Ölkə futbolu
“Zirə” və “Səbail”in “ənənə”si
Premyer Liqanın cari mövsümündə 3 tur geridə qalıb. Zirvədə üçhakimiyyətlilikdi və qəribə start izləməkdəyik. Hamının xal itirdiyi yarışda vəziyyət elədi ki, bir qələbə ilə komandalar 3-4 pillə irəliləyə bilir.
Baş tutmuş 12 oyun maraqlı statistikanı da ortaya qoyub. Diqqət yetirməyə dəyər.
Maraqlıdı ki, 3 turun hamısında eyni sayda – 8 qol vurulub. Bu, orta hesabla hər matça 2, hər komandaya 1 top düşməsi deməkdi.
Daha bir qəribə məqam 1 və 2-ci turlarda vurulan 8 topdan 7-nin yerlilərin hesabına yazılmasıdı. İlk həftədə “Səbail”in iranlısı Peyman Keşavarz, 2-ci turda “Zirə”nin gürcüsü Davit Volkov əcnəbilərin üzünü ağartmışdı. Keçən həftəsonu isə bizimkilərlə əcnəbilər qolları yarı böldü – 4:4. Düzdü, Əli Qurbanini legioner saysaq, vəziyyət dəyişir. Çünki iranlı ötən tur “Neftçi”yə 2, sonuncu matçda “Səbail”ə 1 qol vurdu. Amma “Sumqayıt” əcnəbi transfer etmədiyindən və bu futbolçunu əvvəl-axır milliləşdirəcəyindən onu indidən yerli saya bilərik.
Turlarla bağlı başqa bir oxşarlıq da var. Sanki komandalar sözləşib və hər həftə 1 heç-heçə qeydə alınır. Digər 9 oyunda qonaqlar daha çox (5:4) qələbə qazansa da, top fərqi bərabərdi – 12:12. Yalnız “Sabah”ın bir oyunda 3 qol vura bildiyi və yeganə böyük hesabın müəllifi olduğu yarışda 2:1 ən populyar hesabdı (4 dəfə).
12 oyunu 11 hakim idarə edib, yalnız Əliyar Ağayev 2 dəfə təyinat görüb. Məhz onun idarə etdiyi görüşdə mövsümün hələlik yeganə əzmkar qələbəsi qeydə alınıb. Son matçadək heç vaxt hesabı açan sonda xalsız qalmamışdı. Amma “Qarabağ” “Neftçi” ilə matçda bu aqibəti yaşadı.
Ümumiyyətlə, “Neftçi”nin oyunlarında qalib 2 top vurur. Zirvəyə şərik olan digər 2 komandanın – “Sumqayıt” və “Sabah”ın matçlarında isə hesabı açan sonda mütləq qalib gəlir.
Daha 3 komandanın fərqli özəllikləri var. Belə ki…
…“Zirə” bütün oyunlarda top buraxıb;
…“Keşlə” hələ top buraxmayıb və məğlub olmayan yeganə komandadı;
…“Səbail” bütün oyunlarda 1:2 hesabıyla uduzub.
- Ölkə futbolu2024-05-10 08:00
“Yurqorden” Musa Qurbanlıya qiymət qoydu – 10 milyon kron
- Ölkə futbolu2024-05-10 09:21
“Əks təqdirdə fanatlar Şeydayevi qəbul etməyəcək”
- Dünya futbolu2024-05-10 16:37
AÇ-2024-ün rəsmi mahnısı təqdim edildi – VİDEO
- Digər idman növləri2024-05-09 12:52
Kramarenkonun qızı millimizdə? – “Bu, ölkəmə xəyanət olar”