Zubir “Bazel”lə matç öncəsi “Neftçi” ilə oyunu yaxşı sınaq sayır: “BOS-da oynamağımız müsbət haldır”

“Qarabağ”ın yarımmüdafiəçisi Abdulla Zubirin futbolinfo.az saytına müsahibəsi

• Milli komandalara görə yaranan fasilədən necə yararlandız? Həm istirahət, həm məşqlər necə keçdi?
• Bir neçə gün istirahət etdik, daha sonra yenidən məşqlərə başladıq. Adət etdiyimiz üzrə məşqlər oldu. Ciddi və ağır məşqlər idi.
• Azərbaycan yığmasının oyunlarını izlədinmi və izlədinsə, hansı təəssüratlar yarandı?
• Təəssüf ki, Azərbaycan yığmasının matçlarını izləyə bilmədim. Ona görə də bu barədə heç bir fikrim yoxdur.
• Konfrans Liqasında düşdüyünüz qrup barədə nə deyə bilərsən?Rəqiblər qrupdan növbəti mərhələyə çıxmaq üçün uyğundur?
• Təbii ki, rəqiblərə baxanda görürsən ki, asan olmayacaq. “Bazel”in gücü və səviyyəsi hər kəsə bəllidir. Daim nüfuzlu yarışlarda mübarizə aparıblar. Güclü komandadır. “Kayrat” və “Omoniya”ya gəlincə, Konfrans Liqasında qrupa qədər irəliləyiblərsə, deməli güclü rəqiblərdir. Maraqlı mübarizə gedəcək. Biz də əlimizdən gələni edəcəyik ki, bu qrupda uğurlu sayılacaq mövqedə qərarlaşaq.
• Konfrans Liqasında ilk oyununuzu doğma Tofiq Bəhramovda deyil, Bakı Olimpiya Stadionunda keçirəcəksiz. Bunu müsbət, yoxsa mənfi hal kimi dəyərləndirərdin?
• İndiki məqamda, ümumi vəziyyəti nəzərə alaraq BOS-da oynamağımız bizim üçün müsbət haldır. Çünki hamı gördü ki, Tofiq Bəhramov adına Respublika Stadionunun ot örtüyü çox bərbaddır və oyunumuza təsir göstərir. BOS-un ot örtüyü isə çox yaxşıdır. Bu da öz oyunumuzu göstərməyə imkan verir. Yəni oyun tərzimiz elədir ki, meydança daha yaxşı olmalıdır. Bunu nəzərə alaraq ilk matçın BOS-da olmasını müsbət qarşılayıram.
• Artıq 3 gün sonra çempionatda oyuna çıxacaqsız. Buna hazırsız?
• Ümid edirəm ki, hər kəs hazır vəziyyətdə olacaq. Bütün oyunlarda olduğu kimi çalışacağıq ki, müsbət nəticə qazanaq.
• “Neftçi” ilə üz-üzə gələcəksiz və rəqib ötən mövsüm sizi udub çempion olmuşdu. Həmin məğlubiyyətin əvəzini çıxmaq üçün xüsusi motivasiya olacaqmı?
• Ötən il “Neftçi” çempion oldu. Amma biz keçmişlə yaşamamalıyıq, geriyə baxmamalıyıq. Futbol elədir ki, irəli baxmaq lazımdır. Biz də əvvəlkindən daha güclü olmağa, daha iradəli olmağa çalışaraq önümüzə baxırıq. Hədəfimiz qarşıdakı matçlarda yaxşı oyun və müsbət nəticələrdir.
• Bu matç “Bazell”ə oyunöncəsi sizin üçün yaxşı sınaq olacaqmı?
• “Neftçi” güclü rəqibdir. Bu il avrokubokların təsnifatlarında yaxşı keçirdikləri oyunlar oldu. Hardasa “Bazel”lə oyunöncəsi yaxşı sınaq oyunu saymaq olar. Belə güclü rəqiblə oyunda öz gücümüzə tam bələd ola bilərik. Bu baxımdan düşünürəm ki, bəli bizim üçün xeyirli qarşılaşma olacaq.

FƏRİD