qonçarenkonun gətirilməməsi bəlkə də “Neftçi”nin uğurudu. Bu məşqçilər də vaxtilə qazandığı uğurun kölgəsindədilər, davamını gətirə bilmədilər. Ona görə də Laurentsiu Regekampfın təyinatı sözügedən məşqçilərlə müqayisədə daha doğru addımdı. Enerjili, uğura ac biri Bakı klubuna daha çox lazımdı, nəinki Sağlam və ya başqası.

Rumının sürpriz təyinatı haqda qəti fikir bildirmək olmur. “Neftçi” rəhbərliyi bu məşqçini digərləriylə söhbətlər alınmadığı üçün B planı kimi seçə bilər. Bəlkə də əvvəldən danışıqlar onunla aparılıb, sadəcə, digər adlarla hədəf yayındırılıb. Hər halda, son anadək bu məşqçinin adı ümumiyyətlə, gündəmdə olmamışdı.

Regekampf Bakıya 7 kubokla gəlir. “Styaua” ilə Rumıniya çempionatının (2013, 2014), Superkubokunun (2013) və Liqa Kubokunun (2016) qalibi olması, 2012/2013 mövsümündə UEFA Avropa Liqasının 1/8 final mərhələsinədək irəliləməsi təsadüf ola bilməz. “Styaua”nı UEFA Çempionlar Liqasının qrup mərhələsinə daşıyan 46 yaşlı mütəxəssis “Əl Hilal”la 2014-cü ildə Asiya Çempionlar Liqasının finalına yüksəlib, 2015-ci ildə isə Səudiyyə Ərəbistanının Şahzadə Kubokunda 2-ci yeri tutub. O, “Əl Vəhdə” klubu ilə BƏƏ Super Kubokunun (2017, 2018) və Liqa Kubokunun (2018) qalibi olub, BƏƏ çempionatında 2-ci yeri tutub (2018).

“Neftçi”nin sükançısının karyerasında xoşagəlməz məqam həddindən artıq çox klub dəyişməsi və bir yerdə uzun müddət qərar tutmamasıdı. Yəqin ki, səbəblər aydınlaşdırılıb və yekun qərar verilib, çünki o, 2 il işlədiyi “Styaua”da uğurlu olub. Bəlkə də “Neftçi” elə bu səbəbdən bu məşqçi ilə ikiillik müqavilə bağlayıb.

Regekampfın ən böyük problemi şəxsi həyatı ilə bağlıdı. Detallara varmaq istəmirik, lakin xüsusilə Rumıniya mətbuatında onunla bağlı xoşagəlməz yazılar həddindən artıq çoxdu. Müəyyən hissəsi həqiqət ola bilər, lakin bu söz-söhbətlərin daha çox sabiq həyat yoldaşı, məşhur, eyni zamanda qalmaqalçı menecer Anamaria Prodanın “əl işi” olması da mümkündü. Qadın qısqanclığı, qisas hissi və s. Əks halda, indiki ailəsi ilə da bağlı problemlər yaranardı. Halbuki 2 övlad atası olan Regekampfın bu baxımdan normal həyat yaşadığı görünür.

Bütün bunların həqiqətə nə qədər yaxın olduğnu zaman göstərəcək. Bircə o dəqiqdi ki, Laurentsiu bu qədər yolunu azmış biridisə, zamanla işsiz qalmalı idi, klublar ona etimad göstərməməliydi. Lakin rumın məşqçi daim iş başında olub, deməli, yazılanlarda şaiyə payı az deyil.

İstənilən halda, zaman hər şeyi göstərəcək. Zatən problemli biri olsa, bu məşqçinin “Neftçi”də uzun müddət qalması mümkün olmayacaq. İndi daha çox onun nələr etmək istədiyini müşahidə etmək lazımdı. Müşahidə Şurasının onlayn müzakirəsi ilə təyin edilən məşqçinin fəaliyyətini canlı izləməklə hər şeyi görəcəyik. İlk transfer həmlələri, ilk seçimlər, ilk açıqlamalar, ilk addımlar hər şeyi aydınlaşdıracaq.

“Neftçi”nin ideal namizədi tapdığını yaza bilməyəcəyik, lakin ən uğursuz seçim də deyil. Bəli, riskli təyinatdı, amma işə düzgün yanaşma, nəzarət sayəsində bütün problemləri yoluna qoymaq olar. Ən yaxşısına ümid edək, çünki Bakı klubundan gözləntilər maksimumdu və yeni komanda quruculuğunda ilk addımlar atılır.

FƏRİD