Layihə
Milliləşənlərlə pərdələnən fəaliyyətsizlik
2016-cı ilin payızında AFFA İcraiyyə Komitəsinin növbəti i…
2016-cı ilin payızında AFFA İcraiyyə Komitəsinin növbəti iclaslarının birində maraqlı qərar verilmişdi. Belə ki, assosiasiyanın təsisçiliyi ilə Futbolun İnkişaf Fondunun yaradılması qərara alınmışdı.
Sonradan bu fondla bağlı heç bir xəbərə rast gəlinmədiyindən fəaliyyətə başlayıb-başlamadığı haqda bilgimiz yoxdu. Ancaq FİF-in donor(lar)dan gələn vəsaiti Qeyri-Hökümət Təşkilatı olaraq, qəbul edib, istiqamətlər üzrə paylaması hüquqi cəhətdən mümkün deyildi. Bu prosesin start götürməsi üçün xeyli əngəl var idi. Çox güman, elə bu səbəblərdən AFFA fondun fəaliyyəti haqda heç bir bilgi vermir.
Bəlkə də AFFA elə FİF vasitəsi ilə maliyyəni idarə edir – dəqiq bilmirik. Amma SOCAR-dan gələn vəsaitin müxtəlif layihələrə yönəldilməsi üçün assosiasiyanın addım atdığı dəqiqdi. Ölkə klublarının saxlanılması, xaricdə yaşayan azərbaycanlı futbolçuların klublara yerləşdirilməsi, onların maaşının ödənilməsi bu yolla tənzimlənir.
Məsələn, Ramil Şeydayevin “Trabzonspor”da aldığı maaşı Türkiyə klubu vermirdi. Və ya Kamran Ağayevlə Emin Mahmudov Portuqaliyada yalnız AFFA-nın pulu sayəsində qərar tutmuşdu. Yoxsa ki, “Boavişta” onlar üçün pul ödəyəsi deyildi.
Təbii ki, bütün bunları büdcədə göstərmək mümkün deyil. Bir çox məsələlər də var ki, onların həlli üçün ümumi “kotyol” lazımdı və AFFA buna çarə tapıb. Milliləşdirilən oyunçulara sərf olunan vəsaitləri gizlətmək üçün də bu addım düşünülüb. Amma vəsait düzgün sərf edilirmi?
FİF təsis olunmamış da AFFA bu kimi əməliyyatlar keçirirdi. İdeya müəllifi baş katib Elxan Məmmədovun olduğu layihələr daim uğursuzluğu ilə diqqət çəkib. Xüsusilə milliləşdirilənlərə verilən milyonlar havaya sovrulmuş dövlət vəsaitidi. Bu yazıda onları hesablamağa çalışacaq və faydasızlığını isbat edəcəyik.
AFFA 100-dən çox futbolçuya milli pasport düzəldib, lakin onlardan yalnız 2-3-ü hələ də milli komandalarımızdadı. Xüsusilə dağıstanlılara xərclənən onmilyonlar çölə atılmış vəsait hesab edilməlidi. Çünki o futbolçulardan Bədavi Hüseynov istisna olmaqla, heç biri yığmalarımıza hansısa formada yardım etməyib. Əksinə, onlar uşaq futbolundakı problemlərin gizlədilməsinə xidmət edib. Ölkədə yeni nəsil yetişdirilməyib və çatışmazlıq milliləşənlərin hesabına pərdələnib.
İndi, üstündən illər keçəndən sonra bəlli olur ki, ölkədə yeni nəsil yetişməyib. Milliləşməyə qeyri-rəsmi qadağa qoyulub və yerlilərin qıtlığı aşkar diqqət çəkir. Milli komandalara çağırılan futbolçular da məcburiyyətdən dəvət alanlardı, kəmiyyət böyük olmadığından rəqabət yoxdu və bu da az qala hər yaşı çatanın yığmalara çağırılması deməkdi.
AFFA bu 10 ildə nə ilə məşğul olub? Yalnız pul dağıtmaqla. Yalnız bir neçə futbolçunu xatırlamaqla yaddaşınızı təzələyəcəyik.
(davamı olacaq)
FƏRİD