Yaxın Şərqdə vəziyyətin gərginləşməsi fonunda Formula 1 2026-cı il mövsümünün təqviminin yeni variantını axtarmağa davam edir. “Motorsport Italia”nın məlumatına görə, çempionatda ən azı 22 mərhələ keçirilməlidir, əks halda komandalar və “Liberty Media” ciddi maliyyə problemləri ilə üzləşə bilər.
Fars körfəzində hərbi əməliyyatların başlamasından sonra Bəhreyn və Səudiyyə Ərəbistanı Qran-priləri ləğv edilib. Formula 1 Saxir trasındakı mərhələni Sinqapur və Azərbaycan Qran-priləri arasında təqvimə qaytarmağı planlaşdırırdı, lakin ABŞ və İran arasında yeni zərbə mübadiləsindən sonra bu variant yenidən gündəmdən çıxarılıb.
Mənbənin məlumatına görə, hazırda çempionatın rəhbərliyi təcili qaydada təqvimin yeni variantını hazırlayır. Bununla yanaşı, komandalar hələ də eyni trasda iki yarışın keçirilməsi ideyasını dəstəkləmir. Buna baxmayaraq, ən azı 22 mərhələnin keçirilməsi məcburi vəzifə olaraq qalır. Əks halda, komandalar sponsorlar tərəfindən cərimələrlə üzləşə, “Liberty Media” isə minimum Qran-pri sayı nəzərdə tutulan televiziya müqavilələrinin şərtlərini poza bilər.
Bununla yanaşı, sual altında olan təkcə Bəhreyn Qran-prisinin qayıdışı deyil. Davam edən geosiyasi gərginlik səbəbindən noyabrın sonu və dekabrın əvvəlinə planlaşdırılan Qətər və Əbu-Dabi Qran-prilərinin taleyi də qeyri-müəyyən olaraq qalır. Mənbənin iddiasına görə, təqvimlə bağlı yekun qərar avqustun 21-23-də keçiriləcək Niderland Qran-prisindən gec olmayaraq qəbul edilməlidir.