Ölkə futbolu
“Sumqayıt”ın Ağayev saxtakarlığı: “milliləşdirilmiş” futbolçunu yığmaya niyə gətirmək olmur?
AFFA millimizə yeni futbolçular cəlb etməkdə qərarlıdı. Namizədlər bəllidi, millinin baş məşqçisi Canni de Byazi onları izləmək, özləriylə söhbətləşmək üçün Türkiyəyə də yollanmışdı.
Ukraynanın “Minay” klubunun şərəfini qoruyan Anatoli Nuriyevlə Rüstəm Əhmədzadə tezliklə millimizin formasını geyəcək. Ölkəmizlə bağlılığı olan bu futbolçuların verəcəyi xeyirlə bağlı ciddi şübhələrimiz var, lakin Azərbaycana dəxli olmayan anqolalı Eddi İsrafilovdan, qazaxıstanlı Dmitri Nazarovdan, nigeriyalı Usim Ndukadan, braziliyalı Ernani Pereyradan, Leandro Qomeşdən, Andre Ladaqadan, türkiyəlilərdən, dağıstanlılardansa, ən azı azərbaycanlı soyadı daşıyanlara üz tutulması müsbət məqamdı.
Əldə etdiyimiz məlumata görə, bu futbolçularla danışıqlar yekunlaşıb, sənədləşmə işlərində ciddi problem yoxdu. Həll edilməsi vacib olan kiçik detallar yoluna qoyulduqdan sonra hər ikisi millini növbəti toplanışına çağırılacaq. Martda həm Anatoli, həm də Rüstəm de Byazinin rəhbərliyi altında ilk məşqə çıxmalıdı.
Rusiyanın “Ximki” klubunun formasını geyən Kamran Əliyevlə bağlı isə eyni sözləri yaza bilməyəcəyik. Bu futbolçu millimizdə oynadıqdan sonra Rusiyada legioner sayılacaq, klubunda heyətə düşməsi çətinləşəcək. Ona görə də Kamran AFFA-nın təklifini geri çevirib, danışıqlar prosesi uzanacaq.
AFFA-nın bir ildi milliləşdirmək istədiyi Əmir Ağayevlə də bağlı xəbər var. “Sumqayıt”da oynamış israillinin ölkəmizə bağlılığını sübut etmək üçün zəruri sənədləri tapmaq mümkün deyil. Bu səbəbdən hələ ötən il adı millimizə çağırılanların siyahısına düşən, amma son heyətdən çıxarılan Ağayevin məsələsi gözləmədədi. Güman ki, zəruri arxiv sənədlərini tapıb, onun Azərbaycana bağlılığını sübut etmək mümkün olmasa, Əmir yığmamızda görünməyəcək.
Lakin bu yerdə bir məqam maraqlıdı: indiyədək Əmirin azərbaycanlı olduğunu sübut mümkün olmayıbsa, legionersiz çıxış etdiyini car çəkən “Sumqayıt” onu necə milliləşdirib yerli oyunçu kimi oynadırdı? Deməli, klub saxtakarlığa yol verib. Və “kimyaçılar”da tezbazar milliləşdirilənlərin sayı kifayət qədər çoxdu. Məsələnin üstünə düşülsə, bəlkə “Sumqayıt”ın limiti pozduğunu da aşkarlamaq olar.
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?