Milli komanda
Elxan Məmmədovun sistemi bizi 2896-cı ildə sevindirəcək
Sabah FİFA milli komandaların növbəti reytinq cədvəlini a&cc…
Sabah FİFA milli komandaların növbəti reytinq cədvəlini açıqlayacaq. Ancaq indidən bəllidi ki, millimiz çox ciddi geriləməyə məruz qalacaq.
Hesabat dövründə 3 oyun keçirən Azərbaycan yığmasının mövqeyində ciddi dəyişiklik olub. AVRO-2016-nın seçmə mərhələsində əvvəl İtaliyaya 1:2, ardınca Xorvatiyaya 0:6 məğlub olan komandamız 111 xal itirib. Bu itki 31 pillə geriləməklə nəticələnəcək. Millimiz indi siyahıda 126-cı yerdədi. Lüksemburqla şərik olan komandamız Kanadadan da, Livan və Ekvatorial Qvineya kimi yığmalardan da geri qalır. Burundi, Filippin və Qvineya-Bisau isə ən yaxın qonşularımızdı.
Hər dəfə mənasız yoxlama oyunları sayəsində 5-6 pillə irəliləyən yığma komandamızın əsl səviyyəsi məhz rəsmi oyunlarda bilindi. Burada isə vəziyyət faciəvidi. AFFA-nın baş katibi Elxan Məmmədovun və daydaylıq etdiyi Berti Foqtsun 7 illik zəhmətinin “bəhrəsi” də elə budu. Məmmədov federasiyaya baş katib təyin olunduğu 2007-ci ildə 127-ci olan millimiz indi 126-cıdı. 7 il, Foqtsa xərclənən 100 milyon manatdan çox pul və bir pilləlik irəliləyiş… Elxan bəyin iş sistemi ilə biz birinci pilləyə 2896-cı ildə qalxacağıq. 7 ilə 1 pillə irəliləməklə ancaq 29-cu əsri gözləməliyik. Və bu müddətdə təkcə əcnəbi yığma məşqçilərinə, onların personalına, təlim-məşq toplanışlarına 23 milyarda yaxın xərcləməliyik.
Foqtsun Məmmədovun sayəsində 35 futbolçunu milliləşdirdiyini nəzərə alsaq, “7 ilə 1 pillə” prinsipi ilə 2896-cı ildə layiq olmadan Azərbaycan vətəndaşlığı alıb baş girələyənlərin, kimlərəsə pul qazandıranların sayı 4410 nəfərə çatacaq.
Zarafat öz yerində, amma 6 il 6 ay 17 gün baş məşqçi postunda olmuş Foqtsun nəticələri faciəvidi. 71 matçda 15 qələbə, 22 heç-heçə və 34 məğlubiyyət var. Foqtsun yetirmələri 56 qol vurub, 104-nü buraxıb. Qələbə və heç-heçələrin ekzotik ölkələrin milliləri ilə oyunlarda əldə edildiyini nəzərə alsaq, mənzərənin daha acınacaqlı olduğunu görərik. Çünki 33 seçmə oyunda Foqtsun cəmi 4 qələbəsi var. Vaqif Sadıqov, Şahun Diniyev kimi sabiqlər, eləcə də hazırda layiq olduğu millidən baş katib Elxan Məmmədovun qərəzi və əcnəbi sevgisi üzündən uzaq tutulan Qurban Qurbanov belə nəticəyə imza atsaydı, onları çoxdan asardılar.
Yox, asmazdılar… Çünki onlara bu qədər vaxt verməz və şərait yaratmazdılar, 2 məğlubiyyətdən sonra qovardılar.
FƏRİD
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-23 08:00
“Səbail” “Sabah”a uduzsa…
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”