Premyer-liqa
Naməğlubların dueli, “Qarabağ” üçün “asan yem”
Bu gün Azərbaycan Premyer Liqasında ikinci dövrə start g&…
Bu gün Azərbaycan Premyer Liqasında ikinci dövrə start götürür. Futbolinfo.az xəbər verir ki, mövsümün 8-ci turunun ilk oyun günündə iki görüş baş tutacaq.
16:00. İnter – Qəbələ
Hakimlər: RƏVAN HƏMZƏZADƏ, Yaşar Abbasov, Akif Əmirəli, Coşqun Həsənov.
Əlavə köməkçi hakimlər: Rəhim Həsənov, Orxan Məmmədov.
AFFA nümayəndəsi: Rauf Hüseynli.
Hakim-inspektor: Füzuli Nəcəfov.
“İnter Arena” (5300 yerlik).
“Qəbələ” tarixinin ən yaxşı başlanğıcını edib – zirvədədir, uduzmayıb, heç qol da buraxmayıb. Bir oyunda heç-heçə etməsəydi, indi 100 faizlik nəticə göstərmiş komanda ünvanını daşıyacaqdı. Lakin buna məhz “qırımızı-qaralar”ın bugünkü rəqibi – “İnter” imkan verməyib. Avqustun 12-də, Premyer Liqanın 2-ci turu çərçivəsində baş tutan görüşdə yay fasiləsində “İnter”i “Qəbələ”yə dəyişən Nika Kvekveskiri penaltini boşa vermiş, matç qolsuz bərabərliklə yekunlaşmışdı.
Liderin ən yaxın izləyici olan “bankirlər” onlara şamil edilən “gizli favorit” deyimini doğrultmaqdadırlar. Çempionluğa əsas namizəd sayılan “Qarabağ”ı da məğlub edən “İnter”, qəbələlilər kimi məğlubiyyət acısı yaşamayıblar. Ona görə də, turun mərkəzi qarşılaşmasını naməğlubların dueli də adlandıra bilərik.
Rəqiblərin son görüşləri ilə bağlı statistikaya da nəzər yetirsək, pis olmaz: son 2 oyunda qol vurulmayıb. “Qəbələ” 3 matçdır qol buraxmır. “İnter” 4 qarşılaşmadır qalib gəlmir.
STATİSTİKA
33 oyun, +14=12-7, top fərqi 44-26
İLK DÖVRƏ
12.08.2016. "Qəbələ" – "İnter" – 0:0.
OYUNDAN NOTLAR
– Heç bir futbolçu cəza üzündən bugünkü oyunu buraxmalı olmayacaq.
– “İnter”ib düşərgəsində 3 zədəli var: Adrian Skarlatake, Samir Zərgərov və Mirsahib Abbasov.
– “Qəbələ”də isə Nika Kvekveskiri zədəsini sağaltmaqla məşğuldu.
REFERİ
Nə qədər qəribə görünsə də, FIFA referiləri ola-ola, turun mərkəzi oyunu təcrübəsiz baş hakimə tapşırılıb. Rəvan Həmzəzadə cari çempionatda 2 oyun idarə edib və həmin matçlarda aşkar favorit olub. Yəni, “Qarabağ” səfərdə “Sumqayıt”ı (2:0), “Qəbələ” isə “Zirə”ni (2:0) asanlıqla məğlub etdiyindən, həmin matçlarda ədalət təmsilçilərinin üzərinə böyük iş düşməmişdi. Bugünkü oyunun yükü isə ağırdı. Ümid edək ki, Həmzəzadə işinin öhdəsindən gələcək.
18:30. Qarabağ – Sumqayıt
Hakimlər: ƏLİYAR AĞAYEV, Zeynal Zeynalov, Rza Məmmədov, Namiq Hüseynov.
Əlavə köməkçi hakimlər: Rauf Cabbarov, Ramil Diniyev.
AFFA nümayəndəsi: Maşallah Əhmədov.
Hakim-inspektor: Murad Məmmədov.
“Azərsun Arena” (5800 yerlik).
“Qarabağ”la “Sumqayıt” arasında ciddi səviyyə fərqi olsa da, turnir cədvəlində qonşudurlar. “Üçlüy”ü qapayan ağdamlılar bugünkü rəqiblərini 5 xal qabaqladıqları halda, liderdən 6 xal geri qalırlar. Bu isə son 3 mövsümün çempionu olan kollektiv üçün adət etmədiyi bir haldır.
Məntiqlə, “Qarabağ” qonaqları məğlub etməkdə çətinlik çəkməməlidir. Ağdam klubu son 3 matçda quru hesablı qələbə qazanıb. “Sumqayıt” son 8 oyunda yalnız 1 dəfə qalib gəlib və son 7 səfər qarşılaşmasında 1 xal əldə edib. Yəni, statistika deyir ki, qonaqlar Qurban Qurbanovun komandası üçün “asan yem”dir.
“Azərsun Arena”dakı matç start götürənə qədər, “İnter” – “Qəbələ” matçı başa çatmış olacaq. Həmin görüşdə ilk iki pillədə qərarlaşan kollektivlərdən ən azı biri xal itirəcək ki, bu da “Qarabağ” üçün əlavə motivasiyadır.
STATİSTİKA
17 oyun, +11=2-4, top fərqi 33-9
İLK DÖVRƏ
11.08.2016. "Sumqayıt" – "Qarabağ" – 0:2
OYUNDAN NOTLAR
– Komandalardan heç birinin heyətində cəzalı futbolçu yoxdu.
– “Sumqayıt”da Mikayıl Rəhimovun zədəli günləri davam edir.
– “Qarabağ” düşərgəsində isə ciddi zədədən əziyyət çəkən yoxdu.
REFERİ
İlk dövrədə Premyer Liqanın 5 oyununu idarə edən, Avropa Liqasının qrup mərhələsinin matçlarını idarə edən Əliyar Ağayev üçün “Qarabağ” – “Sumqayıt” dueli asan gəzinti olmalıdır. 90 dəqiqənin tamamından kiminsə FIFA referisindən şikayət edəcəyini düşünmürük.
CAVAD
- Ölkə futbolu2024-05-15 15:38
AFFA 6 kluba lisenziya verdi
- Ölkə futbolu2024-05-15 09:42
Klublarımızın rəqibləri bəlli olur: yalnız “Neftçi” səpələnmişlərdə olacaq
- Ölkə futbolu2024-05-15 14:39
Premyer Liqanın ən reytinqli futbolçusu: ilk 6 yer “Qarabağ”ın oldu
- Müsahibə2024-05-15 08:00
Xvalko qərarını verməyib: “Həmin anda nəsə deməyin xeyri olmayacaqdı”