Ölkə futbolu
Prezidentdən ötürmə…
Azərbaycan prezidenti İlham Əliyevin futbolumuz haqda son dediklər…
Azərbaycan prezidenti İlham Əliyevin futbolumuz haqda son dedikləri sevindiricidi. Artıq hiss olunur ki, ölkə başçısının milli komandamızdan incikliyi keçmişdə qalıb.
Futboldakı ardıcıl uğursuzluqlar, prezidentin canlı izlədiyi Azərbaycan – Portuqaliya (U-17) matçındakı böyükhesablı məğlubiyyət incikliyə, narazı qalmağa tam əsas verirdi. Lakin klublarımızın qitəmiqyaslı turnirlərdə ardıcıl uğurlu çıxışını milli komandanın da davam etdirməsi baxışları dəyişib. Xüsusilə də əsas yığma komandamızın DÇ-2018-in seçmə mərhələsinə əla start verməsi prezidentin ürəyincədi.
İlham Əliyevin dünən Xorvatiya prezidenti xanım Kolinda Qrabar-Kitaroviç ilə görüşdən sonra verdiyi açıqlamadan da bunu hiss etmək olar: “Düşünürəm ki, xalqlar arasında əlaqələrin və Xorvatiyanın Azərbaycanda təbliğinin yaxşı nümunəsi böyük işlər görən Robert Prosineçkinin mükəmməl fəaliyyətidir. Bu qədər uzun illər gözləyəndən sonra biz indi komandamızla fəxr edirik. Çünki onun rəhbərliyi altında komandamız hazırda qrupda ikinci yerdədir. Üç oyundan sonra onların hesabında 7 xal – 2 qələbə və 1 heç-heçə var. Bu, mühüm nailiyyətdir. Əlbəttə, onun burada etdikləri təkcə futbol fanatları tərəfindən deyil, həm də xalqımız tərəfindən yüksək qiymətləndirilir və təbii ki, hamı onun Xorvatiyadan olduğunu bilir. O, sizin ölkənin yaxşı səfiridir və mən fürsətdən istifadə edərək ona uğurlu işinə görə təşəkkür etmək istərdim. Bu da bizim əməkdaşlığımızın yaxşı nümunəsidir və xanım prezidentin səfəri sözsüz ki, bunun üçün yeni imkanlar açır”.
Ölkə başçısı uzun müddətdi futbol haqda bu qədər məmnunca açıqlama vermirdi. Onun bu açıqlamasını görülən işlərdən razılıq, AFFA-nın fəaliyyətindən məmnunluq kimi qəbul etmək olar. Bu, eyni zamanda futbolun inkişaf proqramında növbəti mərhələnin başladılması üçün zəmindi. Diqqət yetirin, millimizin 3 oyundan 7 xal topladığını bildirən dövlət başçısı, de-fakto yığmanın hər oyunu ilə maraqlandığını etiraf edib.
Onun necə futbol fanatı olduğunu hələ Milli Olimpiya Komitəsinin prezidenti olduğu dövrlərdən xatırlamaq olar. Deməli, millimiz acı günlərini yaşayanda da, İlham Əliyev komandanı izləyib. İzləyib, ancaq futbola ayrılan dividendlərin fayda verməməsinə üzülüb və etirazını susqunluqla bildirib.
İndi isə fərqli mənzərə yaranıb. Bu gün milli komandanın şərəfini qoruyan oyunçular tarixi ayaqları ilə yaza bilərlər. Özü də söhbət təkcə göstərdikləri nəticələrdən getmir. Məhz sərgilədikləri əzmkar oyun neçə-neçə futbol məktəbinin açılmasının təməlini qoya bilər. Klub futboluna da sərmayə yatırımı bumu yenidən baş qaldıra bilər. Özü də bütün bunlar iqtisadi vəziyyətdən heç də əlverişli durumda olmadığımız bir zamanda baş verir.
AFFA rəhbərliyi qazandığı bu dividenddən maksimum yararlanmalıdı. Bunun üçün ilk növbədə futbolçularla söhbətlər aparmaq, onların hansı məsuliyyətli missiyanı çiyinlərində daşımalı olduqlarını izah etməlidirlər. Eyni zamanda, Prosineçki üçün də əla fürsət yaranıb. Futbolçu kimi Madrid “Real”ı və “Barselona”da fəth etdiyi zirvələri heç kim unutmur. Ancaq məşqçi kimi Azərbaycan yığmasının “sükanı arxasında” qazanacağı istənilən uğur, onun üçün bu sahədə də gələcək karyerasının təməl daşı rolunu oynayacaq.
Ölkə başçısı ilk ötürməni etdi. İndi “topu qapıdan keçirmək” növbəsi onu bu ötürməyə sövq edən milli üzvləri, baş məşqçi və AFFA rəhbərliyindədi.
AĞA
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Premyer-liqa2024-05-05 20:57
“Sabah”dan növbəti qələbə
- Milli komanda2024-05-04 15:39
Millimiz UEFA İnkişaf Turnirində ikinci oyununda da uduzdu
- Premyer-liqa2024-05-04 18:59
Samir Abasov: “Bu, “Qarabağ”la matçdakı yorğunluqdan irəli gələ bilər” – VİDEO