Ölkə futbolu
Ya Rəhim, ya Əli – “Sumqayıt” üçün dua zamanı
Ya Əli, ya Rəhim – yox, dua etməyə hazırlaşmıram, “Sumqayıt”ı xilas edə biləcək futbolçuları sadalayıram. Belə vəziyyətdə adətən lider oyunçulara ümid edirsən və düşünürsən ki, “kimyaçılar”ı uğursuzluqdan çıxarmaq üçün ya Rəhim Sadıxov, ya da Əli Qurbani məsuliyyəti üzərinə götürməlidi. Lakin onlar indi xilaskar olacaq vəziyyətdə deyil, əksinə, onların özünü xilas etmək lazımdı.
Ötənmövsümkü “Sumqayıt”dan əsər-əlamət qalmayıb. Dünən Qəbələdə meydana ruhsuz komanda çıxmışdı. O qədər ruhsuz ki, meydan sahibləri mövsümdəki ən zəif oyunlarından birini keçirməsinə baxmayaraq, qalib gəldi. Sürətli oyuna üstünlük verən, əla əks-hücum quran, pressinq edən, rəngarəng oynayan “Sumqayıt” tarixin yaddaşına köçüb. Heyət həminkidi, hətta qismən güclənib, müqaviləsi uzadılan futbolçuların maaşı da artıb, lakin oyun baxımından geriləmə var.
“Kimyaçılar” artıq 6-cı pilləyə enib, liderlər qrupundan uzaq düşüb, üstəlik, autsayderdən cəmi 2 xal öndədilər. 11 tura 11 xal arzuolunmaz göstəricidi, bu gedişlə ikinci dövrənin sonunda komanda hamıya aşağıdan yuxarı baxacaq. Deyəsən, baş məşqçi Ayxan Abbasov da təslim olub, təkbaşına mübarizə aparmağı bacarmır, komandanı motivasiya etmək üçün yeni sözlər tapmaqda çətinlik çəkir. Prezident Riad Rəfiyevsə günlərdi ölkə xaricindədi, əsas işini unudub, menecer olaraq milli komandaya məşqçi axtarır.
İstənilən halda, dünən uğurlarına görə təriflədiyimiz məşqçi indiki duruma görə tənqidi də haqq edir. Və artıq istefaya işarə edir, getmək zamanının çatdığını dilə gətirir: “Təəssüf ki, ikinci hissədə konsentrasiyanı itirdik və qapımızda qollar gördük. Bundan sonra hücuma atılıb qollar vurmaq istədik. Buraxılan qollardan birinin əvəzini çıxsaq da, bərabərlik əldə edə bilmədik. Heyətdə itkilərimiz var idi. Bu oyundan sonra daha da çoxaldı. Ehtiyat qüvvənin az olması, rotasiyalar edə bilməməyimiz bizə çətinlik yaradır. Qarşıda qış fasiləsinədək 3 oyun var. Futbolçulara da dedim ki, təslim olmaq olmaz. Oynamaq lazımdır. Əvvəl də dediyim kimi, bura qalxmaq asandır. Amma qalmaq çətindir. Bəzi oyunçularımız mövsümün əvvəlində formada olmadılar. Zədələrə görə heyəti tam komplektləşdirə bilmədik. Bəlkə də xeyirlisi budur. Amma bu gün əlimizdə olanlarla maksimum çıxış etməyə çalışırıq. Digər rəqiblər güclənib. “Qəbələ” 2 mövsümlük uğursuzluğa baxmayaraq, təslim olmadı, çempionata rəng qatırlar. Bu da bir nümunədir. Məğlubiyyət üzücüdür, amma hər zaman komandamın arxasındayam. Bəlkə də nələrisə dəyişməliyik. Yaxud da vaxt gəlib çatıb, getmək lazımdır”.
Abbasov heyətlə bağlı dediklərində haqlıdı, bir neçə oyunçu sıradan çıxan kimi layiqli əvəzedicilərin olmadığı aydınlaşır. Lakin hər durumda cavabdeh baş məşqçidi, komanda belə vəziyyətə hazır olmalıydı. Rəhbərlik lazım olanı etməyibsə, heyəti komplektləşdirmək mümkün olmayanda getmək lazım idi, yox, Abbasov bu şərtlərlə yola davam etməyə qərar veribsə, nəticələrə görə məsuliyyət onun boynundadı.
“Sumqayıt”ın əsas problemi daim “müvəqqəti dayanacaq” olmasındadı. Komandanın bütün oyunçuları mövsüm boyunca gələn dəvətlər arasında var-gəl edir, düşünür, beyinləri yerində olmur. Keçən çempionatda avrokuboka vəsiqə qazanıldığından heyət qorundu, indi isə bu vəzifənin çətin olduğunu hamı anlayır və bəzilərinin çemodanları hazırdı. Rəhim Sadıxov, Əli Qurbani və başqaları elə qışdaca başqa klublarımıza transfer oluna bilər.
Əlinin oyununda düşüş aşkar görünür, ötən il qolları sıralayan hücumçu indi qapını yaddan çıxarıb, Rəhim milli komandaya çağırılmayandan sonra ruhdan düşüb, ora layiq olmaq üçün daha yaxşı komanda arayışındadı. Elə Ayxan bəyin açıqlamasındakı sitəmin sətiraltı mənası da budur – o, doymuş, maksimumunu göstərmiş futbolçularla məqsədə çatmayacaqlarını bildirir, böyümək üçün rəqabətli heyət, “yeni qan” istəyir. Rəfiyevinsə komisyon haqqını düşündüyü məsələlər var, klubun durumuyla maraqlanmır. Bəlkə də istefa ismarıcı elə ona yönəlib.
Elvin Bədəlov, Eltun Turabov və Murad Xaçayev kimi önəmli oyunçuların ardınca Vüqar Mustafayevlə Vurğun Hüseynov da cəzalı duruma düşdü. Deməli, qarşıdakı turlarda “Sumqayıt”ı daha pis aqibət gözləyir. Layiqli əvəzedicilər olmadığından Abbasov onu nələrin gözlədiyini yaxşı bilir, ona görə təslim olmuş kimi danışır.
“Qəbələ” isə tam fərqli qrafik cızır. Komanda ikinci pillədədisə, deməli, işlər yaxşı gedir. Bölgə təmsilçisi həm yaxşı oynayır, həm də bəzi məqamlarda bəxti gətirir. Düzdü, son dəqiqələrdə vurulan qollar eyni zamanda komandanın əzmkarlığının, axıracan döyüşməsinin məhsuludu, lakin Ülvi İsgəndərov, Emil Səfərov kimi sonradan oyuna daxil olub nəticəni dəyişəcək futbolçuların olması həm də şans məsələsidi. Həmin Ülvi start heyətdə oynayanda heç nəylə yadda qalmır, sonradan oyuna qoşulduqda isə fərq yaradır.
Bütün bunlar “Qəbələ” kimi komandalar üçün əlavə üstünlükdü. Liderə ən yaxın kollektiv olmaq faydalı işin nəticəsidi. Elmar Baxşıyev indiki halda ritmi tutub, sistem var və hər oyunçu müxtəlif formada faydasını göstərir. Necə ki, ötən mövsüm uğura ac futbolçularla “Sumqayıt” da eynisini edirdi. İndi isə ya Rəhim, ya Əli, ya da bir başqası formadan düşüncə…
FƏRİD
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”