Futbolinfo.az sizi "Rəvan"ın sabiq baş məşqçisi Şahin Diniyevin müsahibəsi ilə tanış edir.
– Şahin bəy, istefanıza səbəb nə oldu?
– Komandanın göstərdiyi nəticələrdən razı qalmadım. Eyni zamanda gələcəkdə "Rəvan"a xeyir verə biləcəyimə əmin olmadığım üçün bu addımı atdım.
– Əksəriyyət sizin istefaya göndərildiyinizi düşünür?
– Bu, belə deyil. "Rəvan"dan ayrılmaq barədə qərarı özüm qəbul etmişəm. Rəhbərliklə danışdım, onlar fikrimə hörmətlə yanaşdı. İstefamı qəbul etdiyi üçün rəhbərliyə təşəkkür edirəm.
– Özünüzə əmin olmadığınızı deyirsiz. Komandaya gələndə "Rəvan"a kömək edə bilməyəcəyinizi hiss etmirdiz?
– Komandaya gələndə başqa cür düşünmüşdüm. Reallıqda tam fərqli oldu. İstədiyim alınmadı. İş xətrinə baş məşqçi olmaq mənlik deyil. Əgər istədiyim nəticələri göstərə bilmirəmsə, getsəm yaxşıdı.
– İstefanızla bağlı rəhbərliyə nə vaxt müraciət etdiniz?
– İlk söhbətimiz 3 gün əvvəl oldu. İstefam yanvarın 3-də saat 21-22 radələrində qəbul edildi. Niyə soruşursuz?
– Yanvarın 2-dən Türkiyə mətbuatında Güvənc Kurtarın "Rəvan"a baş məşqçi təyin olunacağı yazılıb. Deməli, rəhbərlik artıq axtarışda olub…
– Bu, klubun daxili işidi. Qərarımı dəyişməyəcəyimi bilərək yeni məşqçinin axtarışına çıxmaq normaldı. Seçim onlara məxsusdu. Rəhbərliyin qərarına hörmətlə yanaşıram.
– Bu kluba gəldiyinizə görə peşmansız?
– Qətiyyən peşman deyiləm. Ümumiyyətlə, peşman olmaq mənə aid məsələ deyil. Hər bir iş yerində nəsə qazanmışam. Burada da qazandıqlarım da oldu, itirdiklərim də.
– Bəlkə rəhbərlik sizə inanmadığına görə bu addımı atıb…
– İstefanı mən vermişəm. Rəhbərlik tərəfindən inamsızlıq olmayıb. İşlədiyim müddətdə rəhbərlikdən ancaq yaxşılıq görmüşəm. Mən yaxşılığı itirən insan deyiləm. Ona görə yalan danışa bilmərəm. Rəhbərliklə aramda heç bir problem yoxdu. (azerisport.az)
