Liderlər üçün çətin səfər

Bu gün Topaz Premyer Liqasında 18-ci tura start veriləcək. Futbolinfo.az xəbər verir ki, ənənəvi olaraq, yenə də iki görüş ilk, qalan ikisi isə ikinci oyun günündə baş tutacaq.

Turun açılış matçında son çempion və lider "Qarabağ" səfərdə "Kəpəz"lə üz-üzə gələcək. Günün digər görüşü isə liderin əsas izləyicisi "Qəbələ" ilə son mövsümün gümüş mükafarçısı "Zirə" arasında baş tutacaq.

Topaz Premyer Liqası
18-ci tur
12 fevral

“Kəpəz” – “Qarabağ”

Hakimlər: Ömər Paşayev, Namiq Hüseynov, Vüqar Bayramov, Orxan Məmmədov.
AFFA nümayəndəsi: Eldar Qasımov.
Hakim-inspektor: Xaqani Məmmədov.
Gəncə şəhər stadionu, 14:30.

"Kəpəz" uzun müddət idi Gəncədən qaçaq düşmüşdü. Belə ki, bu klubun ev oyunlarını keçirdiyi stadionun qazonu onsuz da bərbad halda olduğundan qış aylarında burada oyun keçirmək bir qədər də müşkülə çevrilib. Bu üzdən də Şahin Diniyevin komandası ev oyunlarını Bakıda keçirmək məcburiyyətində idi. Lakin bu hal gəncəli futbolsevərlərin heç də ürəyincə deyildi. Komandanın qış fasiləsindən sonrakı üç oyunda ardıcıl məğlubiyyətlərlə də üzləşdiyini nəzərə alsaq, klub rəhbərliyinin "Qarabağ"la oyunu Gəncə şəhər stadionunda keçirməyə qərar verməsini anlamaq olar.

Lakin Ağdam klubu əzəli rəqiblərindən olan "Kəpəz" üçün heç də düşərli rəqib sayılmır. Məsələ burasındadır ki, “Qarabağ” 18 oyundur bu rəqibinə məğlub olmur. 15 ilə yaxındır qalib gəlməyən qərblilər son 7 oyunda qol buraxıb. Gəncə təmsilçisinin son 3 ev oyununda hər iki komanda qol vurub. Bu oyunda da gəncəlilərin "Qarabağ"a qalib gələcəyinə inam çox azdır. Ardıcıl üç məğlubiyyətin verdiyi psixoloji gərginliklə yanaşı, Diniyevin heyətlə də bağlı xeyli sıxıntısı var. Bundan əlavə, azarkeşlər arasında da baş məşqçinin işindən narazı olanların sayı artmağa başlayıb. Diniyev mövsümün sonunadək istefa verməyəcəyini bildirsə də, istisna deyil ki, alınacaq növbəti yenilgi onun da səbr kasasını daşırsın. 

Xatırladaq ki, bu mövsüm Gəncədə baş tutan ilk oyunda "Kəpəz" iddialı rəqibindən xal ala bilmişdi. Həmin matçda Dario Federiko gəncəliləri hesabda önə keçirsə də, bu qış fasiləsi zamanı Ağdam klubunun sıralarını tərk edən Reynaldo bərabərlik qoluna imza atmışdı. İkinci dövrədəki oyunda isə Dino Ndlovunun ilk yarıda vurduğu qol Ağdam klubunun qələbəsi üçün yetərli olmuşdu. 

Statistika: 43 oyun, +14, =8, -20, top fərqi 53:58.

1-ci dövrə: 1:1
2-ci dövrə: 0:1

“Zirə” – “Qəbələ”

Hakimlər: Əliyar Ağayev, Zeynal Zeynalov, Rza Məmmədov, Rauf Cabbarov.
AFFA nümayəndəsi: Mübariz Hüseynov.
Hakim-inspektor: Murad Məmmədov.
Zirə İdman Kompleksinin stadionu, 16:30.

Ötən mövsümün mükafatçılarının duelinə maraq böyükdür. Qış fasiləsindən sonra ardıcıl iki qələbə qazanan, yalnız son turda "Qarabağ"a məğlub olan "Zirə" indi daha bir çempionluğa iddialı komanda ilə üz-üzədir. Ayxan Abbasovun komandası ən azı uduzmamağa çalışacaqsa, "Qəbələ"ni yalnız qələbə düşündürür. Qızıl medallara iddialı Roman Qriqorçukun komandası "Qarabağ"ın Gəncədə mümkün xal itkisinə ümid bəsləməklə Zirədən qalib dönməyə çalışacaq.

Bu komandaların son 3 oyununda “Qəbələ” quruhesablı qələbə qazanıb. “Zirə”nin ev oyunlarında qol vuran komanda qalib gəlir. İndiyə qədərki 6 oyundan 2-də zirəlilər, 3-də isə qəbələlilər qalib gəliblər. Elə top fərqi də "Qəbələ"nin xeyrinədir.

Xatırladaq ki, bu mövsüm keçirilən ilk oyunda "Zirə" doğma meydanda Teo Uiksin dubluna mane ola bilməmişdi. Qəbələdə baş tutan ikinci oyunda isə Filip Ozobiçin yeganə qolu 3 xal üçün bəs etmişdi. Hansı ki, komandası kimi, xorvatiyalı yarımmüdafiəçi də liderlik iddiasındadır. Ötən turda dubl etməklə vurduğu qolların sayını 9-a çatdıran Ozobiç zirvədəki mövqeyini qorumaq üçün yenə də fərqlənməyə çalışacaq.

Statistika: 6 oyun, +2, =1, -3, top fərqi 3:7.

1-ci dövrə: 0:2
2-ci dövrə: 0:1