Yaroslav Köstl: "Qarabağ"la hər iki oyunda 3 xal qazanmağı hədəfləmişik"

Xəbər verdiyimiz kimi, Azərbaycan Premyer Liqasının 4-cü turu çərçivəsində keçirilən "Qarabağ" – AZAL oyununu izləyənlər arasında Çexiyanın "Slovan"  klubunun məşqçisi Yaroslav Köstl də var. O, matçın fasiləsi zamanı futbolinfo.az saytının əməkdaşının da suallarını cavablandırıb:

– İlk hissədən sonra hesabın 3:0 olması gözünüzü qorxutmur?
– "Qarabağ" güclü komandadı. Fərdi ustalığı ilə seçilən futbolçuları var. Misal üçün, Reynaldo, Riçard Almeyda, Dani Kintana. Bunlar çox təhlükəli futbolçulardı.

– Sizcə, cütün favoriti kimdi?
– Mən "Slovan"ı təmsil etdiyim üçün, öz komandamı qeyd edə bilərəm. Amma "Qarabağ"ın "Viktoriya"ya qarşı hər iki oyununu izləmişəm. Həqiqətən də, Azərbaycan klubu çox yaxşı təsir bağışlayır. 

– Razısızmı ki, "Viktoriya" ilə oyunda Çexiya klubunun bəxti gətirdi?
– Bəli, bununla razıyam. Migel Madera boş qapıya topu vura bilsəydi, "Viktoriya" üçün hər şey bitmişdi. 

– Necə düşünürsüz, qrupun favoriti kimdi?
– Əlbəttə, "Fiorentina". Ancaq mən də "Slovan"lıyam. Ümid edirəm ki, bizim komandamız ikinci pilləni tutacaq. Bakı və Florensiya gözəl şəhərlərdi. 

– İlk oyunu "Qarabağ"a qarşı oynamağınız sizin üçün üstünlükdü?
– Bəli. Bilirəm ki, bizimlə oyun "Tofiq Bəhramov"da yox, "Dalğa Arena"da baş tutacaq. "Dalğa Arena"da azarkeş tutumu az olsa da, "Qarabağ"ın fanatlarının komandalarına yüksək səviyyədə dəstək olacağını da bilirik.

– "Qarabağ"la ilk oyunda neçə xal qazanmağı hədəfləyirsiz?
– Hər iki oyunda 3 xal qazanmaq niyyətindəyik.