Zaur Axundov: "Fola"nı keçmək asan olmayacaq"

“İnter”in Müşahidə Şurasının sədri Zaur Axundov Avropa Liqasının 2-ci təsnifat mərhələsi çərçivəsində Lüksemburq “Fola”sı ilə ilk oyundan (1:0) sonra jurnalistlərin suallarını cavablandırıb. Futbolinfo.az həmin müsahibəni təqdim edir:

– Avrokuboklarda zəif komanda qalmayıb. "Fola" da ilk mərhələdə Moldova klubunu mərhələdən kənarlaşdırıb. Mən oyunun asan keçməyəcəyini düşünürdüm. 

– “İnter” “Mladost”la oynadığı kimi görünmürdü…
– Hər oyun eyni səviyyədə keçə bilməz. 3-4 oyun ardıcıl eyni oynamaq da çətindi. 6 gün əvvəl ağır oyun oynadıq. Mövsümün əvvəlində çatışmayan cəhətlər olur. Üstəlik, eyni heyətlə oynayırıq və transferlərimiz yoxdu. Güc eyni oyunçulara düşür. Amma sevindirici haldı ki, 3 oyun keçirmişik və qapımızdan qol buraxmadan qalib gəlmişik. 8 gün vaxtımız var və cavab oyununa hazırlaşacağıq.

– Cavab oyunu üçün plan necədi? Lüksemburqa yaxşı uyğunlaşmaq üçün komandanın səfərə daha erkən yollanması mümkündü?
– Oyundan 2 gün öncə getmək istəyirik. Belə planlaşdırmışıq.

– 5-ci gün potensial rəqib bəlli ola bilər…
– Açığı, belə düşünmürəm. Mənə fərqi yoxdu, nə potensial rəqib, nə 5-ci gün… Mən futzalda da optimist insanam və bunu çox gözəl bilirsiz. Mərhələ adlamayınca heç nə deməyəcəm. Lüksemburq klubunu keçmək asan olmayacaq. Heyətdə zədəli oyunçular da var. Çətin olacaq.

– Komandanın son durumu necədi?
– Komandanın maliyyə durumunda heç bir problemi yoxdu. AFFA-nın gül kimi bazası var. Dünya və Avropa səviyyəli stadion və bazadı. Ot örtüyü də standartlara uyğundu. Üstəlik şəhərə yaxındı və məşqlə toplanışlar üçün əlverişlidi. Bizim üçün bura daha əlverişlidi.

ELMAR ABDULLA-ZADƏ