Yeni AFFA prezidenti – İqor Ponomaryov?

Futbol təsərrüfatında qəribə durğunluq var. Sanki  bütün proseslər dayanıb, hamı nələrinsə baş verəcəyini gözləyir. Belə vəziyyəti adətən “Fırtınaqabağı sakitlik” adlandırırlar.

Mövsümün yekunlaşmasına az qalıb. Ardınca Millətlər Liqasında ilk qrup oyunları, daha sonra avrokuboklarda mübarizə başlayacaq. Yeni mövsümün startına kimi bir çox məsələ həllini tapmalı, çempionat nizama salınmalı, klubların büdcələri dəqiqləşməlidi.

Lakin kabinetlərdə heç də sakitlik deyil. Futbol təsərrüfatında hakimiyyətə gəlmək istəyənlər müxtəlif planlar cızır, vəzifə bölüşdürür. Elə məqama çatmışıq ki, AFFA rəhbərliyinə can atan qüvvələr bir-biriylə mübarizə başlayıb, hətta eyni komandanın içində rəqabət başlayıb.

Detalları sonraya saxlayaq, hələlik bəlli olan İqor Ponomaryovun ön plana çıxmasıdı. “Sabah”da rəhbər vəzifə tutan “Şöhrət” ordenli Olimpiya çempionu bir çox qüvvənin, hətta “yuxarılar”ın da etimadını qazanmaq üzrədi. Futbol veteranı olması ona əlavə üstünlük qazandırıb və sabiq 9 nömrə Rövnəq Abdullayevin xələfi olmağa əsas namizdəddi.

Əsas idarəçilik maliyyəni təmin edəcək qüvvələrdə olmaq şərti ilə, Ponomaryovu AFFA prezidenti seçmək istəyirlər. Axı, bu vəzifədə olmaq üçün digər tələb bir müddət futbol təsərrüfatında hansısa vəzifənin sahibi olmaqdı. Ramiz Mirzəyevin, Rövnəq Abdullayevin AFFA-ya gələnədək “Neftçi”də qısa müddət prezident işləməyi təsadüf deyildi. Nizamnamə tələbərini yerinə yetirmək üçün onlar “müvəqqəti dayanacaq”dan keçmişdi.

Bu tələblərə cavab verən adam o qədər də çox deyil, bu üzdən Nizamnaməyə uyğun gələnlərin başında Ponomaryov dayanır. Ən pis halda hansısa məmurun futbola bağlılığı kağız üzərində “isbatlanacaq”, bu posta gətiriləcək, Ponomaryov isə icraçı vitse-prezident olacaq. İslahatçıların hazırkı planı bundan ibarətdi.

AFFA-nın icraçı vitse-prezident postunun ləğv edilməməsi sizə təsadüf görünməsin. Elxan Məmmədov FIFA-da işə başlayıb adi vitse-prezidentə çevriləndən sonra futboldakı hakimiyyətini itirməmək üçün buna cəhd etdi. Amma islahatı planlaşdıran qüvvələr bunu əngəllədi, ilyarım öncə təsis edən postu özləri üçün vakant saxladılar.

Maraqlıdı ki, gənclər və idman nazirliyi də futbola biganə deyil. Son müsahibəsi ilə strateji plan qurmaqda bacarıqsızlığını isbat edən, futbolun inkişafı ilə bağlı sualı “Bilmirəm” deyən cavablayan nazir Fərid Qayıbov bu sahəyə nüfuz etməyə, ümumi idarəetməyə qoşulmağa çalışır. Ona görə də nazirlikdə çalışmağa başlayan Elnur Məmmədovun baş katib təyin olunmasına cəhd edirlər.

Kəsəsi, mübarizə davam edir. Ümid edək, yeni gələnləri futbolun ümumi inkişafı kreslonun yumşaqlığından daha çox düşündürəcək.

CAVAD