“Sabah”ın sabiq məşqçisinin ölkədən çıxışına qadağa qoyulub: “O pulu ödəyəcəm, amma…”

“Sabah”ın sabiq baş məşqçisi Jelko Sopiçin Azərbaycandan çıxışına məhdudiyyət qoyulub. Onun barəsində Bakı Kommersiya Məhkəməsi qərar çıxarıb.

Belə ki, dövlət büdcəsinə olan 4600 manat vergi borcunu ödəmədiyi üçün Sopiçin ölkəni tərk etməsi qadağan edilib. Onun barəsində Dövlət Vergi Xidməti tərəfindən qaldırılan iddia hakim Leyla Əliyeva tərəfindən təmin olunub.

Amma xorvat mütəxəssis hazırda Azərbaycanda deyil. Qanunlarımıza görə, ölkədə olmayan şəxsin çıxışına məhdudiyyət qoyulursa, həmin şəxs hər hansı vaxt Azərbaycana gələrsə, onun ölkədən çıxışı qadağan edilir.

Məsələyə aydınlıq gətirməsi üçün 2019-2020-ci illərdə “Sabah”ın baş məşqçisi olan Sopiçlə danışdıq. Futbolinfo.az-a açıqlama verən mütəxəssis qərarı başa düşmədiyini deyib: “Həqiqətən mən bunu başa düşmürəm. Mən Azərbaycanda olanda bütün vergilərimi ödəmişəm. Nə maaş almışamsa, hamısı rəsmi olub. İndi üstündən bir neçə il keçdikdən sonra xəbər çıxır ki, orada vergi borcum yaranıb. Mən başa düşmürəm ki, bu nədir. Əgər belədirsə, problem yoxdur. Mənim heç zaman vergi ilə bağlı problemim olmayıb. Orada dostlarım var, soruşa bilərsiniz. Heç vaxt belə şey etməmişəm. Kimsə edib bilmirəm, amma indi mənimlə əlaqə saxlayıb deyirlər ki, 4 min manat ödəməlisən”.

Sopiç istənilən halda, problemi aradan qaldıracağını deyib: “Mən o borcu ödəyəcəm. Onlara 4 min manatı göndərəcəm. Amma orada olduğum müddətdə harda səhv etdiyimi, niyə vergi borcu yarandığı barədə mənə sənəd göndərilməsini tələb edəcəm. İzah etsinlər görüm mən nə etmişəm? Yaşadığım bütün ölkələrdə rahat olmuşam və vergilərimi ödəmişəm. Əminəm ki, məhkəmə səhv etməyib. Amma səhvin harada olduğunu bilmək istəyirəm. Pulu ödəyəcəm. Bu qədər”.

FƏRİD