8 ayda 1 oyun keçirən qapıçı: Məmmədov “Neftçi”yə layiq deyil

“Neftçi” ara-sıra Azərbaycan millisinə də çağırılmış Aqil Məmmədovu heyətinə qatmaq üzrədi. 

Futbolinfo.az xəbər verir ki, Səlahət Ağayev və Rəşad Əzizli kimi qapıçılara malik paytaxt təmsilçisinin yeni oyunçusu olacaq Məmmədov son 8 aydan artıq müddətdə cəmi 1 dəfə meydana çıxıb.

Daha dəqiq olsaq, son 248 gündə 1 dəfə şans qazanmış qapıçı 90 dəqiqə ilə kifayətlənib. Bu, Aqilin AZAL-dan ayrılmasından sonrakı dövrə təsadüf edib.

Düzdü, Aqilin keçidində iki amilin rolu var. Birincisi, “Neftçi”nin əsas qapıçısı sayılan Səlahət zədədən əziyyət çəkir. Bu səbəbdən paytaxt təmsilçisi heyətinə təcrübəli qolkiper qatmağa lazım bilib. Digər tərəfdən isə “ağ-qaralar”ın baş məşqçisi Tərlan Əhmədov ötən mövsüm AZAL-da rəhbərliyi altında çıxış edən qapıçını yaxşı tanıdığından bu keçidi zəruri sayıb. 

AZAL-la Premyer Liqanın sonuncusu olan və aşağı diviziona yuvarlanan Məmmədov adını “Şüvəlan”a dəyişən komandada qalmaq istəməyib. “Qəbələ”ni seçən əlcək sahibi Dmitri Bezotosnının daimi əvəzləyicisinə çevrilib. Roman Qriqorçuk Aqilə yalnız noyabrın 29-da keçirilən kubok matçında güvənib. Bu da I divizion təmsilçisi “Mil-Muğan”la görüşdə (8:0) gerçəkləşib.

Ümumiyyətlə, həmin matç onun Azərbaycan kubokunda 18-ci oyunu olub. 8-ci dəfə qapısını toxunulmaz saxlayan qolkiper 16 top buraxıb. Aqil orta hesabla hər matçda 0,88 qola üzülüb.

Maraqlıdı ki, qapıçının peşəkar səviyyədə debütü məhz “Neftçi” ilə görüşdə reallaşıb. 2008-ci il martın 30-da “Bakı”nın 2:3 hesabı ilə uduzduğu səfər matçında gənc əlcək sahibi 3 top buraxmışdı. İndi “ağ-qaralar” siftəsinə “3” verdiyi qapıçıya ehtiyac duyub. Bu matç Premyer Liqa çərçivəsində keçirilib. Məmmədovun çempionatdakı ümumi göstəriciləri ürəkaçan deyil. O, 109 qarşılaşmada 160 top buraxıb. Hər matça 1,47 qolun buraxılması isə Premyer Liqa səviyyəsində müsbət nəticə sayıla bilməz.

Aqilin karyerasına baxsaq, qolkiper 2-ci dəfə “Neftçi”yə yollanır. 2015-ci ilin yanvarında olduğu kimi, yenə “ağ-qaralar”a qışda keçən Məmmədovun ilk cəhdi uğursuz alınıb.

2007-2014-cü illərdə şərəfini qoruduğu “Bakı”nı digər paytaxt təmsilçisinə dəyişən futbolçu yeni komandasında “1 nömrə”yə çevrilsə də, “Neftçi” Azərbaycan futbolunun liderləri sırasından uzaq düşüb.

2015-ci il fevralın 6-da “Simurq”la qarşılaşmada (0:0) debüt edən qapıçı ilyarım flaqmanın şərəfini qoruyub. Bu müddətdə Aqil 51 matç keçirib. Qapısında 64 top görən qolkiper orta hesabla 1,15 qola məyus olub. Bu görüşlərdən ikisi Avropa Liqasına təsadüf edib ki, ümumilikdə qitə miqyaslı turnirlərdə 4 matçı olan futbolçu 5 qol buraxıb.

“Neftçi”dən sonra 1 il AZAL-da oynayıb, yarım ili “Qəbələ”də ehtiyatda qalan futbolçu ilyarımlıq fasilədən sonra sabiq komandasına dönür. Lakin bu dəfə onu Səlahət və Rəşadla güclü rəqabət gözləyir.

Dəfələrlə dəvət aldığı millidə də əvəzedici imici ilə barışan futbolçu yalnız 1 matça çıxıb. Moldova ilə yoxlama oyununun (2:1) yalnız bir hissəsində şans qazanan Məmmədov 45 dəqiqədə qol buraxmayıb. (Apasport)