Ölkə futbolu
Bir hissəlik AZAL, bəxtsiz “Kəpəz”
Topaz Premyer Liqasının son – 4-cü dövrəsinə start…
Topaz Premyer Liqasının son – 4-cü dövrəsinə start verilib. Çempionat həlledici mərhələyə qədəm qoyub.
Bəs, ilk 3 dövrədəki göstəricilər necə olub? Turnir cədvəlindəki mövqelər komandaların real gücünü əks etdirirmi? Sonuncu dövrədə kimdən və nə vaxt ehtiyatlanmaq lazımdı? Bu yazımızda ilk 3 dövrədə Premyer Liqa iştirakçılarıyla bağlı bir sıra statistik göstəriciləri ortaya qoyacaq və bunun əsasında nəticələri sizlərlə bölüşəcəyik.
Məlum məsələdi ki, futbolda qollar daha çox fasilədən sonra vurulur. Ancaq Azərbaycan futbolunda bunun əksini də görmək mümkündü. AZAL-la “Sumqayıt” üçün yazılmamış futbol qaydaları mövcud deyil. Vurduğu qolların 53 faizi ilk 45 dəqiqədə qeydə alınan AZAL-a şükür. Kamran Quliyevin rəhbəri olduğu “Sumqayıt” demək olar ki, cəmi 1 hissə futbol oynayır. Hakimlərin fasiləyə səsləndirdiyi fitdən sonra isə “Sumqayıt” “fəaliyyətini dondurur”. “Gənclik şəhəri” təmsilçisinin ilk 3 dövrədə vurduğu qolların 64 faizi 1-ci hissədə qeydə alınıb.
“Sumqayıt” 2-ci hissədə vurulan və buraxılan topların fərqinə görə də “seçilir”. Komandanın fasilədən sonrakı saldosu -14-ə bərabərdi. Bu da Samir Abasovun yetirmələrinin fiziki cəhətdən 90 dəqiqə mübarizə aparmaq gücündə olmadıqlarından xəbər verir. Elə son 15 dəqiqədə 11 dəfə mərkəzə dəvət olunmaları da dediklərimizin əyani sübutudu.
Ölkə çempionatının “ən bəxtsiz komandası” isə (faiz etibarı ilə) “Kəpəz”di. Gəncə təmsilçisi qapısında gördüyü qolların 35 faizini son 15 dəqiqədə buraxıb. Bu göstəricidə ən intizamlı komanda “Qəbələ”di. Roman Qriqorçukun yetirmələri son 15 dəqiqə kəsiyində ümumi buraxdıqları qolların cəmi 18 faizini qapılarında görüblər.
Son 15 dəqiqəyə fikir verdikdə, daha hazırlıqlı komandalar da üzə çıxır. Fiziki cəhətdən daha dözümlü görünən “Qarabağ” və “Qəbələ” məhz bu vaxt kəsiyində daha çox fərqləniblər. Sabah Qəbələdə üz-üzə gələcək komandaların 75-90-cı dəqiqələrdə vurduqları qol faizləri belədi: “Qarabağ” – 40, “Qəbələ” – 38.
Sonda penalti zərbələrinə də diqqət yetirək. Çempionatın lideri – “Qarabağ” ən çox hücum edən komandadı ki, hamıdan çox penalti zərbəsi vurmaq hüququ da əldə edib. Ağdam təmsilçisi 8 mümkün şansdan 7-ni qola çevirib. Vurulmayan 11 metrlik cərimə zərbəsi isə “İnter”lə oyunda, hazırda “Zirə”nin şərəfini qoruyan Elvin Məmmədovun Qurban Qurbanovun göstərişinə əsasən bilərəkdən topu kənara vurmasından sonra baş verib.
Çempionat başa çatmaq üzrə olsa da, hələ də penaltidən fərqlənməyən komandalarımız da var. Bu siyahıda “seçilənlər” “İnter”lə “Sumqayıt”dı. Hər iki komanda mövsüm ərzində 1 penalti vuruşu hüququ qazanıb ki, bundan da faydalana bilməyib.
CEYHUN ƏLİYEV
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Ölkə futbolu2024-04-25 12:30
AFFA-dakı yoxlamaların nəticəsi: “Sumqayıt”ın prezidenti dəyişəcək
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”
- Ölkə futbolu2024-04-25 17:10
Klublar çətin vəziyyətdə: AFFA yardımları dondurub