Ölkə futbolu
Elyunussinin getmə səbəbi: havayı pul almaq istəmirmiş
“2017-ci il mənim üçün ziddiyətli il oldu. Ə…
“2017-ci il mənim üçün ziddiyətli il oldu. Əvvəl “Olimpiakos”la yaxşı bir mövsüm keçirdim, Yunanıstan çempionu olduq. Sonra “Qarabağ”a keçdim. Bu komanda ilə Çempionlar Liqasında oynamaq istəyirdim. Əvvəlcə hər şey yaxşı gedirdi. Lakin sonradan axmaq bir zədə aldım” – bu sözləri qış transfer pəncərəsi zamanı “Qarabağ”da ayrılaraq, İsveçin AİK klubuna keçən Tarik Elyunussi bildirib.
Norveç millisinin 29 yaşlı yarımmüdafiəçisi İsveçin “Futbol kanalı”na verdiyi müsahibədə Ağdam klubunda möhkəmlənə bilməməsinin səbəbini də zədələnməsi ilə əlaqələndirib: “Bu zədəyə görə mən 2 ay yaşıl meydandan kənarda qaldım, Çempionlar Liqasının son oyunlarını buraxmalı oldum. Mən isə “Qarabağ”a məhz Çempionlar Liqasında çıxış edib təcrübə toplamaq üçün getmişdim. Sonra AİK-in mənimlə maraqlandığını eşitdim. Bu, mənim üçün maraqlı variant idi. Mənim hələ iddialarım qalır. AİK-lə 2 illik müqavilə bağladım. Əminəm ki, biz “Malmö” ilə rəqabətdə qalib, gəlib İsveç çempionu olacağıq və bu zaman yenidən Avropa kubokunda oynayacağıq”.
“Sizə AİK-dən başqa da təkliflər vardımı” sualına Elyunussi belə cavab verib: “Başqa komandaya da gedə, “Qarabağ”da qalıb yaxşı pul da qazana bilərdim. O cümlədən “Olimpiakos”a qayıtmağım mümkün idi. Amma mən pulu deyil, gələcək uğurlu karyeramı fikirləşdim”.
Elyunussi doğru danışır. Xüsusilə “Qarabağ”da qalmaq variant real idi – müqaviləsi var idi və klub da zədəli oyunçudan imtina etmək niyyətində deyildi. Amma Tarik özü klub rəhbərliyinə müraciət edərək, getmək istədiyini açıqlayıb. O, oynamadan pul almaq istəmədiyini, bu cür qazanmaqdan zövq almadığını bildirib. Futbolçu ötən aylarda komandaya kömək etdə bilməməsindən, amma maaş almasından narahat imiş. Bu səbəbdən getməyə özü təşəbbüskar olub.