Ölkə futbolu
“Bənövşə”ni solduracaq heyət
“Qarabağ”ı Avropa Liqasının qrup mərhələsinin ən v…
“Qarabağ”ı Avropa Liqasının qrup mərhələsinin ən vacib oyunundan 2 gün ayırır. İndi hamı əlində kalkulyator xorvatiyalı İvan Bebekin start fitini gözləyir. İtalyanların “hansı rəqsi ifa edəcəklərini” bir kənara qoyub, Azərbaycan çempionunun ideal “11-liy”ini müəyyənləşdirməyə çalışaq.
Çərçivədə İbrahim Şehiçin yer alacağına şübhə edən çətin ki, tapıla. Müdafiənin mərkəzində Rəşad Sadıqovun Bədavi Hüseynova yoldaş olacağına ümidlər olduqca böyükdü. Çünki kapitanı layiqincə əvəz edə biləcək futbolçu Qurban Qurbanovun arsenalında yoxdu. Məcburiyyətdən bəzi hallarda bu mövqeyə çəkilən Maksim Medvedev isə sarı vərəqə limitinə görə, italyanlara qarşı forma geyinməyəcək. Qalır Elvin Yunuszadə… Sadıqovun müalicəsini yarımçıq saxlamasının səbəbi də məhz göstərdiyimiz amillərdi. Təcrübəli müdafiəçinin ideal formada olmasa belə, komanda yoldaşlarına ruh yüksəkliyi gətirəcəyinə heç bir şübhə yoxdu. Müdafiənin mərkəzində qərarlaşacaq Bədavidən də çox şey asılıdı. Daha gənc, daha sürətli Hüseynov Rəşadı daim sığortalamalıdı.
Cinah müdafiəçisi mövqeyi haqda da birmənalı fikir bildirmək olduqca çətindi. Doğrudu, sol qanad mövzusunun cavabı lakonikdi. Ansi Aqolli deyir ki, “bu cinah mənlikdi”. Ancaq əks tərəfdə qərarlaşacaq futbolçunun kimliyi xeyli sual doğurur. Şans qazandığı bütün oyunlarda özünü müsbət tərəfdən göstərən İlqar Qurbanov daha ağır sınaqlar zamanı Arif Daşdəmirova uduzur. Ancaq Qurban Qurbanov Maksın yoxluğunda məhz bu iki isim arasında seçim etməlidi. Arif cari mövsümdə meydana çıxdığı oyunlarda (istər “Qarabağ”da, istərsə də millidə) çoxsaylı səhvlərlə yadda qalıb. İlk baxışdan baş məşqçi həmsoyadına güvənməlidi. Ancaq iki məqam var ki, bunu unutmamalıyıq. Əvvəla, İlqar ortabab rəqiblərlə oyunda özünü ən yaxşı tərəfdən göstərib. Onun yüksək sürət təklif edən rəqiblə oyunda fiziki cəhətdən 90 dəqiqə tab gətirməsi müzakirə predmetidi. Deməli, baş məşqçi daim bu müdafiəçini əvəzələyəcəyini göz önünə almalıdı. Belədə, ortaya sual çıxır ki, rəqib qapısına qol vurmaq tələb olunarsa, müdafiəçini müdafiəçiylə əvəzləmək çempionumuza hansı dividendi gətirəcək ki? İkinci məqamın adı isə “daxili mətbəx”di. Qurban Qurbanovdan yaxşı buna bələd olan yoxdu. Çünki fiziki və taktiki hazırlıqdan savayı, bu cür qarşılaşmalarda psixoloji amil də ön plana çıxır. Hər halda müəllif fikrimizi təqdim edə bilərik: İlqar daha çox fayda verər.
Miçel Madeyra “Qarabağ”ın “2-ci mərtəbə”də “xilaskar çubuğu”du. İspaniyalı yarımmüdafiəçi bunu dəfələrlə möhtəşəm qolları ilə sübuta yetirib. Lakin o da “Fiorentina”ya qarşı “sarı limit”ə görə iştirak edə bilməyəcək. Dayaq yarımmüdafiəçisi mövqeyi ilə bağlı ilk baxışdan Qara Qarayevin yeri şübhə doğurmur. Ancaq Coşqun Diniyevin “Qəbələ”yə qarşı məlum qalmaqallı matçın sonlarında oyuna daxil olaraq, taleyüklü ötürmələri Qurban Qurbanovu dillemma qarşısında qoya bilər. Məsələ burasındadı ki, Qarayev ancaq qara işin mahir ustasıdı. Bu səbəbdən də istənilən rəqibin əsas diqqəti Riçard Almeydaya yönəlir. Diniyevli “Qarabağ” isə iki cəbhədən təhlükəli ola bilər.
Ancaq oyuna starteji baxımdan qiymət vermək də lazımdı. Ağdamlıların ilk dəqiqələrdən hücuma atılacağı inandırıcı görünmür. Çünki Yunanıstanda PAOK – “Slovan” qarşılaşması “sülh”lə bitərsə, Bakıdakı görüşün hər iki iştirakçısına heç-heçə sərf edəcək. Bütün hallarda, “süvarilər”in ilk dəqiqələrdən irəli atılacağı inandırıcı deyil. Başqa sözlə, Coşqun böyük ehtimalla “təcili yardım” rolunu oynayacaq: qol tələb olunarsa, matçın son 20 dəqiqəsində Qaranın əvəzinə döyüşə atıla bilər.
Hücumameylli yarımmüdafiəçi mövqeyində isə Rahid Əmirquliyev şəriksiz görünür. Doğrudu, Qurban Qurbanov sürpriz də edə bilər. Elə həmin Coşqunu məhz hücumameylli yarımmüdafiəçi kimi istifadə etməklə. Ancaq bu, az inandırıcı görünür. Çünki “Fiorentina” ilə matç eksperimentlər meydanı deyil.
Maraqlıdı ki, “Qəbələ”yə qarşı oyun ağdamlıların baş məşqçisini daha bir dilemma qarşısında qoydu: Əfran İsmayılov ehtiyat oyunçular skamyası ilə barışmadığını hər addımı ilə ortaya qoymağı bacardı. Dani Kintana daha çevik, onun fərdi qaydada topla davranışı daha göz oxşayan olsa da, Əfranın həlledici ötürmə bacarığı daha üstündü. Ancaq az öncə qeyd etdiyimiz kimi, baş məşqçinin heyətdə ciddi islahata əl atacağı inandırıcı deyil. Sağ cinahda ispaniyalı əsas fiqur kimi görünsə də, 2-ci hissənin istənilən dəqiqəsində Əfran döyüşə atıla bilər.
Yarımmüdafiənin sol cinahında isə nəhayət ki, əvvəlki Reynaldonu görmək istəyərdik. Braziliyalı futbolçu zədəyə meylli olduğundan, cari mövsüm heç cür formasının zirvəsinə yüksələ bilmir. Təki “Fiorentina” ilə oyun dönüş nöqtəsi olsun. Ancaq çətin ki, Reynaldo 90 dəqiqə meydanda qalsın. Həlledici oyunlarda dəfələrlə xilaskar obrazında ortaya çıxan Muarem Muarem yarımmüdafiənin bu qanadını gücləndirmək iqtidarındadı. Hətta ola bilər ki, əksi baş versin və braziliyalı oyunun sonlarına yaxın döyüşə atılsın.
Hücum xətti ilə bağlı geniş müzakirəyə ehtiyac yoxdu. Mahir Mədətov bu cür oyunlar üçün bişməyib. Dino Ndlovu isə kifayət qədər yaxşı forma yığıb. Təki cənubi afrikalı “bənövşələri solduran” qolu vuraraq, formasına dair yazdıqlarımızda yanılmadığımızı ortaya qoymağı bacarsın.
Qurban Qurbanovun start heyətini müəyyənləşdirmək üçün ixtiyarında 2 gün qalır. Kimə ilk dəqiqələrdən güvənəciyindən asılı olmayaraq, qalib gəlmək üçün çempionumuz mövsümdə ən yaxşı oyununu sərgiləməlidi. Səfərbərlik isə davam edir: hər kəs və hər şey “Qarabağ” üçün!
CEYHUN ƏLİYEV