Lukas Seqoviya: "İki-üç qol vursaq, hakim səhvlərindən danışmağa ehtiyac olmaz"

Azərbaycan Premyer Liqasının 17-ci turu "İnter" – "Neftçi" qarşılaşması ilə başa çatdı. Futbolinfo.az xəbər verir ki, "ağ-qaralar"ın ilk qolunun müəllifi Lukas Seqoviya 3:1 hesabıyla qalib gəldikləri oyundan sonra jurnalistlərin suallarını cavablayıb:

– Oyun haqqında fikirlərini öyrənmək istəyərdik.
– Matça yaxşı başladıq və nəticədə ilk 15 dəqiqədə 2 qol vura bildik. Qollardan sonra komanda olaraq rahatladıq, nəticədə "İnter" fərqi azaltdı. 2-ci hissənin əvvəlində vurduğumuz qol oyunun taleyini həll etdi. Fərqləndiyim üçün də çox sevincliyəm. 

– Vurduğun qol öncəsi ilk epizodda daha rahat vəziyyətdə hesabı aça bilmədin…
– Birinci epizodda topun mənə gəldiyini görürdüm. Ancaq meydança süni örtüklü olduğundan rahat zərbə endirə bilmədim. Ardınca özümü tarazladım və hesabı dəyişməyə nail oldum.

– Süni meydançada oynamaq çətindi?
– Əlbəttə, çətindi. Uzun zamandı süni meydançada oynamırdım. Buna baxmayaraq futbolda hər bir şəraitə öyrəşmək lazımdı. 

– Bilirsən ki, bu, ölkəmizdəki ən yaxşı süni meydançadı? Bundan da pis vəziyyətdə olan meydançalar var.
– Xeyr, sizdən eşidirəm. 

– Ötən 2 turda "Neftçi" hakim səhvlərindən xallar itirdi. Komanda üzərində təzyiq vardı? 
– Futbol belə bir oyundu. İllərdi oynayıram, artıq öyrənmişəm bu hallara. Hakimlər də insandı, onların da səhvləri ola bilər. Biz çıxıb futbolumuzu oynamalıyıq. Komanda daxilində danışanda da qeyd edirik ki, biz çıxıb mübarizə aparıb 2, 3 qol vursaq, hakim səhvlərindən danışmağa ehtiyac olmaz.

– Mövsüm sonuna kimi neçə qol vurmağı qarşına məqsəd qoymusan?
– Neçə qol vuracağım, məhsuldar ötürmə edəcəyim barədə fikirləşmirəm. Transfer olmadan öncə "Neftçi" haqda maraqlanmışdım. Azərbaycanın ən köklü komandasıdı. Mən də çalışacağam ki, komanda layiq olduğu yerlərə qalxsın.

– Özünüzə sual vermisiz ki, Azərbaycanın ən köklü klubu niyə Premyer Liqada sondan 2-ci pillədə qərarlaşıb? 
– Bu barədə heç kimə sual verməmişəm. Komandamız aşağı pillədədir. Bu, bütün böyük klubların başına gəlir. İnanıram ki, zaman keçdikcə layiq olduğumuz yerlərə yüksələcəyik. Bunlar futbolun içində olan hadisələrdi, qəbul etmək lazımdı.

– İndiyə qədər 8 komandalı çempionatda oynamısız?
– Avstriya liqasında 10 komanda iştirak edir. Bu baxımdan Azərbaycan Premyer Liqası ilə oxşardı.

NİCAT SALMANLI