Premyer-liqa
"İnter Arena"da Xizanişvili "şousu"
Topaz Premyer Liqasının 16-cı turu çərçivəsində ke…
Topaz Premyer Liqasının 16-cı turu çərçivəsində keçirilən “İnter” – “Sumqayıt” oyunu məhsuldarlığı və dramatikliyi ilə yadda qaldı. Qalib gələcəyi təqdirdə 2-ci pillənin sahibi “Qəbələ”ylə xallarını bərabərləşdirə biləcək “İnter” cütlüyün favoriti hesab olunurdu. “Sumqayıt” isə yeni baş məşqçisi ilə qeyri-sabit nəticələrə imza atsa da, ölkənin aparıcı klublarına başağrısı olmağı bacaran kollektiv imici formalaşdırmışdı ki, bu gün bunun bir daha şahidi olduq.
Artıq 2-ci dəqiqədə ötən tur “Kəpəz”in qapısına da yol tapmağı bacaran Amil Yunanov Zurab Xizanişviliylə Səlahət Ağayev arasında baş verən anlaşılmazlıqdan məharətlə yararlandı. Nəzərə alsaq ki, cari mövsümdə bu, gürcü liberonun ilk belə kobud səhvi deyil və o, olduqca şübhəli və gözlənilməz anlarda səviyyəsinə uyğun olmayan yanlışlıqlara yol verir, düşünməyə dəyər. Kimlərsə bizi yersiz şübhələrdə ittiham edə bilər. Belələrinə Avropa Liqasında “Hafnarfyordur”la Bakıdakı matçı xatırlatmaq istəyərdik. Qısa zaman kəsiyində Xizanişvilinin ayağı iki dəfə “elə sürüşdü” ki, hesab bir göz qırpımında 1:0-dan 1:2-yə çevrildi…
Əlbəttə, kimin hansı hoqqadan çıxmasının nə Yunanova, nə də “Sumqayıt”a dəxli yoxdu. Ancaq fakt budu ki, zəngin karyeraya sahib olan Xizanişvili bu gün 5 min manata oynayır. Qane olurmu? İnandırıcı görünmür…
Hissənin ortalarına yaxın meydan sahibləri qolun şokunu üzərlərindən ata bildilər. Amma çox çəkmədi ki, Slavik Alxasov Ağabala Ramazanovun ötürməsindən maksimum yararlanaraq, 2-ci dəfə Səlahəti məyus etməyi bacardı. “Gənclik şəhəri”nin 31 azarkeşi (məhz bu sayda fanat qrupu mərkəzi tribunaların sağ tərəfində yerləşən qapının arxasında qərarlaşmışdı) bu qol sevincinin dadını çıxarmamış, Yunanov Səlahət Ağayevin yersiz çıxışını cəzalandıraraq, özünün 2-ci, komandasının 3-cü qoluna imza atdı.
Düşünmək olardı ki, oyunun müqəddəratı həll olunub. Amma fasiləyə 1 dəqiqə qalmış Yuri Fomenko fərqi azaltdı. Fasilədən 7 dəqiqə sonra Elnur Abdullayev baxımlı qolla fərqi minimuma endirəndə, düşünmək olardı ki, meydan sahibləri təzyiqi artırıb ən azı heç-heçəyə nail olacaqlar. Zaur Svanadzenin oyunun sonlarına yaxın cəmi 2 müdafiəçiylə oynaması da oyunu xilas etmək istəyindən xəbər verirdi. Ancaq ən maraqlısı budu ki, qol epizodları daha çox “İnter”in qapısı qarşısında yaranmağa başladı. Oyunu əks-hücumlar üzərində quran qonaqlar dəfələrlə fərqi artıra bilərdilər.
Bu abzas görüşün baş hakimi Rəvan Həmzəzadənin sərt oyuna imkan yaratması, futbolçuların simulyasiyalarına uymamasına həsr oluna bilərdi. Ancaq kobud və sərt oyunla fərqi düzgün müəyyənləşdirməkdə çətinlik çəkən ədalət təmsilçisi, 83-cü dəqiqədə “gülü lap burnundan vurdu”. Ağabala Ramazanova qarşı Xizanişvilinin cərimə meydançasında qayda pozuntusunu simulyasiya kimi qələmə verən Həmzəzadə “Sumqayıt”ın oyunçusuna sarı vərəqə göstərdi. Bu da oldu bizim hakimə həsr olunan abzas.
Matç başa çatdıqdan sonra Zurab Xizinaşvilidən müsahibə götürmək cəhdimiz isə, futbolçunun arxa qapıdan qaçması səbəbindən baş tutmadı. Baxmayaraq ki, onu gözləməyimizdən xəbəri var idi. Nə deyirik, qapın həmişə açıq olsun, Zurab.
CEYHUN ƏLİYEV
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Premyer-liqa2024-05-05 20:57
“Sabah”dan növbəti qələbə
- Milli komanda2024-05-04 15:39
Millimiz UEFA İnkişaf Turnirində ikinci oyununda da uduzdu
- Premyer-liqa2024-05-04 18:59
Samir Abasov: “Bu, “Qarabağ”la matçdakı yorğunluqdan irəli gələ bilər” – VİDEO