Zirədə 74 damğası: “uçan holland”dan 3 xallıq atış – FOTOLAR

“Zirə”ni asıb-kəsməyə tələsməyək. İlk tur, hava bürkü, oksigen çatışmazlığı, oturuşmamış kollektiv – bütün bunlar dünən keçirilən “Sumqayıt”la qarşılaşmaya damğa vuran amillər idi. Hərçənd, oyunun əvvəlində meydan sahibləri ötənilki komandaya bənzəmirdi.

Orxan Məmmədovun start fitiylə irəli atılan Adil Şükürovun yetirmələri artıq 5-ci dəqiqədə hesabı açmağa yaxın idilər. Təmkin Xəlilzadə cərimə meydançasına sol cinahla daxil olub, uzaq dirəyə tərəf ötürmə etdi. Nurlan Novruzov ötürməyə yarım addım gecikməsəydi, yerli fanatlar erkən qola sevinəcəkdilər.

İlk 20 dəqiqə “Zirə”nin aşkar ərazi üstünlüyü şəraitində keçdi. Lakin belə havada meydan sahiblərinin təklif elədiyi tempə sonadək dözəcəkləri inandırıcı görünmürdü. “Sumqayıt”a gəlincə, xətlərarası əlaqənin ciddi şəkildə axsadığı hiss olunurdu. Qonaqlarda aşıb-daşan yeganə məqam isə istəkli olmaları idi. Komandaya cəlb olunan təcrübəli Rail Məlikov müdafiə xəttində “Mətanət-A” sementindən istifadə etdiyini göstərirdi. İnsafən, Fərhad Vəliyev də uzun illər oyun praktikasından korluq çəkdiyini hiss etdirmirdi. Hərçənd, deyəsən, bu qapıçının alın yazısı ehtiyatda qalmaqdı. Çünki yaxın günlərdə Kamran Ağayevin “Sumqayıt”a keçəcəyi gözlənilir və belədə, millinin əsas qolkiperinin “papağını günə verəcəyi” inandırıcı deyil.

İlk yarının 2/3 hissəsi arxada qaldığı dəqiqədə Orxan Məmmədov su fasiləsi elan etdi. Görünür, qəsəbəlilər bu imkandan dozadan artıq istfadə etdilər. Hər halda, son 15 dəqiqədə “Zirə” özünü dincə qoydu. Qonaqların heyətində liderliyi üzərinə götürəcəyi gözlənilən Vaqif Cavadov ən çox top itkisi edən futbolçu oldu. Ancaq söhbət ilk yarıdan gedir. Çünki fasilədən sonra Cavadov xeyli fəallaşdı.

İkinci hissə haqda ilk 45 dəqiqə kimi pozitiv fikirlər irəli sürmək olmur. Hava şəraiti futboçuların tükənməsini şərtləndirmişdi. Ancaq Cavadov sanki cibində oksigen balonu ilə meydanda işləyirdi. Ancaq ona bu imkanı yaradan Yusif Nəbiyevi qeyd etməmək ədalətsizlik olar. Çox, lap çox epizodda 19 yaşlı müdafiəçi hücuma dəstək olmaqla, “Zirə”nin futbolçularının diqqətini üzərinə çəkirdi. Nəticədə, Cavadov üçün boş zona açılırdı.

“Zirə”nin yeni transferləri barədə ilk oyuna görə fikir bildirmək tezdi. Bu üzdən də Şükürovun yaradıcılığına mənfi rəy bildirməyə tələsməyək. Gördüklərimiz müsbət heç nə deməyə əsas vermədiyi üçün hələlik səbr əyləcini basmağı qərara alırıq.

Qonaqların fasilədən sol cinahdakı fəallığı 74-cü dəqiqədə 74 nömrəli maykanın sahibi sayəsində bəhrəsini verdi… Yusif Nəbiyev rəqibindən sıyrılaraq, Vaqif Cavadovu zərbə mövqeyinə çıxardı və Hollandiya “Tvente”sinin sabiq oyunçusu möhtəşəm zərbəylə Anar Nəzirovu kapitulyasiyaya məcbur etdi.

Qoldan sonrakı dəqiqələr gərgin anlara səhnə oldu. Fnal fitinə 10 dəqiqə qalmış baş hakim də “payını aldı”. Amil Yunanova sarı vərəqə göstərdiyi epizodda Orxan Məmmədovun ünvanına “bu, katastrofadı (faciədi)” ifadəsi işlədən qonaqların çalışdırıcısı emosiyalarını cilovlaya bilmədi.

Matç başa çatır. Qonaqların sevincinin həddi-hüdudu yoxdu. Daim çempionatda uğursuz start götürən “Gənclik şəhəri” təmsilçisi bu dəfə Zirə səfərindən maksimal baqajla qayıdır. Qarşıdan isə Abasovun yetirmələrini daha ciddi sınaq gözləyir: son 3 ilin əvəzsiz çempionunun timsalında. Həmin oyunda onlar "Qarabağ"ın kapitanı Rəşad Sadıqovun qanını yenidən qaraltmağa çalışacaqlar. Çünki "Zirə"nin qeyri-rəsmi idarəçisi Ağdam klubunun məşqini buraxıb bu oyuna qələbəni qeyd etməyə gəlmişdi. Qismət olmadı…

CEYHUN ƏLİYEV