“Zirə”nin seriyası qırıldı, “Qarabağ” fərqi artırdı

Premyer Liqada qış fasiləsi başladı. Dünən baş tutan son 2 matçla 2-ci dövrə yekunlaşdı, komandalar qısamüddətli istirahətə getdilər. Tezliklə mövsümün ikinci yarısının hazırlığı başlayacaq, elita təmsilçiləri heyətini gücləndirməyə, problemli mövqelərinə transferlər etməyə çalışacaq.

“Qarabağ” 14 tur ərzində əsas izləyicisi olan “Qəbələ”dən 7, son çempion “Neftçi”dən 11 xal uzaqlaşmağı bacardı. Əsas rəqibin bakılılar olduğunu nəzərə alsaq, “köhlən atlılar” qızıl medalları qazanmasını erkən elan edə bilər. Möcüzə baş verməsə, “Neftçi” qalan 14 tur ərzində ağdamlılarla aradakı bu fərqi əridə bilməyəcək.

Qurban Qurbanovun yetirmələri ikinci dövrəyə şok “Səbail” məğlubiyyəti ilə başlasa da, qalan oyunlarda qələbələri sıraladı, 6 oyunda 16 top vurub, cəmi birini buraxdı. Yalnız əsas izləyicisi “Qəbələ”ylə səfərdə 0:0-a razılaşan “Qarabağ” bunun sayəsində qış çempionluğunu da erkən elan etmişdi.

Dünən dövrənin bağlanış matçına nisbətən zəif heyətlə çıxan “Qarabağ” “Zirə”yə şans vermədi. Erkən qolla üstünlük qazanan Qurbanovun yetirmələri bunun davamını gətirib liderliyini möhkəmləndirdi. Dubl edən Musa Qurbanlının statistikası isə heyran edir. 3 matça dubllar sayəsində 6 qol vuran hücumçu baş məşqçi olan atasının etimadını tam doğruldur. İbrahima Vadji və Ramil Şeydayevdən daha az şans alıb onlardan çox qol vuran forvard əla bitiricilik qabiliyyəti ilə seçilir. Qurban bəy oğluna daha çox güvənsə, pis olmaz.

Ardıcıl ikinci məğlubiyyətini alan “Zirə”nin əsas problemi heyətdəki itkilər idi. Xüsusilə uzun müddətə sıradan çıxan Nemanya Andelkoviçin yoxluğu özünü göstərdi. “Qartallar” mövsümdə ilk dəfə meydanı qolsuz tərk etdi ki, bunun da səbəbini rəqibin daha güclü komplektləşmiş, balanslaşmış heyətə malik olmasında axtarmaq lazımdı.

Ümumiyyətlə, “Zirə”nin ciddi güclənməyə ehtiyacı var. Komanda liderlər qrupunda qalıb avrokuboklara getmək istəyirsə, bütün xəttlərə transferlər edilməsi vacibdi. Rəqabətin istənilən səviyyədə olmaması zaman-zaman özünü göstərir. Qəsəbə təmsilçisinin 2-ci dövrədə özündən öndəki 3 liderin hamısına məğlub olması təsadüfi deyil.

“Zirə”ylə xal fərqini 5-ə endirən “Sabah” qışdan sonra daha yaxşı olacağının siqnallarını verir. Murad Musayevin fasilə dövründə istədiyi transferləri edəcəyi şübhə doğurmur. Deməli, paytaxt təmsilçisinin daha da güclənməsi ehtimalı var. Komanda liderlər qrupuna düşmək istəyirsə, mütləq nöqtə-transferlər etməlidi. “Səbail” üzərindəki böyükhesablı qələbə aldadıcı olmamalıdı, bu komanda mövsümün ən zəifidi. “Sabah” heyətinin keyfiyyətini “Qarabağ”dan buraxdığı 5 qolla ölçməlidi.

“Səbail”ə gəlincə, çempionatın ən zəif komandası çətin ki, sonadək autsayderlər qrupundan çıxa bilsin. Büdcə, bu səbəbdən heyət yetərsizliyi Aftandil Hacıyevi çətin duruma salıb. Onun möcüzə etmək imkanı yoxdu, klub rəhbərliyi vəziyyəti dəyişməsə, belə də davam ediləcək.

CAVAD