Ölkə futbolu
“Sabah”ın Sumqayıt məşqi
Misli Premyer Liqasında 34-cü tur komandaların turnir cədvəlindəki mövqeyinə təsir etmədi. Rəqiblər arasında xal fərqi dəyişsə də, hamı yerində qaldı.
“Qarabağ”ın çempion olduğu turda gümüş medal alacağı dəqiqləşən “Sabah” 3-cü olan “Neftçi” ilə xal fərqini 18-ə çatdırdı. Laurentsiu Regekampfın yetirmələri ağdamlılardan isə hazırda 25 xal geridədir. Bu, autsayderlərin mövsüm ərzində topladığı xal qədərdir.
“Zirə”nin Konfrans Liqasına vəsiqə qazanmaq üçün kiçik ümidləri qalıb. “Qəbələ”nin gözlənilməz məğlubiyyəti ilə hələ də 4-cülüyə ümid edən qəsəbə təmsilçisinə bu imkanı 6-cı pilləni özü üçün təmin edən “Turan Tovuz” verdi.
Turun bağlanış matçı dünən reallaşdı. “Sabah”ın “Beşiktaş”la xeyriyyə matçına görə “Sumqayıt”la matç ertələnmişdi. “Kimyaçılar”ın bu qarşılaşmada yorğun rəqibi udub, ən azı heç-heçə edib elitada yerini təmin etməsi mümkün idi. Lakin qonaqlar qarşılaşmanı məşqə çevirə bildi. İlk hissədə 3 cavabsız qol vuran “Sabah” fasilədən sonra darmadağını rəsmiləşdirdi.
“Sumqayıt”ın məğlubiyyətini gözlənilən saymaq olar. Hər halda, rəqibin güclü “Sabah” olması qeyd edilməlidir. Lakin doğma azarkeşlər önündə Samir Abasovun yetirmələrinin bu qədər bərbad oynaması rüsvayçılıqdır. Hətta qapı dirəkləri “Sumqayıt”a futbolçularından daha çox xeyir verdi – 2 dəfə qolun qarşısını aldı.
İndi əminliklə demək olar ki, “Sumqayıt” Premyer Liqada qalacaqsa, Tural Qurbanov – Elçin Məsiyev cütlüyünə minnətdar olmalıdır. 32-ci turda “Kəpəz” üzərində səfər qələbəsi bu iki hakimin (biri baş hakim, digəri VAR hakimi) sayəsində reallaşdı. Həmin 3 xalı sumqayıtlıların hesabından çıxsaq, indi Abasov canı ilə əlləşirdi.
Samir bəyin dünənki mətbuat konfransında dedikləri də başqa bir səbəbdir. Yaxşı oynamadıqlarını etiraf edən çalışdırıcın sözlərini həftənin sitatı saymaq olar: “Bizə özümüzdən çox rəqiblərin nəticələri elitada qalmağa kömək edəcək. Öz oyunumuzu bilirəm və buna görə deyirəm”.
Beləliklə, son iki tur formal xarakter daşıyacaq. “Qəbələ” ilə “Zirə”nin avrokuboka vəsiqə uğrunda qiyabi mübarizəsi bəlkə də elə növbəti tur yekunlaşacaq, kiçik ümidlər sona yetəcək. Yalnız “Səbail”lə “Şamaxı” çempionatda intriqanın tam bitməsinin qarşısını alır. Bəlkə mövsümün sonunda AFFA İcraiyyə Komitəsinin qərarı onların da boşuna əsəb xərclədiyini aydınlaşdıracaq.
CAVAD
- Ölkə futbolu2024-04-25 17:10
Klublar çətin vəziyyətdə: AFFA yardımları dondurub
- Ölkə futbolu2024-04-26 08:00
Juninyo – Avropanın ən yaxşı braziliyalısı
- Ölkə futbolu2024-04-26 09:08
“Qarabağ”ın ildən-ilə böyüməsi məni qətiyyən təəccübləndirmir”
- Ölkə futbolu2024-04-26 10:17
Samir Abasov Laporta ilə görüşdü