“Zirə”k tovuzlulardan “Qəbələ”yə hədiyyə

Premyer Liqada 32-ci tur bu gün başa çatacaq. “Neftçi” qalib gəlsə, “Sabah”a çempionluq üçün ümid, büdrəsə, gümüş medalları təhvil verəcək.

Liderlərin bugünə təxirə salınan oyununa kimi isə digər komandalar münasibətlərinə aydınlıq gətirdi. “Qəbələ” özü qalib gəlib “Zirə”nin məğlubiyyətinə sevindi və 4-cü pillədə bir az da möhkəmləndi. Çox güman ki, qəsəbə təmsilçisini yeni avrokubok mövsümündə görməyəcəyik. “Qəbələ”yə kuboka möhtac olmadan vəzifənin öhdəsindən gəlmək üçün 2 qələbə kifayətdir.

“Sumqayıt” “Kəpəz”ə qalib gəlməklə Premyer Liqada qalmaq yolunda inamlı addım atdı. Autsayderlərdən iki qələbəlik məsafədə olan cütlük qarşıdakı turlarda mövqelərini gücləndirməklə məşğul olacaq. “Şamaxı”yla “Səbail” çox güman ki, kimin elitanı tərk edəcəyini son turdakı şəxsi oyunda aydınlaşdıracaq. Ardıcıl məğlubiyyətlər bu iki komandanın vəziyyətini tamamilə pisləşdirib. Bölgə təmsilçisi qələbəni unudub, “dənizçilər”sə bu mövsüm səfərdə ən pis göstəriciyə malik komanda olmağa davam edir.

8 oyunluq qələbəsizlik seriyasına Zirədə son qoyan “Turan Tovuz” rahat nəfəs aldı. Ayxan Abbasovun yetirmələrinə elitada yerini təmin etmək üçün bir xal kifayət edəcək. Həmin xala isə ehtiyac olmaya da bilər, çünki digər autsayderlərin bütün matçlarda qalib gəlmək şansı yoxdur. Sadəcə, riyazi cəhətdən sualları nöqtəylə əvəzləmək üçün qərblilər daha bir matçda uduzmamalıdır.

Tovuzluların “Zirə” ilə dünənki oyunu qonaqların bəd seriyaları qırması baxımından önəmli oldu. Səfərdə daha yaxşı çıxış edən “Turan Tovuz” ənənəsinə sadiq qalıb 79 gündən sonra qələbə qazandı. Bu, həm də cari mövsümdə 3 dəfə yenildkləri “qartallar”a qarşı sindromun qırılmasıyla əlamətdar oldu. Baxmayaraq ki, matçın aşkar favoriti “Zirə” sayılırdı.

Bəri başdan yazaq ki, oyunun qəribə ssenarisini hakimlər cızdı. Bu haqda başqa yazıda oxuyacaqsız, sadəcə, əlavə edək ki, məhz Rauf Cabarovun bacarıqsızlığı sayəsində hakimlik futbolun önünə keçdi. Epizodlar zəncirin halqaları kimi sıralandığından kimin daha çox ziyan gördüyünü iddia edə bilməyəcəyik. Lakin onun qərarları matçı axarına, oyunun ritminə ciddi şəkildə təsir etdi.

4-cü yer uğrunda mübarizə aparan “Zirə” avrokubok ümidlərini qovmaq üçün mütləq qələbə qazanmalıydı. Rəqibin 3 gün öncə ağır kubok oyununda fiziki güc itirməsi, son dəqiqə qolu ilə psixoloji zərbə alması da meydan sahiblərinin xeyrnə idi. Üstəlik, “Turan Tovuz” müxtəlif səbəblərdən iki əsas qapıçısının xidmətindən məhrum idi.

Bütün bunlara baxmayaraq, start “Zirə” üçün xoşagəlməz alındı. Bəsit qollar buraxmasına öyrəşdiyimiz Rəşad Sadıqovun yetirmələri ilk künc zərbəsindən sonra məyus oldu. Düzdü, meydan sahibləri aşkar üstün olduğu ilk hissədə azı 2 qol vurmalı idi. Amma komanda penaltini boşa verdi, təmiz qolu sayılmadı. “Turan Tovuz” əlinə düşən nadir şansları uğurla bitirincə gözlənilməz nəticə qeydə alındı.

“Zirə” məğlubiyyətə görə kənar amilləri qabarda bilər və haqsız da sayılmaz. Hakimin xüsusilə ilk yarıda başını itirməsindən yaranan xaos meydan sahiblərinə ciddi şəkildə təsir etdi. Amma Sadıqov komandasının qüsurlarına da diqqət etmlidir. Bəxtsizlik, fərdi səhvlər, hakim qərarları “Zirə”nin hədəfinə çatmamasında böyük rol oynadı, bununla yanaşı komanda olaraq edilən yanlışlar da qeyd olunmalıdır.

“Zirə” dünən standart vəziyyətlərdən sonra 4 qol buraxdı (biri ləğv edildi). Təkcə bu fakt çıxışlarda faciəvi oynayan qapıçının və mərkəz müdafiəçilərinin işini qiymətləndirmək üçün misilsiz imkandır. Komandanın qolkiperləri biri obirindən betərdir, müdafiəçiləri isə canlı bomba. Qovulub geri qaytarılan Nemanya Andelkoviç bir epizodda rəqibə iki dəfə məhsuldar ötürmə verirsə, başqasında günah axtarmağa dəyməz.

Sadıqov mövsüm boyunca ideal “11-liy”ini tapa bilmədi, Rəhim Sadıqov – Hamidu Keytadan asılılıq komandanın hücumda rəngarəngliyinə xələl gətirdi. Broqno, Hamdaui, Əhmədzadə, Qomes sabit oynamağı bacarmadı, müdafiənin cinahları mərkəzindən betər, dayaq bölgəsi oyunçuları keyfiyyətdə rəqiblərə uduzur. İlk baxışdan heyət zəngin görünür, lakin seçimlər düzgün edilməyib, məşqçinin oynatmaq istədiyi futbola uyğun oyunçular tapılmayıb. Mövsüm ərzində bu qədər transfer edilib, nəticə verəcək komanda isə yoxdur. “Qəbələ” bu gün öndədirsə, bunun səbəbi qəsəbə təmsilçisindən fərqli olaraq transferlərdə dəqiqlik faizinin ikiqat yaxşı olmasıdır.

Yəqin ki, bu mövsüm “Zirə”yə dərs olacaq, heyətdə ciddi islahatlar aparılacaq. Komandanın hücum potensialı yaxşıdır, lakin qapı, müdafiə və dayaq bölgəsi hücumçuların rahatlığını təmin edə bilmirsə, əksinə, kuryoz qollarla əlavə problem yaradırsa, diqqət məhz bu bölgələrə yönəldilməlidir. “Zirə”nin yüksək səviyyəli legioner qapıçıya və müdafiə xəttinin tam yenilənməsinə ehtiyacı var. Əks halda, futbolçu kimi iz qoymuş Sadıqov məşqçi kimi “uğursuz” adını üzərinə götürəcək. Bu mövsümü unundub, dərs alıb doğru seçimlərlə daha mobil komanda qurmaq lazımdır. Həm də bu, təkcə futbolçu heyətinə aid deyil, Sadıqovun məşqilər heyəti də bacarıqlı mütəxəssislərdən qurulmalıdır. Böyük komanda olmaq üçün kreslo isidən adamlarla yol çıxmaq olmaz.

Komandanın lider problemi də var. Rəşad bəy özü oynayarkən hansı rolda idisə, komandasına da elə bir futbolçu tapmalı, meydandakı məşqçi köməkçisini “yaratmalıdır”. “Zirə”də xarakterli yerli oyunçu yoxdur, ortabab “robot”lardan ibarət bir qrup Sadıqovun dirijor çubuğu ilə hərəkət edir. Məşqçinin kapitan sarğısını Keytaya etibar etməsi də bunu göstərir. Halbuki “Qəbələ”ylə bugünkü 6 xallıq fərqin yaranmasına boşa verdiyi iki penalti ilə səbəbkar olan Hamidu bu rola qətiyyən yaramır, heç yarayan kimsə də yoxdur.

“Zirə” və “Turan Tovuz” üçün mövsümün qalan oyunları formallığa çevrildi. Qərblilərin daha yüksək yerdə qərarlaşmaq üçün mübarizə stimulu varsa, qəsəbə təmsilçisinin 4-cü pillə ümidi boş xəyaldır. Qalan 4 turu gələn mövsümün komandasının formalaşdırılması üçün eksperimentlərə həsr etmək daha yaxşı olar.

Premyer Liqada əksər məqamlara aydınlıq gəlib. İndi əsas sual elitanı “Şamaxı” və “Səbail”dən hansının tərk edəcəyi ilə bağlıdır. Bu gün, 32-ci turun bağlanış matçında “Neftçi” qələbə qazanmasa, medalçıların sıralaması da 80-90 faiz dəqiqləşəcək.

AĞA