Ölkə futbolu
Abdullanın xəncəri
“Səhranın bəyaz günəşi” filmində Sovet ordusunu…
“Səhranın bəyaz günəşi” filmində Sovet ordusunun əsgəri Petruxa cani kimi qələmə verilən Abdullanın 7 arvadından biri – Gülçataya aşiq olur. Özü də görməzə-bilməzə. Axı, Gülçatay xanım çöhrəsini heç kimə göstərmir, niqab altında gizlədir. Əsgər Petruxa isə elə hey düşür bu xanımın arxasınca ki, göstər o gül camalını, ey Gülçatay!..
Təəssüf ki, Gülçatay niqabı kənara atanda onun libasının altından Abdulla çıxır. Petruxa rolunun ifaçısının fəaliyyəti bununla da yekunlaşır – Abdulla onu qətlə yetirir. Özü də Şərq ənənələri üslubunda: sanballı bir xəncərlə…
Dərinliyə varanda məlum olur ki, kinematoqraf Abdullanı cani kimi qələmə verməyə cəhd göstərsə də, əslində, kişinin oğlu namusu hesab olunan zövcəsinə tamah salan bir xristianı qanına qəltan edir.
Maraqlıdı ki, üzübağlı qadınla problem yaşanması haqda çəkilən filmlərə Azərbaycan kinematoqrafında da rast gəlmək mümkündü. “Gülnaz”ın yerinə “Sərvər”in çıxdığını yəqin hər kəs xatırlayar. Məşəd İbadın məşhur kəlməsi kimi: “Bunu gətirəndə baxmazlar ki, kişidi, yoxsa arvad?”.
Azərbaycan futboluna sırınan Berti Foqts bəh-bəhlə gətirildi və 7 ildən sonra məlum oldu ki, AFFA-nın baş katibi Elxan Məmmədovun yedizdirib-içizdirdiyi şəxs, təsəvvürünə gətirdiyi “gözəl Gülçatay” deyilmiş. Abdulla (Foqts) xəncərini götürüb, sancdı Petruxanın (Azərbaycan futbolunun) ürəyinə.
Sual oluna bilər ki, Abdullanın “edamı”nın il mərasimini də vermişik, indi nə vermisiniz ki, ala bilmirsiniz bu qocadan? Cavabı üzdədi, hərçənd, azacıq düşünməyə ehtiyac var. Yığma komandanın baş məşqçisi İcraiyyə Komitəsi tərəfindən təsdiq edilir. Həmin İcraiyyə Komitəsi AFFA-nın ali qanunverici orqanıdı. Çıxardıqları qərarlar da kimlərinsə maraqlarına deyil, Azərbaycan adlı məmləkətin futbol təsərrüfatının rifahının yaxşılaşdırılmasına yönəldilməlidi.
Budəfəki İcraiyyə Komitəsinə qiymət vermək hələ ki, tezdi (hərçənd, heyəti ötəndəfəkindən çox da fərqlənmir). Ancaq bu komitədə təmsil olunan “11-lik” milli komandamızdakı “11-lik”dən də böyük önəm kəsb edir. Qərar verməzdən öncə niqab altında gizlənən futbolumuzun əsl çöhrəsinə uyğun addım atmaq gərəkdi. Əks halda əvvəl-axır bir “xəncərli Abdulla” tapılacaq.
CEYHUN ƏLİYEV
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-23 08:00
“Səbail” “Sabah”a uduzsa…
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”