U-23 yığmasına ehtiyac varmı? – mütəxəssislər danışır

AFFA İcraiyyə Komitəsinin son iclasında Vaqif Sadıqov U-23 millisinin yaradılması ideyası ilə çıxış edib. Məlumata görə, fikir bəyənilib və növbəti toplantıda yenidən müzakirəyə çıxarılacaq.

Yeni yığma ətrafında fikirlər heç də birmənalı deyil. Bu ideyanı dəstəkləyənlər də var, qarşı çıxanlar da. U-23 yığmasına ehtiyac varmı? Bu komandanın ölkə futboluna hansı faydası dəyə bilər? Mütəxəssisləri danışdırdıq…

AFFA Məşqçilər Komitəsinin üzvü Şahin Diniyev yeni ideyanın tam doğru anlaşılmadığını, ümumilikdə belə bir yığmaya ehtiyac olduğunu bildirdi:

“Belə bir komanda lazımdı. Həm U-18, həm də U-23 millilərinə ehtiyac var. Futbolçular U-17-dən, U-19-a keçərkən iki il itirir və onda təxminən 40 faiz uşaq batır. 19-dan 21-ə keçəndə də eyni problem yaranır. Çünki 20 yaşda bir qisim artıq kənarda qalır. Bu ideya Məşqçilər Komitəsindən gəlib. Fikrimiz həmin uşaqları itirməməkdi. 21 yaşlılar bu il sentyabrda yaşlarını tamamlayacaqlar və onların çox az hissəsi əsas milliyə düşəcək. U-23 yığması həmin futbolçular üçün ikinci şans olacaq. Bu, keçid bir komanda rolunu oynayacaq. Mənə elə gəlir ki, yaş qrupları nə qədər çox olsa, futbolumuza xeyir verər, nəinki ziyan.

Digər tərəfdən, ideya tam olaraq anlaşılmır, fikirlərdə qarışıqlıq var. Bu, ikinci milli komanda demək deyil, tamam fərqlidi. Biz deyirik ki, 21 yaşlılar tsikli bitirdikdən sonra onlardan yalnız 1-2 nəfəri əsas milliyə gedəcək, bu sayı artırmaq lazımdı. Məqsəd qalan futbolçuları qorumaqdı. Yoxsa bir milliyə futbolçu tapa bilmiriksə, ikinciyə hardan tapacağıq? Sadəcə, bu yolla əsas milliyə U-21-dən gedə bilməyənlərə ikinci şans vermiş olacağıq. Futbolçuları itirmək asandı, onları qazanmağı düşünməliyik. İndi əsas milliyə U-21-dən 1-2 nəfərkeçirsə, düşünürük ki, bu yığmadan sonra say 5-6-ya çatacaq. Həmin komandaya il ərzində təlim-məşq toplanışı və bir neçə beynəlxalq oyun kifayət edər. Əsas məsələ futbolçuların diqqətdə qalmasıdı.

Komandanın baş məşqçisinin yerli mütəxəssis olması planlaşdırılır. Bu da ona görədi ki, o, həmin futbolçuları daim diqqətdə saxlamalıdı. Komandanın beynəlxalq yarışı yoxdu deyə, nəticə də tələb olunmayacaq. Yerli məşqçi daha yaxşı olar ki, futbolçularla daim əlaqədə olsun. Digər tərəfdən bu, məşqçilərimiz üçün də özlərini göstərmək üçün bir şans olacaq.

U-23-ü komanda kimi çempionata buraxmaq? Məncə, bu, sistemdən kənara çıxır. Mümkün olmayacq. Həmin futbolçular hərəsi bir klubdan gələcəklər. Belə bir şeyə ehtiyac yoxdu”.

Futbol mütəxəssisi Tahir Süleymanov isə tamamilə fərqli fikirdədi. O, belə futbolçu kontingenti ilə U-23 yığmasının ölkə futboluna heç bir faydasının olmayacağını düşünür:

“Azərbaycan futbolu acınacaqlı durumdadı. Məsələlərə hansısa yığmanın yaradılması baxımından yanaşmaq lazım deyil, ümumi futbolda kompleks tədbirlərin görülməsi mütləqdir. Fikir verin, millidə baş məşqçi postuna 32(!) namizədin olduğu qeyd edilir. Yanlış, ciddilikdən, peşəkarlıqdan uzaq münasibətdi. Azərbaycan millisi açıq qapıya çevrilməməlidi. Bu sayda məşqçini detallı analiz etmək üçün elə 32 ay vaxt lazımdı. Buna ehtiyac da yoxdu. Ümumiyyətlə, məşqçi məsələsi bu qədər müzakirə edilməməlidir Milliylə bağlı Yurçeviçin həqiqət dolu son açıqlama-nağılları kifayətdi, “8 komandalı çempionat, az sayda futbolçu seçimi” və s… Baxın, xorvat bu sözləri müqavilə bağlayanda demirdi, indi dilə gətirir. Mənəviyyatı olan şəxs öncədən bildirərdi, 100 minləri çibə qoyub aradan çıxandan sonra yox. Nəyinə gərəkdi, bunu Yurçeviç yox, futbola cavabdehlər düşünməlidi. Yeni gətiriləcək məşqçi də zaman gələcək oxşar nağıllar səsləndirəcək. Azərbaycan futbolunun problemləri baş məşqçi, hansısa yığmanın yaradılması deyil, daha qlobaldı.

Konfrans keçirildi, köhnə-yeni heyət yenidən futbola rəhbərlik edəcək. Keçmişin, dünənin səhvləri təkrarlanmamalıdı. Bütün sağlam qüvvələr, futbolu düşünənlər, bacarığı olanlar futbolun dirçəlməsi prosesinə layiqli şəkildə cəlb edilməli, şərait yaradılmalıdı. Heç kim eyforiyaya qapılmasın, futbolu kabinetlərdə gizlətmək mümkün deyil. Futbola olan ictimai inam onsuz da sıfıra endirilib. Təfəkkür, düşüncə dəyişikliyi baş verməsə, səhvlərdən nəticə çıxarılmasa, qısa zamanda ictimai münasibət əvvəlkindən də pis olacaq. Hələ ki, AVRO-2020 araya girib, sonrasını düşünmək gərəkdi. Heç bir əcnəbi və ya yerli məşqçinin milliyə təyin olunması ilə ölkə futbolu düzələn deyil. Yeni, çox ciddi layihələr ortaya qoyulmalıdı. Düzgün addımlar atılarsa, dirçəlişə nail olmaq mümkündü.

U-23 yığması zamanlama baxımından yerində olmayan təklifdi. Bu, Almaniya, Fransa, İspaniya və ya futbolçu qıtlığı yaşamayan Xorvatiya, Çexiya kimi ölkələrdə keçərlidi. Rəqabət o qədər yüksəkdi ki, 1-2 gənc futbolçunu çıxmaq şərtilə, əsas milliyə düşmək çox çətindi. Perspektivli futbolçuları itirməmək üçün U-23 yığması faydalı olur.

Azərbaycan futbolunun vəziyyətində isə, U-17, U-19, U-21-lərə keyfiyyətli futbolçu tapılmır, onlarla əcnəbi milliləşdirilir. Çempionatımızda əsas heyətdə çıxış edən yerli futbolçuların sayı 40-50-di. Keyfiyyət qalsın bir tərəfə, say etibarı ilə meydana çıxan hər 2(!) futbolçudan biri milliyə cəlb edilir. Belə durumda U-23-ə nə ehtiyac var?! Rəqabətin, usta futbolçuların olmadığı məkanda onsuz da bir az bacarığını göstərən gənc futbolçular dərhal milliyə cəlb edilirlər…

U-23 layihəsi sonranın işidi. İndi bütün gücü səfərbər edib planlı şəkildə infrastruktura, uşaq futboluna, bölgələrdə klubların bərpasına yönəltmək lazımdır. Kütləvillik, həvəskar futbol öz yerində, peşəkar futbol yanaşması olmalıdı.

İndiki məqamda U-23 yığması olmayan futbolçularla Azərbaycan futboluna heç bir fayda verə bilməz”.
(Futbolpress.az)