“Qəbələ” axtarır, “Sabah” xal yığır

Premyer Liqada 2-ci tur darmadağınla bitdi. “Sumqayıt”ın gözlənilməz qələbəsi ilə başlayan həftədə xala həsrət qalan yeganə qonaq “Qəbələ” oldu. “Sabah” aşkar üstün olduğu oyunda vurduğu 3 qola görə bəxtə də minnətdar olmalıdı.

Bir gün öncə “Zirə” “Səbail”i yenib zirvəyə şərik olmuşdu. Amma həmin oyunun üzərində çox dayanmağa dəyməz. Faktiki “aclar”la “toxlar”ın oyununda bu ll 14 (!) transfer etmiş “qartallar”ın üstün olacağı proqnozlaşdırılırdı. Baxmayaraq ki, qonaqlar bunun üçün çox əziyyət çəkdi, aşkar üstün futbol oynamadı. Hətta hesab 1:0 “Zirə”nin xeyrinə olarkən Raif Əliyev penaltini dəqiq yerinə yetirsəydi, indi üçhakimiyyətlilikdən danışmaya da bilərdik. Oyunçu qıtlığından əziyyət çəkən “Səbail”in istədiyi oyunçunu almaqda problem yaşamayan “Zirə”yə müqavimət göstərməsi özü böyük uğurdu.

Turun son matçına gəlincə, “Sabah” layiq olduğu qələbəni qazandı. Düzdü, komanda favoritə yaraşan futbol sərgiləmədi, bəzi məqamlarda oyunda axsamalar diqqət çəkirdi. Amma bu, bəlkə də asan qolların yaratdığı arxayınlığa görə idi. Bakılılar bütün qolları xüsusi əziyyət çəkmədən vurdu. Ad günündə özünə qol hədiyyə edən Coşqun Diniyevin uzaqdan zərbəsi zamanı qapıçı Anar Nəzirov təcrübəsinə yaraşmayan səhv etdi; 2-ci qolda Bəhlul Mustafazadə göydəndüşmə şansı “təpikləməklə” fərqləndi; Ramil Şeydayev isə Asif Məmmədovun geriyə ötürmədəki yanlışını dəyərləndirdi.

Amma “Sabah”ın oyunçularının yorğunluğu da başadüşüləndi. Start heyətindəki 6 futbolçu milli komandaların düşərgəsindən dönmüşdü, üçü qısa müddətdə 2 oyun keçirmişdi. Komandanın oyununun bu futbolçulardan böyük ölçüdə asılı olduğunu nəzərə alsaq, 3:0 hesablı qələbə əla nəticədi.

“Qəbələ”nin cəmi 1 xal sahibi olması isə klub strategiyasından qaynaqlanan səhvlərin nəticəsidi. Büdcə problemlərinin gec həll olunması transferlərin yubanmasına səbəb oldu və heyətin komplektləşməsi prosesi hələ də başa çatmayıb. Təsadüfi deyil, 4-ü əcnəbi olmaqla 5 futbolçu transfer edən komandanın baş məşqçisi Elmar Baxşıyev hücumçuya ehtiyacları olduğunu hələ indi anlayır. Halbuki artıq 8 əcnəbiylə anlaşma rəsmiləşib, limiti nəzərə alsaq, daha birinin gəlməsi hər tur 3 legionerin kənarda qalması demək olacaq. Bu, büdcəylə bağlı narahatlığın olduğu bir zamanda heyət planlamasının düzgün aparılmadığını göstərir.

Akademiyayla bağlı fəaliyyətinə görə daim təriflədiyimiz “Qəbələ”də təəssüf ki, əsas komandayla bağlı işlər düzgün qurulmayıb. Klub prezidenti Fariz Nəcəfov yetirmələrini satmaları ilə tez-tez öyünür. Lakin böyük klublar belə davranmamalıdı. “Qəbələ” faktiki sabahını satmaqla məşğuldu. Dünən keçmiş klubuna qol vuran Bəhlul, 90 dəqiqə rəqib düşərgədə döyüşən Amin Seydiyevi əldən verən klub əvəzində təqaüd yaşındakı Asifi, Anarı düşərgədə saxlayıb. Halbuki bu gənclərlə legionerin vəhdətindən daha yaxşı komanda qurmaq olardı.

Bəlkə də alış-verişin kimin üçünsə xüsusi önəmi var, amma bu futbolçuları 120-150 min manata satmaq, onların yerinə daha baha qiymətə gətirilən əcnəbini oynatmaq özü müəmmadı. Düzdü, yenə heyətdə gənclər var, lakin bu transferlərdəki səmərəni anlamaq olmur. Deyək ki, 3-4 min manat maaş verdiyin Seydiyevi 120 minə satırsan, amma əvəzinə illik 200 min maaş alan hansısa əcnəbini gətirirsən. Bu, strategiya deyil, futbolla oynamaqdı.

3-4 əcnəbi alınsaydı, başa düşmək olardı, say həddi keçirsə, deməli, başqa maraqlar var. Həmin maraqlardan biri də Yaovi Akakpoyla bağlıdı. 2 ildi ehtiyatda oturmaqla məşğul olan birinin komandada saxlanması məntiqsizdi.

Hər nə edirlərsə, özləri bilər. Amma transferlərin çempionat başlayandan sonra da davam etdirilməsi doğru deyil. Baxşıyev az qala mövsüm boyu əsas heyəti müəyyənləşdirməklə, yeniləri komandaya uyğunlaşdırmaqla məşğul olur. Yekunda – ötən mövsüm olduğu kimi – sonuncu yer qaçılmaz olacaq. Və bu nəticədən sonra yenə heyət dəyişəcək, legionerlər qalmaq istəməyəcək. Beləcə mövsümlər dəyişdikcə karusel fırlanacaq, işi düzgün planlamayan klubun nəticələri yaxşılaşmayacaq.

Bu, təkcə büdcəylə bağlı problem deyil. Heydərovlar kluba ciddi nəzarət edərkən “Qəbələ”də belə xaos olmazdı. İndi “özfəaliyyət” daha qabarıq görünür. Baxşıyev pis məşqçi deyil, müəyyən dəst-xətti var, komandanı nizamlayacaq. Lakin o zamana qədər rəqiblərlə ciddi xal fərqi yaranacaq.

FƏRİD