Rövlan Muradov: “Sağlam ruhlu komandamız var”

“Bizim bir ailə kimi möhkəm, sağlam ruhlu komandamız var. Şükür ki, öz oyunumuzu göstərib vacib xallar qazana bilirik. Sevinirəm ki, “Sumqayıt”la oyunda da bu baş verdi. 0:2-dən geri dönüş edib qalib gəldik. Bu, birliyimizin sayəsində oldu”. Bunu futbolinfo.az-a açıqlamasında “Qəbələ” yarımmüdafiəçisi Rövlan Muradov deyib.

Gənc futbolçu Misli Premyer Liqasının 31-ci turunda “Sumqayıt”a 3:2 hesabı ilə qalib gəldikləri oyundan danışıb. O, daha sonra “Azərbaycan kubokundan, yoxsa Premyer Liqadan avrokuboklara vəsiqə qazanmaq asandır” sualına cavab verib: “Heç biri rahat deyil. Tam səmimi deyirəm ki, iki cəbhədə də vuruşuruq. Nə qədər çətin olsa da, əlimizdən gələni etməyə çalışırıq. Kubokda finala vəsiqə qazanmaq istəyirik. “Səbail”lə cavab görüşü də çətin keçəcək. Bütün fikrimiz bu matçdadır”.

Muradov Azərbaycan kubokunun yarımfinalının ilk matçında “Səbail”lə, həmçinin Premyer Liqanın 31-ci turunda “Sumqayıt”la oyunda 0:2  geri düşdükdən sonra hesabı 3:2 etmələrinin gözlənilməz olduğunu bildirib: “Gözlənilən deyildi. Çünki ciddi hazırlaşmışdıq, ağır olacağını bilirdik. Bu, futboldur və belə hallar baş verir. Hər bir gedişata hazır olmalıyıq”.