Nyu-York Şəhər Polis Departamenti (NYPD) ABŞ prezidenti Donald Trampın MBA final seriyasının üçüncü oyununda iştirak edəcəyi ilə əlaqədar təhlükəsizlik tədbirlərinin gücləndirildiyini açıqlayıb.
Polisin məlumatına görə, bu səbəbdən “Medison Skver Qarden” arenasının yaxınlığında təşkil edilməsi planlaşdırılan açıq hava kütləvi oyun izləmə tədbiri keçirilməyəcək. Qərar oyunun keçirilməsinə bir sutkadan da az vaxt qalmış qəbul olunub və ABŞ Təhlükəsizlik Xidməti ilə koordinasiya şəraitində verilib.
Qeyd olunur ki, minlərlə azarkeşin böyük ekran qarşısında toplaşdığı bu cür tədbirlər əvvəllər də şəhər polisi üçün təhlükəsizlik baxımından müəyyən çətinliklər yaradıb. Prezidentin səfəri isə əlavə təhlükəsizlik tədbirlərini zəruri edib.
Daha sonra “Medison Skver Qarden”in nümayəndəsi mediaya göndərdiyi açıqlamada bildirib ki, Plaza 33 ərazisində üçüncü oyunun küçə yayımının təşkili üçün icazə şəhərin müvafiq qurumu tərəfindən NYPD ilə razılaşdırılaraq rədd edilib. Açıqlamada həmçinin vurğulanıb ki, qərar prezident Donald Trampla bağlı deyil. Ağ Ev də bu mövqeyi təsdiqləyib. Bununla yanaşı, NYPD komissarı Cessika Tişin arena ətrafında əlavə küçə bağlanmalarını planlaşdırdığı qeyd olunub.
NYPD-nin bəyanatında bildirilir ki, məhdudiyyət yalnız final seriyasının üçüncü oyununa şamil edilir və dördüncü oyunun açıq havada yayımlanması hələ də mümkün olaraq qalır.
