Şuşa Azərbaycanın mədəniyyət paytaxtdır

İllərlə həsrətində olduğumuz Şuşa gündən-günə dirçəlməkdədir. İşğaldan qurtulduqdan sonra orada təşkil edilən mədəniyyət tədbirləri ölkənin əsas prioritetlərindən biridir.

Məsələ şəhəri təkcə işğaldan azad etmək deyil, həm də onu yaşatmaqdır. Uzun illər erməni işğalı altında olarkən mənfur düşmən şəhərlərimizi nəinki yaşatmayıb, əksinə dağıdıb. Onların yanında bir qədər Şuşa bəxtli çıxıb. Lakin yad insanların nəfəsi ayrı, doğmaların qayıdışı tamam ayrı şeydir.

Qısa müddət ərzində Şuşada xeyli sayda incəsənət tədbirləri və konsertlər baş tutub. Lakin idman yarışlarının reytinqi incəsənət və mədəniyyət tədbirlərindən heç də geri qalmır. Hətta dünya miqyasında onu qabaqlayır. Bu baxımdan gözəl şəhərimizi bütün dünyaya Şuşi kimi deyil, Şuşa kimi tanıtmaq üçün idmanın da bu təbliğata qoşulması vacib idi.

Nəhayət, son günlər bu sahədə irəliləyişlər görürük. Əvvəlcə “Əziz Şuşa” adlı beynəlxalq veloturun təşkili, indi də 3×3 basketbol üzrə dünya seriyasının mərhələ yarışı sevindirici məqamlardandır.

Doğrudur, Şuşa tarixən heç vaxt idman şəhəri olmayıb. Bunun üçün əlverişli infrastruktur yaratmaq da çətindir. Amma bəzi idman növləri var ki, onların Şuşada keçirilməsi təbiəti və tarixi ilə həmahəng olar. İlk növbədə ağla polo və ya çövkan gəlir. Ondan da daha maraqlı və cəlbedici oxatma yarışı ola bilər.

Son illərdə beynəlxalq federasiyalar təkcə 4 ildən bir Olimpiadalarda görünməmək, daim diqqət mərkəzində olmaq üçün kommersiya turnirləri təşkil edir. Onlardan da biri Beynəlxalq Kamandan Oxatma Federasiyasıdır. Şəhər mərkəzlərində, ekzotik yerlərdə təşkil edilən turnirlər məşhur Eurosport kanalı ilə də canlı yayımlanır.

Nəzərə almaq lazımdır ki, bu federasiyanın prezidenti türkiyəli Uğur Erdenerdir. Onun prezident olması işimizi müəyyən qədər asanlaşdıra bilər. Bu cür turnirlərin keçirilməsi Şuşanın sonluğunu dünyanın gözündə birdəfəlik “İ” hərfindən qurtarar.

İLQAR AĞAYEV

Yazı Azərbaycan Respublikasının Medianın İnkişafı Agentliyinin maliyyə dəstəyi ilə hazırlanıb.

Sahə: Uşaq və gənclərin fiziki və mənəvi inkişafında idmanın rolu

P.S.: İdman təkcə yarışların təşkili deyil, həm də nəticə deməkdir. Olimpiadaların “Əsas qələbə yox, iştirakdır” şüarı çoxdan aktuallığını itirib. Buna görə də yarışların təşkil edilməsindən başqa idmançılarımızın uğurla çıxış etməsi də vacibdir. “Əziz Şuşa” veloturunda velosipedçilərimiz müəyyən qədər uğurlu nəticələr əldə etdilər. Təəssüf ki, bunu 3×3 basketbol turniri haqqında demək olmur.