“İnter”lə “Neftçi” arasında keçirilən matçdan sonra “Şəfa” stadionunun dəhlizində hər iki tərəfin futbolçuları və texniki işçiləri arasında kütləvi dava olmasından artıq xəbərdarsız. Xatırladaq ki, meydan sahiblərinin 351 hesabıyla qələbə qazandığı qarşıaşmanın gedişində yaranan gərginlik paltardəyişmə otaqlarının qarşısında yekunlaşıb və tərəflər münasibətləri qol gücünə həll etmək istəyiblər.
Olaylarla bağlı artıq “İnter” tərəfi rəsmi açıqlama yayıb: "İnter" Peşəkar İdman Klubunun rəhbərliyi Azərbaycan Premyer Liqasının 14-cü turu çərçivəsində keçirilən "İnter" – "Neftçi" oyunundan sonra yaşananları pisləyir. Bundan başqa, klub rəhbərliyi "Neftçi" klubunun rəsmi nümayəndələrinin "İnter" klubunun prezidenti Georgi Nikolovun ünvanına səsləndirdiyi əsassız və etikadankənar fikirlərini pisləyir və belə ifadələrin işlədilməsini yolverilməz hesab edir. Oyundan sonra dəhlizdə qonaq komandanın 3 nömrəli futbolçusu Denis Silva "İnter" klubunun oyunçusu David Meza Kolliyə qarşı fiziki güc tətbiq etmişdir və hadisənin böyüməsinin qarşısının alınmasında iddia edildiyi kimi, klubun hər hansı mühafizə xidmətinin əməkdaşının iştirak etmədiyini nəzərə çatdırırıq. Hadisə oyunun protokolunda qeyd edilmişdir. "İnter" komandası meydanda əzmkar qələbə qazanmışdır və rəqibi reallığı qəbul etməyə səsləyirik”.
Klubun mətbuat xidmətinin rəhbəri Səbuhi Məmmədov isə əlavə olaraq bunları deyib: “Qarşı tərəf məsələ ilə bağlı münasibət bildirə bilər və bu, onların subyektiv fikridir. Ancaq mən deyə bilərəm ki, başverənlərdə “İnter”İn günahlandırmaq düzgün deyil. Bizim mühafizəçilərimiz heç kimi vurmayıb. Orada polis var və təhlükəsizliyə də polis nəzarət edir. Əslində, hadisə belə olub: oyundan sonra komandalar soyunub-geyinmə otağına gedən zaman rəqib tərəfdən bizim futbolçumuz Derlis Meza Kollini vurublar. Bu zaman isə bizim mühafizəçilərimizdən də biri futbolçumuzun döyülməsinin qarşısını almaq üçün məsələyə müdaxilə edib. O ki qaldı Georgi Nikolovun içkili olmasına, bu, tamamilə absurd məlumatdı. Nikolovu hamı tanıyır. O, kifayət qədər mədəni insandı. Üstəlik, Nikolovun xarakteri elədir ki, o, heç vaxt yanan odun üstünə benzin tökmür. Sadəcə, klubumuzun prezidenti hadisə yerinə gələrək, qarşı tərəfə düzgün hərəkət etmədiklərini izah etməyə çalışıb”.
“İnter”I belə açıqlamaya isə "Neftçi"nin mətbut xidmətinin rəhbəri Gündüz Abbaszadənin matçdan həmən sonra dedikləri məcbur edib. Onun dediyinə görə, dava-dalaşın böyüməsində “İnter”in təhlükəsizlik xidmətinin əməkdaşları və eyni zamanda klubun prezidenti Georgi Nikolovun da rolu olub. Klub rəsmisi qol.az-a açıqlamasında bildirib ki, hadisənin qarşısını almaq əvəzinə aranı daha da qızışdırıblar: “Bu isə yeni əsasnaməyə görə qəbulolunmaz haldır. Təhlükəsizlik xidmətinin işçiləri paltardəyişmə otağına gedən dəhlizdə dura bilməzlər. Onların bu hərəkətinə görə meydan sahibi klub olan “İnter”ə texniki məğlubiyyət də verilə bilər. "İnter"in prezidenti Georgi Nikolova gəlincə, dava-dalaşda onun da rolu oldu. Nikolov sərxoş idi. Hətta uzaq məsadəfən belə ondan spirt iyi gəlirdi”.
Biz də Abbaszadəylə əlaqə saxladıq. “İnter”in məlum bəyanatından sonra o, bunları deməyi lazım bildi: “Meydanda futbolçular arasında baş verənləri hər kəs gördü. Paltardəyişmə otağında isə bu söhbət davam etdi. "İnter"in mühafizə xidmətinin əməkdaşları da orada idi və müdaxilə etdilər. Onlar idman geyimində idi. Bunu açıq-aşkar görmək olardı. İntizam Komitəsinin qərarı var ki, müəyyən olunmuş. ərazilərdə mühafizəçilər ola bilməz. Artıq bu məsələyə hüquqi qiymət vermək bizim yox, AFFA-nın işidi. Biz yalnız olanları bildiririk. Rəqib komandanın nümayəndələri mühafizəçilərin hadisəni sakitləşdirmək üçün orada olduğunu bildirib. Bu da mühafizə xidmətini müdaxiləsini göstərir. O ki qaldı Nikolovun içkili olmasına, doğurdan da içkili idi. Bunlar əsassız fikirlər deyil. Orada işləyən azərbaycanlılar əllərini vicdanının üstünə qoysunlar və desinlər ki, içkili idi, ya yox. Əgər Nikolov doğurdan da içkili deyildisə, o zaman elə bu gecə bütün mətbuat nümayəndələrini yığıb bunu sübut etsin. Hər halda klub prezidenti kimi bunu etmək onun üçün çətin olmaz. Sonda isə yenə demək istəyirəm ki, futbolçular meydanda mübahisə edib və məsələ bitib. Mühafizəçilər niyə müdaxilə edir ki? İnanıram ki, bu işə düzgün hüquqi qiymət veriləcək”.
