“Bir aktyorun tamaşası”

Premyer Liqanın ilk turunun son qarşılaşması neytral meydanda baş tutdu. “Qəbələ” doğma meydanının qeyri-qənaətbəxş vəziyyətdə olması ilə əlaqədar “Kəpəz”i Mərdəkanda, gəncəlilərin Avropa Liqasının ev oyunlarını keçirdiyi “Dalğa Arena”da şərti olaraq, qəbul edirdi.

Aydın məsələ idi ki, Avropa Liqasının pley-off mərhələsinə yüksələn “Qəbələ” beynəlxalq yarışdakı futbolu ortaya qoya bilməyəcəkdi. Bunun bir neçə obyektiv səbəbi var idi. Əvvəla, qitəmiqyaslı turnirlərdən fərqli olaraq, bu matçda Roman Qriqorçuk minimum 5 yerli futbolçuya şans verməli idi. İkinci məqam psixoloji hazırlıqla bağlıdı. Təbii ki, “Kəpəz”lə oyunda “Lill”ə qarşı matçdakı motivasiyanı gözləmək sadəlövhlük olardı.

Şahin Diniyev isə rəqibin tam diqqətini ölkə çempionatına yönəltməməsindən istifadə etmək niyyətində idi. Doğrudu, matçın start fitindən sonrakı ilk dəqiqələrdə “qırmızı-qaralar” daha fəal təsir bağışlayıdılar. Ancaq tədricən “Nizami yurdu”nun təmsilçiləri sürəti artırmaq hesabına topa sahibolmada önə keçdilər. Bunda Kərim Diniyevlə Serjinyonun rolunun böyük olduğunu qeyd etməliyik. Dario Federiko da cinahdan mərkəzə irəlilədikdə Dmitri Bezotosnını narahat etməyi unutmurdu. Əks cinahdakı Nicat Qurbanov da sürətli reydləriylə diqqət çəkirdi.

Ancaq oyunda dönüş nöqtəsi gözlənilməz yerdən gəldi. Rəşad Sadiqovun zədələnməsindən sonra Qriqorçuk məcburi əvəzetməyə məhkum oldu. Meydana daxil olan Tellur Mütəllimov isə ümidləri artıqlaması ilə doğrultdu. Teo Uiksi Rəşadın mövqeyinə keçirən ukraynalı mütəxəssis Mütəllimova azad rəssam funksiyasını həvalə etdi.

Doğrudu, ərazi üstünlüyü əvvəlkitək “Kəpəz”in tərəfində idi. Gəncəlilər daha çox topa nəzarət edir, hücumlar qurur, bəzi hallarda təhlükəli zərbələr endirirdilər. Ancaq həmin epizodlarda da Dmitri Bezotosnı etibarlı oyunu ilə seçilirdi.

Fasilədən sonra da oyunun ssenarisi dəyişmədi. Ancaq 58-ci dəqiqədə olduqca kuryoz bir hadisə yaşandı. Mərkəz dairəsi yaxınlığında qayda pozuntusu qeydə alınmışdı. Meydan sahiblərinin qapısına təyin olunan cərimə zərbəsi zamanı “Kəpəz”in 6 futbolçusu cərimə meydançasına doluşmuşdu. Üstəlik, daha iki futbolçusu rəqib qapısına dönən topa zərbə üçün şərti zonada qərarlaşmışdı. Ancaq top Dmitri Bezotosnının üstünə gəlincə, ukraynalı gözləmədən onu Asif Məmmədov istiqamətinə yönəltdi. Yarımmüdafiəçi də çevik tərpənərək, bir toxunuşla Filip Ozobiçin şığıdığı istiqamətə ötürmə etdi. Həmin epizodda artıq 3 qəbələli bir müdafiəçiyə qarşı qalmışdı. Qəribə mənzərə idi. Komanda hesabda geri deyil, oyunun son saniyələri deyil. Adi bir cərimə zərbəsi zamanı belə mövqe səhvi etmək… Qərəz, Ozobiç  ustalıq nümayiş etdirməkdə çətinlik çəkmədi. Lazımi saniyədə ötürmə edərək, Telluru Tadas Simaitislə üz-üzə çıxardı. Gənc yarımmüdafiəçi soyuqqanlılıqla topu tora qovuşdurdu.

Vurulan ikinci qolda da Tellurun rolu böyük oldu. Mütəllimov “Qəbələ”yə gəldiyi ilk gündən əzmkarlığı, işgüzarlığı, komanda üçün çalışqanlığı ilə seçilən Baqali Daboya elə bir ötürmə etdi ki… Nəhayət, forvard “qırmızı-qara” formada qol hesabını açdı. 

Axşamkı oyunun qəhrəmanına gəlincə – bir daha təkrar edirik, söhbət yalnız qol və məhsuldar ötürmədən getmir – heç şübhəsiz ki, bu, Tellur Mütəllimov idi. Oyunu dəfələrlə üzərinə götürən 21 yaşlı yarımmüdafiəçi Roman Qriqorçuku müsbət mənada dilemma qarşısında qoydu. Bəlkə düşünəsiniz, Roman İosifoviç?

CEYHUN ƏLİYEV