“Le Journal de Montreal”ın verdiyi məlumata görə, Kanada Qran-Pri təşkilatçıları Monrealda keçiriləcək Formula 1 mərhələsinin başlamasına bir neçə gün qalmış biletlərin hamısını hələ də satmayıb.
Mənbəyə görə, terras paketləri, skay-bokslar və tribuna oturacaqları, eləcə də bir günlük biletlər hələ də satışdadır. Bu mərhələ Monrealda ilk Formula 1 sprint həftəsonu olacaq və yarış proqramına Formula 2 və F1 Akademiyası da daxildir.
Bilet qiymətləri ötənilki mərhələdən bəri xeyli artıb. Bəzi üç günlük tribuna paketlərinin təxminən 20% artdığı bildirilir.
“Bu il bir neçə ərazidə tutumu artırdıq, lojalar seqmentində və CGV Experience çimərlik məkanında bilet və qonaqpərvərlik təkliflərimizin çeşidini genişləndirdik. Ümumi giriş zonası, CGV Experience konsert proqramı, terraslar və korporativ müştərilər üçün nəzərdə tutulmayan klub paketi üçün biletlər hələ də mövcuddur”, – deyə Kanada Qran-Prisinin baş direktoru Jan-Filip Paradis bildirib.
