Təşvişə düşmədən… “Sürix”i Bakıya gətirmək lazımdı

Qorxulu heç nə baş verməyib. “Qarabağ”, sadəcə, ilk matçda uduzub və 0:1-in revanşı Bakıda olacaq. Dünən Poznanda azarkeşlərin yaratdığı ab-havaya Respublika stadionunda cavab verməklə cütün qalibi olmaqda çempionumuza yardım etməliyik.

Səfər qolu qaydası ləğv edildiyindən təkqollu məğlubiyyətin əvəzini çıxmaq daha asandı. Ağdamlıların avrokubokların ötən mövsümlərində dəfələrlə 0:1-in cavabını darmadağınlarla verdiyini unutmamışıq. Ona görə də yalnız birincisi başa çatan ikipərdəli tamaşanın davamını gözləməyə dəyər.

“Qarabağ”ın formada olmadığı sirr deyil. Komandamız Polşada çox yaxşı ilk hissə keçirsə də, rəqibin yeganə hücumundan sonra qol buraxdı, fasilədən sonra isə fiziki hazırlığın yerində olmadığı aydınlaşdı. Hazırlıq üçün vaxtın azlığının nəticəsidi ki, əksər futbolçular formasını bərpa edə bilməyib, xətlərarası əlaqədə qopmalar gözə dəyir. Hücumdakı problemləri həll etmək isə hələ də mümkün olmayıb – “Qarabağ” dünən bərbad oyunu ilə diqqət çəkən İbrahima Vadjidən daha səviyyəli birini tapa bilmir.

“Lex”in fasilədən sonra daha üstün oynamasının əsas səbəbi məhz “Qarabağ”ın fiziki hazırlığının yetərli olmaması idi. Bəxtimizə mərhələnin hər nə qədər ən güclü rəqibi düşsə də, formada olan Ağdam klubu polşalıları hər iki matçda darmadağın edəcək potensialdadı. Ümid edək ki, cavab matçına kimi qalan bir həftədə səhvlərdən nəticə çıxarılacaq.

“Qarabağ”ın start heyəti tənqidlərə, müzakirələrə yol açsa da, zaman göstərdi ki, Qurban Qurbanov ən yaxşıları meydana buraxıb. Çünki əvəzetmələrdən meydana daxil olanlar nəinki komandanın oyununu gücləndirmədi, əksinə, rəqibin daha rahat oynamasına şərait yaratdı. Xüsusilə Ramil Şeydayevlə Filip Ozobiç zəif oynadıqları üçün əvəzlədikləri həmkarlarının kölgəsində qaldı.

Təşvişə düşmək üçün gərək yoxdu. “Lex” yaxşı rəqibdi, amma təslim olmayacaq komanda deyil. Cavab matçına yaxşı hazırlıq sayəsində vəziyyəti düzəltmək çox realdı. Emosiyalara qapılmadan cavab matçına sakit hazırlaşmaq və mərhələni keçmək lazımdı. Komandanın cavab matçında yaxşı azarkeş dəstəyinə ehtiyacı olacaq. Çətin vaxtında komandayla bütünləşən azarkeşlərin köməyi ilə “Sürix”in Bakıya bilet almasını təmin etmək gərəkdi.

FƏRİD