"Qızılca"nın hakimliyə “qovduğu” oğul: “Nə edibsə, öz bacarığı sayəsində edib”

Dünən Əliyar Ağayevin Avropa Liqasının qrup mərhələsi çərçivəsində keçiriləcək “Roma” (İtaliya) – “Astra” (Rumıniya) oyununa təyinat alması xəbəri hamını sevindirdi.  Bu, Tofiq Bəhramov və Eldar Əzimzadədən sonra daha bir azərbyancalının dünya futbol xəritəsində parlamasına işarədi.

Bəs, kimdi Əliyar? İstedadlı hakimi yalnız yaşıl meydanlarda görüb, onun işinə qiymət verməklə iş bitmir axı! Hakimin daxili dünyasını valideynindən yaxşı kim tanıya bilər? Ələlxüsus da ki, valideyni onun cığıraçanı olsun. Söhbət sabiq yan xətt hakimi Kərim Ağayevdən gedir.

Beləliklə, gəlin FİFA referimizi atasının gözüylə tanıyaq.

– Uşaqlıq illərini necə xatırlayırsınız?
– Qeyri-adi heç nə etməmişik.  Aktiv uşaq olub. Futbola marağının olduğunu görüb, “Qarabağ”ın uşaq komandasına yazdırdıq. 2-3 il orada oynadıqdan sonra qızılça xəstəliyi keçirdi. Daha sonra 6-7 ay oynamadı deyə, futboldan ayrıldı. Bu oyuna marağı olduğundan “Sabahın ulduzları” çempionatında matçları idarə etməyə başladı.

– Oyunlarını izləyirdiniz?
– Çox nadir hallarda gedirdim. İşlədiyimə görə çox vaxtım olmurdu. Maksimum 5-6 dəfə getmişəm. Amma “Qarabağ”da normal çıxış edirdi.

– Dərslərində davamiyyəti necə idi?
– Dərslərində yaxşı idi, oxuyurdu.
 
– Valideynlər adətən uşağı təhsil və ya idman arasında  seçim qarşısında qoyur…
– Seçimi özü edib, idmana üstünlük verdi, ADBTİA-da oxudu. Sonradan AFFA-nın nəznində olan hakimlik kursuna yazıldı. Universitetdə oxuya-oxuya kurslarda da iştirak edirdi. Həmin vaxtlar mən də hakimlik etdiyimdən, oyunlarını izləməyə vaxtım olmurdu, göstəriş verirdim. Nə edibsə, öz bacarığı sayəsində edib.

– Yəqin bu sənət qandan keçib…
– Mən 8 il hakimlik etmişəm. Əvvələr SSRİ çempionatının 2-ci liqasında hakim olmuşam, daha sonra da Azərbaycan çempionatında işimi davam etdirmişəm. Yəqin bu həvəs Əliyarda da qalıb. 

– Özünüzlə oyunlara aparmısınız?
– Uşaq vaxtı aparırdım, həvəsi var idi. Məktəbli olanda küçə futbolunda da çox oynayırdı. Özü ilə danışdım, dedim ki, futbol həyatda mənə çox şey verib. Onda həvəs yaratmışdım. 

– Məlumdu ki, Azərbaycanda hakimlərin bir əli klubların cibində olur. Onu rüşvətdən necə qorumusunuz?
– Bu haqda nə mən, nə də Əliyar fikirlərşib. 17-18 yaşından bəri namaz qılır.

– Namaz qılıb, pul alan o qədər insan var ki…
– Yəqin bu yola getsəydi, indi bu səviyyəyə gəlib çatmazdı. Düzdü, bəzən səhvlər olur, futbolçular da başa düşür ki, bu, qəsdən edilməyib. Buna görə də bəzən göz yumurlar. 

– Bayaq qeyd etdiniz ki, “Sabahın ulduzları”nda 5-6 oyununa baxmısınız,oradakı idarəçiliyini görüb, hansısa iradlar bildirirdiniz? Ümumiyyətlə, o dövrdə Əliyarın AL-in qrup, 19 yaşlıların Avropa çempionatının final oyunlarını idarə edəcəyinə inanırdınız?
– Əlbəttə, oyunlarını izləyəndə səhvlərini, iradlarımı deyirdim. 19 yaşlıların yarışlarının final mərhələsinə gedəndə həm sevindim, həm də həyəcanlandım. Amma etiraf  edim ki, həlledici görüşə təyinat alacağına nə mən, nə də özü inanırdı. Pley-off mərhələsinin oyunları arxada qaldıqca turnirlə vidalaşan hakimlərin sayı artır. Finala təyinat alanda mənə zəng etdi. Soruşdum ki, evə qayıdırsan? Dedi ki, yox, finalı mənə həvalə etdilər. Sevindirci haldı ki, işinin də öhdəsindən gəldi.

– Yəqin ki, siz də yaxşı başa düşürsünüz ki, Əliyar üçün “Roma”nın oyununa təyinat almaq həlledici tramplin rolunu oynaya bilər. Əgər işi uğurlu olsa, 1-ci kateqoriyaya keçib, Çempionlar Liqasının oyunlarına təyinat alacaq. Bu barədə söhbətiniz olub?
– Ona həmişə məsuliyətinin daha çox olduğunu bildirirəm. Çünki bu yerə çatdıqdan sonra üzərində daha çox işləməlidi. UEFA bu işlərə ciddi yanaşır, əgər bacarsan, vacib qarşılaşmalara təyinat verirlər.

– Mətbuat Əliyarı tənqid edəndə necə münasibət göstərirsiniz?
– Səhvləri saymaq statistikadı. Amma mütəxəssilər baxanda, onun oyunlarında irəliləyişləri görür. Səhvlər həmişə olub. Həm də həmişə tərifləmək yaxşı deyil, hərdən tənqid lazımdı.

– Bu yaxınlarda Əliyarın tənqid olunduğu əsas mövzu o oldu ki, oyunöncəsi püşkatma zamanı yerə düşən “qəpiy”i özü yox, köməkçisi götürür…
– Buna fikir verməmişəm. Özündən soruşaram. Amma deməzdim ki, bu, yaxşı haldı.

– “Roma” – “Astra” oyununa tək, yoxsa ailəvi baxacaqsınız?
– Düzü, oyunun hansı kanalda yayımlanacağını bilmirəm. Amma baxmaq istəyərdim. Evdəkilərin futboldan elə də anlayışı yoxdu, çox vaxt həyəcanlı olurlar. Olur ki, oyunda hansısa xoşagəlməz məqam zamanı məndən çox həyəcan keçirirlər. 

CEYHUN ƏLİYEV