“Turist Ansi” niyə gəlib?

“Qarabağ”ın keçmiş futbolçusu Ansi Aqolli Bakıdadı. Ağdam klubunu ziyarət edən alban müdafiəçinin səfəri milli komandamızla bağlı deyil.

Ansi haqda hər dəfə xəbər çıxanda onun milli komandamıza köməkçi-məşqçi gələcəyi ilə bağlı ehtimallar ortaya çıxır. Çünki yığmamızın baş məşqçisi Canni de Byazi Albaniya millisinə rəhbərlik edərkən Ansi bu komandanın kapitanı idi. Bu səbəbdən italiyalının onu özünə yardımçı götürəcəyi, Azərbaycanı yaxşı tanıyan Aqolliylə güvənəcəyi gözlənilirdi.

Lakin bu iki əcnəbinin yolları hələlik birləşməyəcək. Ansi “Futbolinfo”ya açıqlamasında səfərinin məqsədini açıqlayıb: “Bakıya sadəcə, turist kimi gəlmişəm. Dostlarımla görüşəcəm. “Qarabağ”dakı dostlarımla, Əmrah Çəlikəllə, Qurban Qurbanovla danışmaq, ötən günləri yada salmaq xoşdu”.

Aqolli hər nə qədər özünü turist saysa da, əldə etdiyimiz bilgiyə görə, onun “Qarabağ”da çalışmaq perspektivi var. Klub uşaq futboluyla bağlı planlarını məhz albanla gerçəkləşdirmək niyyətindədi. Bununla bağlı onların ilkin söhbəti reallaşıb.

Xatırladaq ki, Aqolli 2010-2019-cu illərdə “Qarabağ”da çıxış edib. 38 yaşlı futbolçu bu komandanın heyətində 5 dəfə ölkə çempionu olub, 3 dəfə Azərbaycan kubokunu qazanıb. Albaniyalı müdafiəçi “Qarabağ”dan ayrıldıqdan sonra ABŞ-ın “Nyu-York Kosmos” klubuna keçmişdi. O, hazırda Amerikada özünün yaratdığı uşaq futbol akademiyasında fəaliyyət göstərir.