Premyer-liqa
Səhvlərin müəyyənləşdirdiyi nəticə
Paytaxt Bakıdan uzaqlaşdıqca insan özünə yaxınlaşır, …
Paytaxt Bakıdan uzaqlaşdıqca insan özünə yaxınlaşır, türklər demiş, kəndinə gəlir. Tıxac dolu küçələr, səs-küylü ortamlar, basabas olan avtobuslar insanı yorur, haldan salır. Bu məqamda Topaz Premyer Liqasında çıxış edən əyalət klubların varlığına şükür edirsən.
Bu dəfə də səs-küylü paytaxtımızdan uzaqlaşmaq xoşbəxtliyinə mən nail olmuşdum. Bəzilərinin “7 gözəl”ə 8-ci gözəllə getdiyi Qəbələyə bu şəhərin komandası ilə “Xəzər Lənkəran”ın matçını işıqlandırmaq üçün səfər etmişdim. Havaların getdikcə soyuduğunu, Qəbələnin də dağların qoynunda yerləşdiyini nəzərə alaraq, “ehtiyat igidin yaraşığıdı” deyiminə əməl edib, bir qədər tədbirli davranmışdım. Hər an təbiətin şıltalığına hazır idim.
Amma mənzil başına çatanda tam fərqli mənzərə ilə qarşılaşdım. Bakıdakı solğun havadan fərqli olaraq, oyun günü Qəbələdə möhtəşəm hava var idi. Artıq “ehtiyat igidin yaraşığıdı” deyiminə əməl etdiyim üçün peşman olmağa başlamışdım.
Stadiona toplaşanların tum yarışması
Matçın keçirilməsi üçün Qəbələ şəhər stadionun ot örtüyü ideal vəziyyətə gətirilmişdi. Bu mövsümdə ot örtüyünün yam-yaşıl qalmasını və qazonda nəzərə çarpacaq çatışmazlığın olmaması həqiqətən də təqdirəlayiqdi. Belə yaşıl meydanda komandaların öhdəsinə yalnız gözəl futbol nümayiş etdirmək düşürdü.
Matçın başlanğıcında diqqətimi çəkən məqamlardan biri tribunaya toplaşan azarkeşlər oldu. Yerli komandanın fan-klubundan başqa, arenaya toplaşan digər insanlar komandalarını dəstəkləmək əvəzinə tum çırtlamaqla məşğul idi. Elə azarkeşlər də var idi ki, stadiona bir yox, bir neçə tum torbası ilə gəlmişdi. Sanki kim tumu daha tez çırtlayıb, qurtaracaq deyə bir-biriləri ilə yarışırdılar.
Ən maraqlı məqam isə tumları qurtaran azarkeşlərin qarşılaşmanın sonunu gözləmədən stadionu tərk etmələri oldu. Onu dəqiq bilirəm ki, qarşılaşmadan sonra stadionun təmizliyi ilə məşğul olan şəxslərin işləri çox olacaqdı. Demək olar ki, tum çırtlayanlar, komandalarını dəstəkləyənlərdən daha çox idi…
Bir sözlə, futbolçulara əlavə motivasiya vermək üçün stadiona toplaşan yerli azarkeşlər, daha doğrusu tamaşaçılar doğma komandalarının qələbə qazanması üçün heç bir addım atmadı.
Digər səfər matçlarında olduğu kimi bu dəfə də “Xəzər Lənkəran” dəstəksiz qalmışdı. Klub azarkeşlərin təhlükəsizliyinə görə fanatların səfər oyunlarına aparılmadığını desə də, bu, heç də inandırıcı deyil. Cənubluların uğursuz çıxışını yeni mövsümdə də davam etməsi getdikcə lənkəranlı azarkeşləri klubdan soyudur.
Ciddi dəyişiklərin hiss olunmadığı iki komanda
Bazar günü baş tutan qarşılaşma eyni səviyyədə olan komandaların oyunu idi. Bəlkə də bu üzdən komandaların ifasında 90 dəqiqə ərzində baxımlı oyunun şahidi olmadıq. Tərəflər tez-tez top itkilərinə yol verir, hücumlar yarımçıq dayanırdı. Cinahlardan edilən hücumların da kəsərsi yox idi. Vurulan qollarda isə müdafiəçilərin sayıq davranmamasını xüsusi ilə qeyd etmək lazımdı.
“Qəbələ” və “Xəzər Lənkəran” 7 tur ərzində hələ öz oynunu tapa bilməyib. Hər iki komanda kollektiv futbol sərgiləməyə çətinlik çəkir. “Qırmızı-qaralar”ın hücumları lazımi sonluqla başa vurmamaq problemini “ağ-yaşıllılar” da yaşayırdı. Qonaq komandada Rauf Əliyevin hücumda tək qalması bu matçda da öz sözünü dedi. Ev sahibinin baş məşqçisi Dorinel Muntyanunu əlavə qüvvə kimi meydana buraxdığı Viktor Mendi də nəticəni dəyişə bilmədi. Beləliklə, bəxt sayəsində hərəyə bir dəfə fərqlənən tərəflər meydandan sülhlə ayrıldı.
Çətinin bəhanəsi, Muntyanunun məyusluğu
Qarşılaşmadan sonra mətbuat konfransında təşrif buyuran qonaq komandanın baş məşqçisi Oğuz Çətin bu dəfə də baxımsız oyuna bəhanələrlə şərh verdi. Türk çalışdırıcı yenə əvvəlki açıqlamalarını təkrar edərək, öz fərasətsizliyini ört-basdır etməyə çalışdı. O, müdafiədə etdikləri səhvdən sonra qapılarında qol gördüklərini bildirsə də, cavab qolunu elə rəqib müdafiəçilərin səhvindən sonra vurduqlarını unutmuşdu. Belə getsə, hər mövsümün başlanğıcında “biz çempion olacağıq” deyən lənkəranlıların arzusu elə hər il ürəklərində qalacaq.
Yay fasiləsində baş məşqçinin təlim-məşq toplanışı keçmək üçün əla imkanı olsa da, hələ ki, 7 tur ərzində onun komandada gördüyü işlərin nəticəsinin şahidi olmuruq. Çox keçməz, elə klub rəhbərliyi də bunu əsas gətirərək, türk çalışdırıcı ilə yolları ayırar. Onun yerinə isə komandaya idman direktoru kimi gətirilən Yunis Hüseynov hər an keçə bilər. Artıq Hüseynovun hazırlıqlara başladığınn da şahidi olduq. O, qarşılaşmadan əvvəl baş məşqçi kimi bəzənib, meydanın kənarında futbolçuların isinmə hərəkətlərini izləyirdi. Oyun ərzində isə futbolçulara hətta Çətindən də fəal göstəriş verirdi.
Üzündə gərginlik olan “Qəbələ”nin baş məşqçisi Muntyanu da mətbuat konfransında iki xal itirdiklərin bildirdi. Görünür, baş məşqçi komandasının ürəkaçan futbol oynamadığını unutmuşdu. Yaxud da rumın çalışdırıcı müdafiədə səhvə yol verdikdən sonra qapılarında cavab qolunu görmələrini həzm edə bilmirdi. Buna görə də Muntyanu məyusluğunu gizlətmədi.
Rumın məşqçi oyundan əlavə, milli komandalara görə yaranan fasilədən də şikayətləndi. O, bu fasiləni “faciə” adlandırmaqla, narazı olduğunu, ilk dəfədi Azərbaycanda belə halla rastlaşdığını bildirdi. Düzdü, bu, baş məşqçinin haqlı iradı ola bilər. Amma nəzərə almaq lazımdı ki, fasilə ən çox “Qəbələ”nin işinə yarayacaq. Çünki komandada görüləcək işlər həddindən artıq çoxdu. Çalışdırıcı şikayətlənməkdənsə, fasilədən yararlanıb komandasında olan problemləri azaltsa, oyun tərzinə əl gəzdirsə, daha yaxşı olar. Bu oyunla “Qəbələ”nin uğur qazanması çox çətin olacaq.
Çətin üçün asan “tapşırıq”
Bu qarşılaşma həm də əcnəbi məşqçilərin dueli idi. Düzdü, Oğuz Çətin qardaş Türkiyədən olsa da, mətbuat konfransında qardaşlığını hiss etdirmədi. Belə ki, Azərbaycan dilində ona verdiyim sualı başa düşməkdə çətinlik çəkdiyi üçün mətbuat xidmətinin rəhbəri Hüseyn Cəbrayıloğlunun köməyinə ehtiyac duydu. Fikrini bildirdikdən sonra redaksiya tapşırığına uyğun olaraq, Çətinə jest etdim. Belə ki, mən də gözəl başa düşdüyüm cavabın tərcümə edilməsini istədim. Türk çalışdırıcı qardaş dili anlamırsa, biz də özümüzü başa düşməmiş kimi göstərdik ki, ona dərs olsun. Bəlkə düz etmədim?..
EMİN SƏFƏROV, Bakı – Qəbələ – Bakı
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 17:10
Klublar çətin vəziyyətdə: AFFA yardımları dondurub