Ölkə futbolu
Fransızlara məğlub olan məşqçilərdən Qurbanova məsləhət
Xəbər verdiyimiz kimi “Qarabağ” sabah Avropa Liqasını…
Xəbər verdiyimiz kimi “Qarabağ” sabah Avropa Liqasının qrup mərhələsinin ilk qarşılaşmasında Fransa təmsilçisi “Sent-Etyen”lə qarşılaşacaq. Bu, klub səviyyəsində fransızlarla ikinci qarşılaşma olacaq.
Maraqlıdı ki, bu günə qədər klub səviyyəsində yalnız “Qarabağ” Fransa təmsilçisi ilə üz-üzə gəlib. 1999-2000-ci il mövsümündə Ağdam klubu İntertoto kubokubun ikinci mərhələsi çərçivəsində “Monpelye” ilə üz-üzə gəlib. “Atlılar” hər iki qarşılaşmada məğlub olub (0:3, 0:6).
Həmin dönəmdə komandanın baş məşqçisi olmuş Böyükağa Ağayev saytımıza açıqlama verərək “Monpelye” ilə oyunu xatırlayıb. O, həm də ağdamlılara fransızlara qarşı necə oynamaq lazım olduğunu məsləhət verib: “O vaxt “Monpelye” bizdən çox üstün idi. İndi çox vaxt keçib. Klublarda legionerlər çoxdu, yaxşı imkanlar da var. Həmin vaxt futbolçular çox az maaş alırdı. İndiki imkanlar yox idi. Fransa çempionatı çox səviyyəlidi. Fikrimcə, Ağdam klubu üçün çox çətin olacaq. Mənə elə gəlir ki, “Qarabağ” əks-hücumlarda rəqibini yaxalamalıdı. Məşqçilər korpusu rəqibi yaxşı analiz etməlidi. İnanıram ki, bunun öhdəsindən də gəliblər. Qarşılaşmaya hazır olmaq lazımdı. Amma “Qarabağ” üçün çətin oyun olacaq. Ağdam klubunun potensialı yaxşıdı. Hər xəttə yaxşı futbolçuları var. Komandanın oyunu artıq bişib. Təmsilçimiz yaxşı çıxış etməlidi”.
Milli komanda səviyyəsində də Fransa yığması ilə üz-üzə gəlmişik. Hər iki görüşdə fransızlar əsas millimizi meydana çıxmağa peşman edib. (0:2 və 0:10). Oserdə millimizi meydana çıxaran Ağasəlim Mircavadov da sabahkı qarşılaşma ilə bağlı fikirlərini bölüşüb:
"O vaxtkı Fransa yığması super idi. Həmin vaxt rəqibin heyətində dahi futbolçular çıxış edirdi. Söhbət ondan getmir. “Sent-Etyen” Avropada uğur qazanmır. Amma bildiyimə görə, Fransada ən hörmətli klublardandı. Mişel Platini də bu klubda çıxış edib. Bunu yaddan çıxarmayın. İndiki halda ölkəsinin çempionatında yuxarı pillədə qərarlaşıb. Amma fərq etmir, kimə qarşı oynayırsansa, öz oyununu oynamalısan. Bundan başqa rəqibin güclü yerlərini müəyyənləşdirmək lazımdı. Rəqib haqda ətraflı məlumat toplamaq lazımdı. Azərbaycan millisi ilə yanaşı, klublar da standart vəziyyətlər zamanı əziyyət çəkir. Rəqib futbolçunu cərimə meydançasında saxlaya bilmirik. Bu da bizə baha başa gəlir. “Qarabağ” bunu nəzərə almalıdı. Bilirəm ki, bunun üzərində də işləyirlər. Oyunda surəti artırmaq lazımdı. Fransızların hücumunun qarşısını meydanın ortasında almaq lazımdı. Azarkeşlər də stadiona axışacaq. Bu da komandaya əlavə motivasiya verəcək. “Qarabağ”dan qələbə gözləyirik. Bu bizə qəribə gələ bilər. Amma Albaniya səfərdə Portuqaliyanı udursa, burada qəribəlik heç nə yoxdu”.
Qeyd edək ki, “Qarabağ” – “Sent-Etyen” qarşılaşması sabah saat 21:00-da start götürəcək.
EMİN SƏFƏROV
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-23 08:00
“Səbail” “Sabah”a uduzsa…
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”