Premyer-liqa
“Sumqayıt”dan XL-ə cavab: Rəsmi müraciət etməyiblər
“Sumqayıt” – “Xəzər Lənkəran” oyunu…
“Sumqayıt” – “Xəzər Lənkəran” oyunundan sonra qonaqların mətbuat katibi Hüseyn Cəbrayıloğlunun azarkeşlərlə bağlı iradı maraqlı alındı. O, 500-dən çox azarkeşin stadiona girib tribunalarda yer ala bilməməsindən şikayətləndi. Cəbrayıloğlu faktiki bu fikirlərlə meydan sahiblərini qonaqpərvər olmamaqda qınadı.
Məsələyə “Sumqayıt”ın mətbuat xidmətinin rəhbəri Rəşad Məmmədovun reaksiyası da maraqlıdı: “Doğrusu, ilk tur üçün belə ajiotaj gözləmirdik və yerləşdirmə ilə bağlı müəyyən problemlər var idi. Amma istənilən halda, əlimizdən gələni etdik, lənkəranlı azarkeşlərin bir qisminə yer ayırdıq. Hətta öz azarkeşlərimizdən bəzilərini yerindən qaldırıb, qonaqlara yer verdik. Amma burada nəsə anlaşılmazlıq olub ki, həmkarım belə deyib. Düzünə qalsa, bunu etməyə də bilərdik. Çünki qonaq tərəf bizə hər hansı müraciət etməmişdi”.
Rəşad bəyə inansaq, oyundan öncə keçirilən iclasda qonaqlar bu barədə istəyinin bildirməyib: “Görüşdən öncə hakim-inspektorun, AFFA nümayəndəsinin və klubların təmsilçilərinin iştirakı ilə iclas keçirilir. Orada forma, stadiona buraxılacaq nəqliyyat vasitələri və s. haqda razılaşmalar olur. Həmçinin qonaqların fan-klubları üçün ayrılacaq yerlə də bağlı müraciət qəbul edilir. Amma lənkəranlılar məhz azarkeşlərlə bağlı heç bir tələb irəli sürməmiş, müraciət etməmişdi. Hətta bizim məktubumuza cavab olaraq onlar oyuna azarkeş gətirməyəcəklərini bildirmişdilər. Bunu oyundan sonra AFFA nümayəndəsi də təsdiq etdi. Rəsmi sənəddə olmadığı üçün bizim onların azarkeşləri üçün yer ayırmaq kimi öhdəliyimiz olmayıb. Ancaq bununla belə, yenə klub rəhbərliyi onların bir qisminin yerləşdirilməsi üçün əlindən gələni etdi. Qonaq azarkeşlər gec, matşın 20-ci dəqiqəsində gəldilər, biz də imkanımız daxilində onların yerləşdirilməsini təmin etdik”.
Hər iki tərəfin mövqeyini işıqlandırmaqla üzərimizə düşəni etdik. Amma burada ya kiminsə yalan danışdığı, ya da kiminsə oyundan öncə veclərinə almadıqları azarkeşlərə məqsədli canıyananlıq etdiyi dəqiqdi.
CAVAD
- Milli komanda2024-05-08 12:17
Millimizin gələcək baş məşqçisi Bakıya gəlir
- Ölkə futbolu2024-05-08 16:22
PFL-lə “YAŞAT” Fondu arasında anlaşma memorandumu imzalandı
- Dünya futbolu2024-05-08 12:02
“Sabah kimsə necə qalib gəldiyimizi xatırlamayacaq”
- Ölkə futbolu2024-05-09 13:53
“Azərbaycanda həm yaxşı pul qazandım, həm də hörmət”